ಆ್ಯಂಡ್ರಾಯ್ಡ್‌ ಅಪ್ಲಿಕೇಶನ್‌ನಲ್ಲಿ ದಿನಕ್ಕೆ 4 ಗಂಟೆ ಮುಳುಗುವ ಭಾರತೀಯರು!

ಬೆಂಗಳೂರು: ದೇಶದ ಸ್ಮಾರ್ಟ್‌ಫೋನ್‌ ಬಳಕೆದಾರರು ದಿನಕ್ಕೆ 4 ಗಂಟೆಯನ್ನು ಕೇವಲ ಆ್ಯಂಡ್ರಾಯ್ಡ್‌ ಅಪ್ಲಿಕೇಶನ್‌ ಬಳಕೆಗೆಂದೇ ಮೀಸಲಿಡುತ್ತಾರೆ ಎಂದು ಆ್ಯಪ್‌ ಅನ್ನಿ ಎಂಬ ಸರ್ವೇ ಸಂಸ್ಥೆ ತಿಳಿಸಿದೆ.

ಅತೀ ಹೆಚ್ಚು ಆ್ಯಂಡ್ರಾಯ್ಡ್‌ ಅಪ್ಲಿಕೇಶನ್‌ ಬಳಸುವ ಜಗತ್ತಿನ 10 ರಾಷ್ಟ್ರಗಳಲ್ಲಿ ಸರ್ವೆ ನಡೆಸಿರುವ ಆ್ಯಪ್‌ ಅನ್ನಿ ಸಂಸ್ಥೆ, ಇವುಗಳ ಪೈಕಿ ಭಾರತವು ಐದನೇ ಸ್ಥಾನದಲ್ಲಿದೆ ಎಂದು ಹೇಳಿದೆ.

ದಕ್ಷಿಣ ಕೊರಿಯಾ, ಮೆಕ್ಸಿಕೋ, ಬ್ರೆಜಿಲ್‌ ಮತ್ತು ಜಪಾನ್‌ ರಾಷ್ಟ್ರಗಳಲ್ಲಿ ಸುಮಾರು 5 ಗಂಟೆಗಳ ಕಾಲ ಸ್ಮಾರ್ಟ್‌ಫೊನ್‌ ಬಳಕೆದಾದರು ಅಪ್ಲಿಕೇಶನ್‌ ಬಳಕೆಗೆ ಸಮಯ ನೀಡುತ್ತಾರೆ.

ಭಾರತದಲ್ಲಿ ಕನಿಷ್ಠ ಸ್ಮಾರ್ಟ್‌ಫೋನ್‌ ಬಳಕೆ ಮಾಡುವ ಬಳಕೆದಾರರು ದಿನಕ್ಕೆ 1.5ಗಂಟೆಯಾದರೂ ಸ್ಮಾರ್ಟ್‌ಫೋನ್‌ನ ಆ್ಯಪ್‌ನ್ನು ಬಳಕೆ ಮಾಡುತ್ತಾರೆ, ಉಳಿದಂತೆ ಹೆಚ್ಚಿನ ಮಂದಿ 2.5 ಗಂಟೆ ಆ್ಯಪ್‌ನಲ್ಲಿ ಸಮಯ ಕಳೆಯುತ್ತಾರೆ ಎಂದು ಹೇಳಿದೆ. ಆದರೆ ಕೆಲ ಸ್ಮಾರ್ಟ್‌ಫೋನ್‌ ಬಳಕೆ ದಾರರು ದಿನಕ್ಕೆ 4 ಗಂಟೆ ಅಪ್ಲಿಕೇಶನ್‌ನ್ನು ಬಳಕೆ ಮಾಡುತ್ತಾರೆ.

ವಾಟ್ಸಾಪ್‌ ಸೇರಿದಂತೆ ಹಲವಾರು ಲೈಫ್‌ಸ್ಟೈಲ್‌ಗೆ ಉಪಯೋಗವಂತಹ ಅಪ್ಲಿಕೇಶನ್‌ಗಳ ಬಳಕೆ ಈ ರಾಷ್ಟ್ರಗಳಲ್ಲಿ ಹೆಚ್ಚಿದೆ ಎಂದು ವರದಿಯಲ್ಲಿ ಹೇಳಿದೆ. ಶಾಪಿಂಗ್‌ಗೆ ಯೋಗ್ಯವಾದ ಅಪ್ಲಿಕೇಶನ್‌ಗಳ ಬಳಕೆಯಲ್ಲಿ ಭಾರತೀಯರು ಎರಡನೇ ಸ್ಥಾನದಲ್ಲಿದ್ದಾರೆ. ಒಂದು ತಿಂಗಳಲ್ಲಿ 90 ನಿಮಿಷ ಈ ಶಾಪಿಂಗ್ ಅಪ್ಲಿಕೇಶನ್‌ಗಳ ಬಳಕೆ ಮಾಡುತ್ತಾರೆ, ಆದರೆ ದಕ್ಷಿಣ ಕೋರಿಯಾದ ಮಂದಿ 90 ನಿಮಿಷಕ್ಕಿಂತಲೂ ಅಧಿಕ ಕಾಲ ಶಾಪಿಂಗ್‌ ಅಪ್ಲಿಕೇಶನ್‌ ಬಳಸುತ್ತಾರೆ.

ಅಮೆರಿಕ, ಲಂಡನ್‌, ಫ್ರಾನ್ಸ್‌ನಂತಹ ರಾಷ್ಟ್ರಗಳಲ್ಲಿ ಸ್ಮಾರ್ಟ್‌ಫೋನ್‌ ಬಳಕೆ ಹೆಚ್ಚಿದ್ದರೂ ಇವರು ಸುಮಾರು 25 ನಿಮಿಷಕ್ಕಿಂತಲೂ ಕಡಿಮೆ ಕಾಲ ತಮ್ಮ ಸಮಯವನ್ನು ಇಂತಹ ಅಪ್ಲಿಕೇಶನ್‌ಗಳಿಗೆ ಮೀಸಲಿಡುತ್ತಾರೆ ಎಂದು ಸರ್ವೇ ವೇಳೆ ತಿಳಿದು ಬಂದಿದೆ.

many indians spend 4 hrs/day on apps