ಏರ್‌ಟೆಲ್‌ನಿಂದ ಭರ್ಜರಿ ಆಫರ್!..ಹೊಸ ಪೋನ್ ಖರೀದಿಗೆ 6000 ರೂ.ಕ್ಯಾಶ್‌ಬ್ಯಾಕ್!

ಭಾರತಿ ಏರ್‌ಟೆಲ್ ತನ್ನ ಪೋರ್ಟಲ್‌ನಿಂದ ಹೊಸ ಸ್ಮಾರ್ಟ್‌ಫೋನ್‌ಗಳನ್ನು ಖರೀದಿಸಿದ ಹೊಸ ಗ್ರಾಹಕರಿಗೆ 6000 ರೂ. ಕ್ಯಾಶ್‌ಬ್ಯಾಕ್ ಆಫರ್ ನೀಡಲು ಮುಂದೆ ಬಂದಿದೆ. ಮೇರಾ ಪೆಹ್ಲಾ ಸ್ಮಾರ್ಟ್‌ಫೋನ್(ನನ್ನ ಮೊದಲ ಮೊಬೈಲ್) ಕಾರ್ಯಕ್ರಮದ ಭಾಗವಾಗಿ ಏರ್‌ಟೆಲ್ ಇಂತಹದೊಂದು ಆಫರ್ ಬಿಡುಗಡೆ ಮಾಡಿದ್ದು, ಹೊಸ ಸ್ಮಾರ್ಟ್‌ಫೋನ್ ಖರೀದಿಸಿದ ಬಳಕೆದಾರರು ಏರ್‌ಟೆಲ್ ಸಿಮ್ ಖರೀದಿಸಿ, 249 ರೂ ಅಥವಾ ಅದಕ್ಕಿಂತ ಹೆಚ್ಚಿನ ಬೆಲೆಯ ಪ್ಯಾಕ್ ಅನ್ನು 36 ತಿಂಗಳುಗಳವರೆಗೆ ರೀಚಾರ್ಜ್ ಮಾಡಿದರೆ ಈ ಆಫರ್ ಅನ್ನು ನೀಡಲಾಗುವುದು ಎಂದು ಏರ್‌ಟೆಲ್ ಕಂಪೆನಿ ಹೇಳಿದೆ.

ಏರ್‌ಟೆಲ್ ಪೋರ್ಟಲ್‌ನಿಂದ 12,000ವರೆಗಿನ ಹೊಸ ಸ್ಮಾರ್ಟ್ ಫೋನ್ ಖರೀದಿಸುವ ಗ್ರಾಹಕರಿಗೆ ಏರ್‌ಟೆಲ್ ಆಕರ್ಷಕ 6,000 ರೂ ಕ್ಯಾಶ್ ಬ್ಯಾಕ್ ನೀಡಲಿದ್ದು, ಸುಮಾರು 150 ಕ್ಕೂ ಹೆಚ್ಚು ಸ್ಮಾರ್ಟ್ ಫೋನ್ ಗಳು ಈ ಪ್ರಯೋಜನಕ್ಕೆ ಅರ್ಹವಾಗಿವೆ" ಎಂದು ಏರ್‌ಟೆಲ್ ತಿಳಿಸಿದೆ. ಸ್ಯಾಮ್‌ಸಂಗ್, ಶಿಯೋಮಿ, ವಿವೋ, ಒಪ್ಪೋ, ರಿಯಲ್‌ಮೆ, ನೋಕಿಯಾ, ಐಟೆಲ್, ಲಾವಾ, ಇನ್‌ಫಿನಿಕ್ಸ್, ಟೆಕ್ನೋ, ಲೆನೊವೊ ಮತ್ತು ಮೊಟೊರೊಲಾ ಎಂಬ 12 ಬ್ರಾಂಡ್‌ಗಳಿಂದ ತಲಾ ರೂ .12,000 ವರೆಗಿನ ಬೆಲೆಯ ಸ್ಮಾರ್ಟ್‌ಫೋನ್‌ಗಳಿಗೆ ಕ್ಯಾಶ್‌ಬ್ಯಾಕ್ ನೀಡಲಾಗುವುದು ಎಂದು ಏರ್‌ಟೆಲ್ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.

