TikTok Ban: ಮೊದಲು ಬ್ಯಾನ್ ಮಾಡಿ ಮತ್ತೆ ಇಲ್ಲ ಎಂದ ಅಮೆಜಾನ್!

ಅಮೆಜಾನ್ ತನ್ನ ಉದ್ಯೋಗಿಗಳಿಗೆ ಟಿಕ್‌ಟಾಕ್ ಬಳಕೆ ಮಾಡುವುದನ್ನು ನಿರ್ಬಂಧಿಸಿ ಇ ಮೇಲ್ ಕಳುಹಿಸಿದ್ದು, ನಂತರ ಬ್ಯಾನ್ ಮಾಡಿಲ್ಲ ಎಂದು ಹೇಳಿದೆ. ಕಣ್ತಪ್ಪಿನಿಂದ ಎಲ್ಲ ಉದ್ಯೋಗಿಗಳಿಗೆ ಅಧಿಕೃತ ಮೇಲ್ ಮೂಲಕ ಟಿಕ್‌ಟಾಕ್ ಬ್ಯಾನ್ ಮಾಡಿರುವ ಕುರಿತು ಇ ಮೇಲ್ ರವಾನೆಯಾಗಿದೆ ಎಂದು ಅಮೆಜಾನ್ ಹೇಳಿದೆ.

ದೇಶದಲ್ಲಿ ಚೀನಾ ಮೂಲದ ಟಿಕ್‌ಟಾಕ್ ಸಹಿತ 59 ಆ್ಯಪ್‌ಗಳನ್ನು ಕೇಂದ್ರ ಸರಕಾರ ನಿಷೇಧಿಸಿದೆ. ಅದರ ಬೆನ್ನಲ್ಲೇ ಅಮೆರಿಕದಲ್ಲೂ ಟಿಕ್‌ಟಾಕ್ ಬ್ಯಾನ್ ಮಾಡಬೇಕು ಎಂಬ ಕೂಗು ಬಲವಾಗುತ್ತಿದೆ. ಜತೆಗೆ ಸರಕಾರದ ಮಟ್ಟದ ಅಧಿಕಾರಿಗಳು ಕೂಡ ಟಿಕ್‌ಟಾಕ್ ಸಹಿತ ಚೀನಾ ಮೂಲದ ವಿವಿಧ ಆ್ಯಪ್‌ಗಳನ್ನು ನಿಷೇಧಿಸಬೇಕು ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇವೆಲ್ಲದರ ಮಧ್ಯೆಯೇ ರಿಟೇಲ್ ಮತ್ತು ಇ ಕಾಮರ್ಸ್ ದೈತ್ಯ ಅಮೆಜಾನ್ ಕೂಡ ಉದ್ಯೋಗಿಗಳಿಗೆ ಟಿಕ್‌ಟಾಕ್ ನಿಷೇಧದ ಕುರಿತು ಇ ಮೇಲ್ ರವಾನಿಸಿದೆ. ಆದರೆ ಕೆಲಗಂಟೆಯ ಬಳಿಕ ಮತ್ತೊಂದು ಇ ಮೇಲ್ ಕಳುಹಿಸಿದ್ದು, ಈ ಮೊದಲು ಕಳುಹಿಸಲಾದ ಇ ಮೇಲ್ ತಪ್ಪಾಗಿ ಬಂದಿದೆ. ಪ್ರಸ್ತುತ ಟಿಕ್‌ಟಾಕ್ ಬಳಕೆಗೆ ಉದ್ಯೋಗಿಗಳಿಗೆ ನಿರ್ಬಂಧ ಹೇರುತ್ತಿಲ್ಲ ಎಂದು ಅಧಿಕೃತ ಹೇಳಿಕೆ ನೀಡಿದೆ.

ಇದರೊಂದಿಗೆ ಭದ್ರತಾ ಕಾರಣದಿಂದ ಮುಂದೆ ಅಮೆಜಾನ್ ಮಾತ್ರವಲ್ಲ, ಇತರ ಕಂಪನಿಗಳು ಕೂಡ ಉದ್ಯೋಗಿಗಳಿಗೆ ಚೀನಾದ ಟಿಕ್‌ಟಾಕ್ ಸಹಿತ ವಿವಿಧ ಆ್ಯಪ್ ಬಳಕೆಗೆ ನಿರ್ಬಂಧ ಹೇರುವ ಸಾಧ್ಯತೆಯಿದೆ ಎನ್ನಲಾಗುತ್ತಿದೆ.

Digital Strike: ಮತ್ತಷ್ಟು ಚೀನಾ ಆ್ಯಪ್, ವೆಬ್‌ಸೈಟ್ ನಿಷೇಧಕ್ಕೆ ಕೇಂದ್ರ ಚಿಂತನೆ!