ಪಬ್‌ಜಿಗೆ ಸ್ಪರ್ಧಿಯಾಗಿ ಹೊಸ ಗೇಮ್, 3 ದಿನಗಳಲ್ಲಿ ಕೋಟಿ ಮಂದಿ ಪ್ಲೇಯರ್ಸ್

ಫಿಫಾ, ನೀಡ್ ಫಾರ್ ಸ್ಪೀಡ್, ಬ್ಯಾಟಲ್ ಫೀಲ್ಡ್‌ನಂತಹ ಐಕಾನಿಕ್ ಗೇಮ್ ಫ್ರಾಂಚೈಸಿಗಳು ಎಲೆಕ್ಟ್ರಾನಿಕ್ಸ್ ಆರ್ಟ್ಸ್‌ಗೆ (ಇಎ) ಸೇರಿದಂತಹವು. ಆದರೆ ಇತ್ತೀಚೆಗೆ ಫೋರ್ಟ್‌ನೈಟ್, ಪಬ್‌ಜಿಯಂತಹ ಉಚಿತವಾಗಿ ಆಡುವ ಆನ್‍ಲೈನ್ ಗೇಮ್ಸ್ ಲಭ್ಯತೆಯ ಕಾರಣ ಅದು ಎ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ.

ಇದೀಗ ಇನ್ನೊಂದು ಹೊಸ ಗೇಮ್ ಮಾರುಕಟ್ಟೆಗೆ ದಾಂಗುಡಿ ಇಟ್ಟಿದೆ. ಇದರ ಹೆಸರು ಅಪೆಕ್ಸ್ ಲೆಜೆಂಡ್ಸ್. ಅಮೆರಿಕಾ ಮೂಲದ ವೀಡಿಯೋ ಗೇಮ್ ಡೆವಲಪ್‍ಮೆಂಟ್ ಸ್ಟುಡಿಯೋ ರೆಸ್ಪಾನ್ ಎಂಟರ್‌ಟೇನ್‌ಮೆಂಟ್ ಈ ಗೇಮ್ ರೂಪಿಸಿದೆ. ಇದು ಎಲೆಕ್ಟ್ರಾನಿಕ್ ಆರ್ಟ್ಸ್ (ಇಎ) ಸಹ ಸಂಸ್ಥೆ. ಗೇಮ್ ಮಾರುಕಟ್ಟೆಗೆ ಅಡಿಯಿಟ್ಟ ಮೂರು ದಿನಗಳಲ್ಲೇ ಒಂದು ಕೋಟಿ ಮಂದಿ ಪ್ಲೇಯರ್ಸನ್ನು ಆಕರ್ಷಿಸಿದೆ. ಇದರಿಂದಾಗಿ ಇಎ ಷೇರು ಶುಕ್ರವಾರ ಶೇ.16ರಷ್ಟು ಏರಿಕೆ ಕಂಡಿದೆ.

ಅಪೆಕ್ಸ್ ಲೆಜೆಂಡ್ಸ್ ಪ್ಲೇಯರ್ಸ್ ಸಂಖ್ಯೆ ಈಗಾಗಲೆ ಕೋಟಿ ದಾಟಿದೆ. ಅದರೆ ಸುಮಾರು 10 ಲಕ್ಷ ಮಂದಿ ಒಮ್ಮೆಲೆ ಗೇಮ್‌‌ಗೆ ಲಾಗಿನ್ ಆಗುತ್ತಾರೆಂದು EA ತಿಳಿಸಿದೆ. ಶುಕ್ರವಾರದ ಹೊತ್ತಿಗೆ ಲೈವ್ ಸ್ಟ್ರೀಮಿಂಗ್ ವೀಡಿಯೋ ಫ್ಲಾಟ್‍ಫಾಮ್ 'Twitch' ನಲ್ಲಿ ಹೆಚ್ಚು ಮಂದಿ ವೀಕ್ಷಿಸಿದ ಗೇಮ್ ಇದು. ಅಪೆಕ್ಸ್ ಗೇಮ್ ಕೇವಲ ಎಕ್ಸ್‌ಬಾಕ್ಸ್, ಪಿಎಸ್ 4, ಪಿಸಿಗಳಲ್ಲಿ ಮಾತ್ರ ಆಡಬಹುದಾಗಿದೆ. ಮೊಬೈಲ್ ಆವೃತ್ತಿ ಶೀಘ್ರದಲ್ಲೇ ಮಾರುಕಟ್ಟೆಗೆ ಬರಬಹುದು.

ಬ್ಯಾಟಲ್‌‍ಫೀಲ್ಡ್ ವಿ ಮಾರಾಟ ಬಲಹೀನವಾಗಿದ್ದು, ವಾರ್ಷಿಕ ಆದಾಯ ಕಡಿಮೆ ಇರಬಹುದು ಎಂದು ಕಂಪೆನಿ ಅಂದಾಜಿಸಿದೆ. ಹಾಗಾಗಿ ಕಂಪೆನಿ ಷೇರು ಶೇ.18ರಷ್ಟು ಪತನವಾಗಿದೆ. ಇದು ನಡೆದ ಸ್ವಲ್ಪ ದಿನಕ್ಕೆ apex legends ಗೇಮನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿರುವುದು ಗಮನಾರ್ಹ ಸಂಗತಿ.