ಸೌದಿ ಮಹಿಳೆಯರನ್ನು ಹಿಂಬಾಲಿಸುವ ಆ್ಯಪ್ ತೆಗೆಯಲು ಆ್ಯಪಲ್, ಗೂಗಲ್‌ಗೆ ಒತ್ತಾಯ

ಡಿಜಿಟಲ್ ಯುಗದಲ್ಲಿ ಖಾಸಗೀತನಕ್ಕೆ ಧಕ್ಕೆಯುಂಟಾಗುತ್ತಿದೆ ಎಂಬ ದೂರಿನ ಬೆನ್ನಲ್ಲೇ ಬಳಕೆದಾರರ ಮಾಹಿತಿ ಕದಿಯುವ ವಿವಿಧ ಸ್ಮಾರ್ಟ್‌ಫೋನ್ ಆ್ಯಪ್‌ಗಳ ಬಗ್ಗೆ ಆ್ಯಪಲ್ ಮತ್ತು ಗೂಗಲ್ ಕ್ರಮಕ್ಕೆ ಮುಂದಾಗಿವೆ.

ಆದರೆ ಆ್ಯಪಲ್ ಆ್ಯಪ್ ಸ್ಟೋರ್ ಮತ್ತು ಗೂಗಲ್ ಪ್ಲೇ ಸ್ಟೋರ್‌ನಲ್ಲಿರುವ ಸೌದ ಅರೇಬಿಯಾ ಸರಕಾರ ಇ ಗವರ್ನೆನ್ಸ್ ಆ್ಯಪ್ ಒಂದು ಮಹಿಳೆಯರ ಚಲನವಲನವನ್ನು ಹಿಂಬಾಲಿಸುತ್ತದೆ ಎಂದು ದೂರಲಾಗಿದ್ದು, ಕೂಡಲೇ ಅವುಗಳನ್ನು ಕೈಬಿಡುವಂತೆ ಮಾನವ ಹಕ್ಕುಗಳ ಆಯೋಗ ಒತ್ತಾಯಿಸಿದೆ.

ಸೌದಿ ಅರೇಬಿಯಾ ಪಾಸ್‌ಪೋರ್ಟ್, ಜನನ ಪ್ರಮಾಣಪತ್ರ ಮತ್ತು ವಾಹನ ನೋಂದಣಿ ಸಹಿತ ವಿವಿಧ ಸೇವೆಗಳನ್ನು ಒದಗಿಸಲು ಅಬ್ಶರ್ ಎಂಬ ಆ್ಯಪ್ ಹೊರತಂದಿದೆ.

ಆದರೆ ಈ ಆ್ಯಪ್ ಪುರುಷರು ಮಹಿಳೆಯರನ್ನು ಹಿಂಬಾಲಿಸಲು, ಅವರ ಚಲನವಲನವನ್ನು ಟ್ರ್ಯಾಕ್ ಮಾಡಲು ಅವಕಾಶ ಕಲ್ಪಿಸುತ್ತದೆ ಎಂದು ಆಯೋಗ ದೂರಿದ್ದು, ಮಹಿಳೆಯರ ಖಾಸಗೀತನಕ್ಕೆ ಧಕ್ಕೆ ತರುತ್ತಿರುವ ಈ ಆ್ಯಪ್ ಅನ್ನು ನಿಷೇಧಿಸಬೇಕೆಂದು ಕೇಳಿಕೊಂಡಿವೆ.

ಸೌದಿ ಅರೇಬಿಯಾದಲ್ಲಿ ಪುರುಷರ ಅನುಮತಿ ಮತ್ತು ರಕ್ಷಣೆಯಿಲ್ಲದೆ ಸ್ವತಂತ್ರವಾಗಿ ಓಡಾಡಲು ಮಹಿಳೆಯರಿಗೆ ಅವಕಾಶವಿಲ್ಲ. ಜತೆಗೆ ಅಬ್ಶರ್ ಆ್ಯಪ್‌ನಲ್ಲಿ ಪುರುಷರು ಮಹಿಳೆಯರ ಚಲನವಲನ ನಿಯಂತ್ರಣ ಸಹಿತ ಹಲವಯ ಆಯ್ಕೆ ಮತ್ತು ನಿರ್ಬಂಧ ಹೇರಲು ಅವಕಾಶ ಕಲ್ಪಿಸುತ್ತದೆ ಎನ್ನಲಾಗಿದೆ.