Apple: ಆ್ಯಪ್‌ಸ್ಟೋರ್ ಡೌನ್‌ಲೋಡ್ ಮಿತಿ ಹೆಚ್ಚಳ

ಆ್ಯಪಲ್ ಐಫೋನ್ ಮತ್ತು ಐಪ್ಯಾಡ್ ಬಳಕೆದಾರರಿಗೆ ಸಮಸ್ಯೆಯಾಗುತ್ತಿದ್ದ ಆ್ಯಪ್‌ಸ್ಟೋರ್‌ನ ಆ್ಯಪ್ ಡೌನ್‌ಲೋಡ್ ಮಿತಿಯನ್ನು ಆ್ಯಪಲ್ ಹೆಚ್ಚಳ ಮಾಡಿದೆ.

ಐಫೋನ್ ಮತ್ತು ಐಪ್ಯಾಡ್ ಬಳಕೆದಾರರು ಯಾವುದೇ ಆ್ಯಪ್ ಅನ್ನು ಡೌನ್‌ಲೋಡ್ ಅಥವಾ ಅಪ್‌ಡೇಟ್ ಮಾಡಬೇಕಿದ್ದರೆ, ಆ್ಯಪ್‌ ಸ್ಟೋರ್‌ನಲ್ಲಿ ಮೊಬೈಲ್ ಡೇಟಾಗೆ 150 ಎಂಬಿ ಫೈಲ್ ಗಾತ್ರ ಮಾತ್ರ ಎಂದು ನಿಗದಿಪಡಿಸಲಾಗಿತ್ತು. 150 ಎಂಬಿಗಿಂತ ಹೆಚ್ಚಿನ ಗಾತ್ರದ ಫೈಲ್ ಇದ್ದರೆ, ವೈಫೈ ಸಂಪರ್ಕದ ಮೂಲಕ ಮಾತ್ರ ಅಪ್‌ಡೇಟ್ ಇಲ್ಲವೆ ಡೌನ್‌ಲೋಡ್ ಮಾಡಬಹುದಿತ್ತು.

ಬಳಕೆದಾರರು ಇದರಿಂದ ಸಮಸ್ಯೆ ಎದುರಿಸುತ್ತಿದ್ದರು. ಹೀಗಾಗಿ ಆ್ಯಪಲ್ ಆ್ಯಪ್‌ಸ್ಟೋರ್‌ನ ಡೌನ್‌ಲೋಡ್ ಮಿತಿಯನ್ನು ಮೊಬೈಲ್ ಡೇಟಾ ಮೂಲಕ ಬಳಸುವವರಿಗೆ 150ರಿಂದ 200 ಎಂಬಿಗೆ ಹೆಚ್ಚಳ ಮಾಡಿದೆ.

ಹೀಗಾಗಿ ಬಳಕೆದಾರರು ಆ್ಯಪ್‌ಸ್ಟೊರ್‌ನಲ್ಲಿ 200 ಎಂಬಿ ವರೆಗಿನ ಫೈಲ್ ಅನ್ನು ಮೊಬೈಲ್ ಡೇಟಾ ಮೂಲಕವೇ ಅಪ್‌ಡೇಟ್ ಮತ್ತು ಡೌನ್‌ಲೋಡ್ ಮಾಡಬಹುದು. ಅದಕ್ಕಿಂತ ಹೆಚ್ಚಿನ ಗಾತ್ರದ ಫೈಲ್ ಆಗಿದ್ದರೆ, ಅದಕ್ಕೆ ವೈಫೈ ಬಳಸಬೇಕಿದೆ.