Digital India: ದೇಶದಲ್ಲಿ ಸದ್ದಿಲ್ಲದೆ ನಡೆಯುತ್ತಿದೆ ಡಿಜಿಟಲ್‌ ಕ್ರಾಂತಿ

ದೇಶದಲ್ಲಿ ಕೋವಿಡ್ 19 ಲಾಕ್‌ಡೌನ್‌ನಿಂದಾಗಿ ವಿವಿಧ ಕೆಲಸ ಕಾರ್ಯಗಳು ಆನ್‌ಲೈನ್ ಮೂಲಕವೇ ನಡೆಯುತ್ತಿದೆ. ಕಚೇರಿಗಳು ಮುಚ್ಚಿದ್ದರೂ, ಕೆಲಸ ಕಾರ್ಯ ಮಾತ್ರ ನಿಂತಿಲ್ಲ. ವಿವಿಧ ಸರಕಾರಿ ಇಲಾಖೆ ಮತ್ತು ಖಾಸಗಿ ಕಂಪನಿಗಳು ಉದ್ಯೋಗಿಗಳಿಗೆ ಮನೆಯಿಂದಲೇ ಕೆಲಸ ಮಾಡುವ ಅವಕಾಶ ಕಲ್ಪಿಸಿರುವುದು ಉತ್ತಮ ಪ್ರಯೋಜನವಾಗಿದೆ.

ಕಳೆದ ನಾಲ್ಕು ತಿಂಗಳಲ್ಲಿ ದೇಶದಲ್ಲಿ ಕೊರೊನಾ ಲಾಕ್‌ಡೌನ್‌ನಿಂದಾಗಿ ಆಡಳಿತ ಯಂತ್ರ ಬಹುತೇಕ ಸ್ತಬ್ಧಗೊಂಡಿತ್ತು. ಆದರೆ, ಭಾರತೀಯ ರೈಲ್ವೆ ಮಾತ್ರ ಈ ಅವಧಿಯಲ್ಲಿ ಡಿಜಿಟಲ್‌ ಕ್ರಾಂತಿಯನ್ನೇ ಮಾಡಿದೆ. ಇಲಾಖೆ ಮೂಲಗಳು ನೀಡಿರುವ ಮಾಹಿತಿ ಪ್ರಕಾರ ಈ ಅವಧಿಯಲ್ಲಿ ಸುಮಾರು 12 ಲಕ್ಷ ದಾಖಲೆಗಳನ್ನು ಡಿಜಿಟಲೀಕರಣ ಮಾಡಲಾಗಿದೆ.

ಪತ್ರಗಳು, ಬಿಲ್‌ಗಳು, ಕಚೇರಿ ಆದೇಶಗಳು ಮತ್ತು ಯೋಜನಾ ನೀಲನಕ್ಷೆಗಳನ್ನು ಈ ಅವಧಿಯಲ್ಲಿ ಡಿಜಿಟಲೀಕರಣ ಮಾಡಲಾಗಿದೆ. ಇ-ಆಡಳಿತಕ್ಕೆ ಒತ್ತು ನೀಡಲಾಗಿದ್ದು, ಬಿಲ್‌ಗಳ ಅನುಮೋದನೆ ಸೇರಿದಂತೆ ಬಹುತೇಕ ವಿಷಯಗಳನ್ನು ಆನ್‌ಲೈನ್‌ ಮೂಲಕವೇ ನಿರ್ವಹಿಸಲಾಗುತ್ತಿದೆ. ಇದರಿಂದ ಸಿಬ್ಬಂದಿ ನಡುವಿನ ನೇರ ಸಂಪರ್ಕ ಬಹುತೇಕ ಶೂನ್ಯಕ್ಕೆ ಬಂದಿರುವುದು ಮಾತ್ರವಲ್ಲದೇ ಆಡಳಿತ ವೆಚ್ಚದಲ್ಲಿಯೂ ಗಣನೀಯ ಉಳಿತಾಯವಾಗಿದೆ.

2019ರ ಮಾರ್ಚ್‌ನಲ್ಲಿ ರೈಲ್ವೆ 4.5 ಲಕ್ಷ ಇ- ಬಿಲ್‌ಗಳನ್ನು ಸೃಷ್ಟಿಸಿತ್ತು. ಆದರೆ, 2020ರ ಮಾರ್ಚ್‌ಗೆ ಅದರ ಪ್ರಮಾಣ 16.5 ಲಕ್ಷಕ್ಕೇರಿದೆ. ಅದೇ ರೀತಿ ಲಾಕ್‌ಡೌನ್‌ ಇದ್ದ 4 ತಿಂಗಳ ಅವಧಿಯಲ್ಲಿ 5.4 ಲಕ್ಷ ಡಿಜಿಟಲ್‌ ಬಿಲ್‌ ಸಿದ್ಧ ಮಾಡಲಾಗಿದೆ. ಕಳೆದ ವರ್ಷ ಅದು ಕೇವಲ 1.3 ಲಕ್ಷದಷ್ಟಿತ್ತು.

ರಾಷ್ಟ್ರೀಯ ಮಾಹಿತಿ ಕೇಂದ್ರವು ಅಭಿವೃದ್ಧಿ ಮಾಡಿರುವ 'ರೈಲ್‌ಟೆಲ್‌' ಕ್ಲೌಡ್‌ ನೆರವಿನಿಂದ ರೈಲ್ವೆ ಇಲಾಖೆಯ ಡಿಜಿಟಲ್‌ ವ್ಯವಹಾರ ನಡೆಸುತ್ತಿದೆ. ಲಾಕ್‌ಡೌನ್‌ ಅವಧಿಯಲ್ಲಿ ಜನರ ಓಡಾಟಕ್ಕೆ ಅನುಕೂಲ ಇರಲಿಲ್ಲ. ಇಂಥ ಅವಧಿಯಲ್ಲಿ'ರೈಲ್‌ಟೆಲ್‌' ಕ್ಲೌಡ್‌ ಮೂಲಕ ಡಿಜಿಟಲ್‌ ವ್ಯವಹಾರವನ್ನು ನಡೆಸುವ ಮೂಲಕ ಪ್ರಗತಿ ಸಾಧಿಸಲಾಯಿತು ಎಂದು ರೈಲ್‌ಟೆಲ್‌ನ ಪ್ರಧಾನ ವ್ಯವಸ್ಥಾಪಕ ನಿರ್ದೇಶಕ ಪುನೀತ್‌ ಚಾವ್ಲಾ ಹೇಳಿದ್ದಾರೆ.

TikTok Ban: ಚೀನಾದ ಟಿಕ್‌ಟಾಕ್ ಆ್ಯಪ್ ಖರೀದಿಗೆ ಮುಂದಾದ ಮೈಕ್ರೋಸಾಫ್ಟ್