ಮೇರಾ ಪೆಹ್ಲಾ ಸ್ಮಾರ್ಟ್‌ಫೋನ್(ನನ್ನ ಮೊದಲ ಮೊಬೈಲ್) ಕಾರ್ಯಕ್ರಮದ ಭಾಗವಾಗಿ ಕ್ಯಾಶ್‌ಬ್ಯಾಕ್ ಪ್ರಯೋಜನವನ್ನು ಪಡೆಯಲು, ಏರ್‌ಟೆಲ್ ಪೋರ್ಟಲ್‌ನಿಂದ ಸ್ಮಾರ್ಟ್‌ಫೋನ್ ಖರೀದಿಸಿದವರು 36 ತಿಂಗಳುಗಳವರೆಗೆ ರೂ. 249 ಅಥವಾ ಅದಕ್ಕಿಂತ ಹೆಚ್ಚಿನ ಏರ್‌ಟೆಲ್ ಪ್ರಿಪೇಯ್ಡ್ ಪ್ಯಾಕ್‌ನೊಂದಿಗೆ ರೀಚಾರ್ಜ್ ಮಾಡಬೇಕಾಗುತ್ತದೆ. ಹೀಗೆ ರೀಚಾರ್ಜ್ ಮಾಡಿಕೊಂಡ ಗ್ರಾಹಕರು ಎರಡು ಭಾಗಗಳಲ್ಲಿ ಕ್ಯಾಶ್‌ಬ್ಯಾಕ್ ಪಡೆಯುತ್ತಾರೆ. 18 ತಿಂಗಳ ನಂತರ ಮೊದಲ ಕಂತಿನಲ್ಲಿ 2,000 ರೂ. ಮತ್ತು ಉಳಿದ 4,000 ರೂ.ಗಳನ್ನು 36 ತಿಂಗಳ ನೀಡಲಾಗುತ್ತದೆ ಎಂದು ಏರ್‌ಟೆಲ್ ಬಿಡುಗಡೆ ಮಾಡಿರುವ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಅಂದರೆ, ಏರ್‌ಟೆಲ್ ಪೋರ್ಟಲ್ ಮೂಲಕ ಗ್ರಾಹಕರು ಸ್ಮಾರ್ಟ್‌ಫೋನನ್ನು ಖರೀದಿಸಿದರೆ, ಗ್ರಾಹಕರು ಡೇಟಾ ಕೋಟಾಗಳು ಮತ್ತು ಅನಿಯಮಿತ ಕರೆ ಪ್ರಯೋಜನಗಳನ್ನು ಪಡೆದ ನಂತರ ಮೂರು ವರ್ಷಗಳ ಅಂತ್ಯದ ವೇಳೆಗೆ ಸಂಪೂರ್ಣ ಕ್ಯಾಶ್‌ಬ್ಯಾಕ್ ಅನ್ನು ಪ್ರತಿ ಏರ್‌ಟೆಲ್ ಪ್ರಿಪೇಯ್ಡ್ ರೀಚಾರ್ಜ್‌ನೊಂದಿಗೆ ನೀಡಲಾಗುತ್ತಿದೆ. 36 ತಿಂಗಳ ಕೊನೆಯಲ್ಲಿ, ಗ್ರಾಹಕರು ಒಟ್ಟು 6000 ರೂಪಾಯಿಗಳ ಆಕರ್ಷಕ ಕ್ಯಾಶ್‌ಬ್ಯಾಕ್ ಪ್ರಯೋಜನವನ್ನು ಪಡೆಯುತ್ತಾರೆ. ಆದರೆ, ಅಲ್ಲಿಯವರೆಗೂ ಅವರು ಏರ್‌ಟೆಲ್ ನೀಡುತ್ತಿರುವ ರೂ. 249 ಅಥವಾ ಅದಕ್ಕಿಂತ ಹೆಚ್ಚಿನ ಏರ್‌ಟೆಲ್ ಪ್ರಿಪೇಯ್ಡ್ ಪ್ಯಾಕ್‌ನೊಂದಿಗೆ ರೀಚಾರ್ಜ್ ಮಾಡುತ್ತಿರಬೇಕಾಗುತ್ತದೆ.

ಇನ್ನು ಏರ್‌ಟೆಲ್ ನೀಡುತ್ತಿರುವ ಇದೇ ಯೋಜನೆಯಲ್ಲಿ ಒಂದು ಬಾರಿ ಉಚಿತ ಸ್ಕ್ರೀನ್ ಬದಲಾವಣೆಗೆ ಅವಕಾಶ ನೀಡಲಾಗಿದೆ. ಈ ಯೋಜನೆಯನ್ನು ಆಯ್ಕೆ ಮಾಡುವ ಗ್ರಾಹಕರು, ತಮ್ಮ ಸ್ಮಾರ್ಟ್‌ಫೋನ್ ಹಾನಿಗೊಳಗಾದ ಸಂದರ್ಭದಲ್ಲಿ ಸರ್ವಿಫೈ ಮೂಲಕ ಒಂದು ಬಾರಿ ಉಚಿತ ಸ್ಕ್ರೀನ್ ಬದಲಿಸಲು ಅರ್ಹರಾಗಿರುತ್ತಾರೆ. ಇದು 12,000 ರೂ.ಸ್ಮಾರ್ಟ್ ಫೋನ್ ಗೆ ಸ್ಕ್ರೀನ್ ರಿಪ್ಲೇಸ್ ಮೆಂಟ್ ಅಂದಾಜು ವೆಚ್ಚದೊಂದಿಗೆ 4800 ವರೆಗಿನ ರೂ ಹೆಚ್ಚುವರಿ ವೆಚ್ಚದ ಲಾಭವನ್ನು ನೀಡುತ್ತದೆ. ಒಮ್ಮೆ ಗ್ರಾಹಕರು ಅರ್ಹವಾದ ರೀಚಾರ್ಜ್ ಪ್ಯಾಕ್‌ನಲ್ಲಿರುವಾಗ, ಸ್ಕ್ರೀನ್ ರಿಪ್ಲೇಸ್ಮೆಂಟ್ ದಾಖಲಾತಿಯನ್ನು ಏರ್‌ಟೆಲ್ ಥ್ಯಾಂಕ್ಸ್ ಆಪ್‌ನಲ್ಲಿ 90 ದಿನಗಳ ಅವಧಿಯಲ್ಲಿ ಮಾಡಬಹುದು.