iPhone Sales: ಆ್ಯಪಲ್ ಗಳಿಸಿದ ಆದಾಯವೆಷ್ಟು ಗೊತ್ತಾ?

ಆ್ಯಪಲ್ ತ್ರೈಮಾಸಿಕ ವರದಿಯನ್ನು ಪ್ರಕಟಿಸಿದ್ದು, ಅದರ ಪ್ರಕಾರ ಒಟ್ಟಾರೆ 91.8 ಬಿಲಿಯನ್ ಡಾಲರ್ (ಅಂದಾಜು 65,55,48,39,00,000 ರೂ.) ಆದಾಯ ಗಳಿಸಿದೆ. ಇದು ಈವರೆಗಿನ ಗರಿಷ್ಠ ಮತ್ತು ಅತಿ ಕಡಿಮೆ ಅವಧಿಯಲ್ಲಿ ಗಳಿಸಿದ ಆದಾಯ ಎಂದು ಆ್ಯಪಲ್ ಹೇಳಿದೆ. ಕಳೆದ ವರ್ಷ ಇದೇ ಅವಧಿಗೆ ಹೋಲಿಸಿದರೆ, ಆ್ಯಪಲ್ ಆದಾಯದಲ್ಲಿ ಶೇ. 9 ಏರಿಕೆ ದಾಖಲಾಗಿದೆ.

ಆ್ಯಪಲ್ ಕಂಪನಿಯ ಜನಪ್ರಿಯ ಐಫೋನ್ ಮಾರಾಟದಿಂದ ಹೆಚ್ಚಿನ ಆದಾಯ ಬರುತ್ತಿದೆ. ಒಟ್ಟಾರೆ ಮಾರಾಟದಲ್ಲಿ ಶೇ. 61 ಪಾಲು ಆದಾಯವನ್ನು ಐಫೋನ್ ತಂದುಕೊಟ್ಟಿದೆ. ಪ್ರಸಕ್ತ ತ್ರೈಮಾಸಿಕದಲ್ಲಿ ಐಫೋನ್ ಮಾರಾಟದಿಂದ ಆ್ಯಪಲ್ ಒಟ್ಟು 55.8 ಬಿಲಿಯನ್ ಡಾಲರ್ (ಸುಮಾರು 39,84,62,22,00,000 ರೂ.) ಆದಾಯ ಗಳಿಸಿದೆ.

ಆ್ಯಪಲ್ ಕಂಪನಿಯ ಐಫೋನ್ ಮಾರಾಟ ದೇಶದಲ್ಲಿ ಹೆಚ್ಚಳವಾಗಿದೆ. ಐಫೋನ್ 11 ಸರಣಿ ಹೆಚ್ಚು ಜನಪ್ರಿಯವಾಗಿದ್ದು, ಅದರಲ್ಲಿ ಐಫೋನ್ 11, 11 ಪ್ರೊ ಮತ್ತು 11 ಪ್ರೊ ಮ್ಯಾಕ್ಸ್ ಎಂಬ ಮೂರು ಮಾದರಿಗಳು ಲಭ್ಯವಿದೆ. ಅದರಲ್ಲೂ ಐಫೋನ್ 11 ಅತ್ಯಧಿಕ ಸಂಖ್ಯೆಯಲ್ಲಿ ಮಾರಾಟವಾಗಿದ್ದು, ಆ್ಯಪಲ್ ದೇಶದಲ್ಲಿ ಎರಡಂಕಿಯ ಬೆಳವಣಿಗೆ ದಾಖಲಿಸಿದೆ.

ಆ್ಯಪಲ್ ಫಿಟ್ನೆಸ್ ಮತ್ತು ಸ್ಮಾರ್ಟ್‌ವಾಚ್ ಸರಣಿಯಲ್ಲಿ ಹೊರತಂದಿರುವ ವಾಚ್ ಪ್ರಸ್ತುತ ಸಿರೀಸ್ 5 ಮಾದರಿಯಲ್ಲಿ ಲಭ್ಯವಿದೆ. ಅದರಲ್ಲೂ ಏರ್‌ಪಾಡ್ಸ್ ಮಾರಾಟ ಮತ್ತು ವಾಚ್ ಮಾರಾಟದಲ್ಲಿ ಆ್ಯಪಲ್ ಪ್ರತಿಸ್ಪರ್ಧಿ ಕಂಪನಿಗಳಿಂದ ತೀರಾ ಮುಂದಿದೆ. ಏರ್‌ಪಾಡ್ಸ್ ಮತ್ತು ವಾಚ್ ಸೇಲ್ಸ್ ಮೂಲಕ ಆ್ಯಪಲ್ ಸುಮಾರು 10 ಬಿಲಿಯನ್ ಡಾಲರ್ (ಅಂದಾಜು 7,14,37,50,00,000 ರೂ.) ಆದಾಯ ಗಳಿಸಿದೆ. ಅಂದರೆ ಈ ಮೊತ್ತ ಆ್ಯಪಲ್ ಮ್ಯಾಕ್‌ಬುಕ್‌ ಮಾರಾಟದಿಂದ ಗಳಿಸುವ ಮೊತ್ತಕ್ಕೂ ಅಧಿಕ ಎನ್ನುವುದು ಗಮನಾರ್ಹ. ಜತೆಗೆ ಆ್ಯಪಲ್ ಒಟ್ಟಾರೆ ಆದಾಯದಲ್ಲಿ ವಾಚ್ ಮಾರಾಟದ ಪಾಲು ಶೇ. 10 ಇದೆ.

ಮಾರುಕಟ್ಟೆಯಲ್ಲಿ ವಿವಿಧ ಫಿಟ್ನೆಸ್ ಗ್ಯಾಜೆಟ್ ಮತ್ತು ಸ್ಮಾರ್ಟ್‌ವಾಚ್, ಸ್ಮಾರ್ಟ್‌ಬ್ಯಾಂಡ್ ಇದ್ದರೂ, ಜನರು ಆ್ಯಪಲ್ ವಾಚ್‌ ಅನ್ನು ಬಯಸುತ್ತಿದ್ದಾರೆ. ಮೊದಲ ಬಾರಿಗೆ ಆ್ಯಪಲ್ ವಾಚ್ ಕೊಳ್ಳುವವರ ಸಂಖ್ಯೆ ಶೇ. 75 ಎನ್ನುವುದನ್ನು ಆ್ಯಪಲ್ ಈ ಬಾರಿಯ ಮಾರಾಟ ವರದಿಯಲ್ಲಿ ಪ್ರಸ್ತಾಪಿಸಿದೆ. ಅಂದರೆ ಪ್ರಸ್ತುತ ತ್ರೈಮಾಸಿಕದಲ್ಲಿ ಆ್ಯಪಲ್ ವಾಚ್ ಕೊಂಡವರ ಪೈಕಿ ಶೇ. 75 ಮಂದಿ ಮೊದಲ ಬಾರಿಗೆ ಆ್ಯಪಲ್ ಉತ್ಪನ್ನ ಬಳಸುತ್ತಿರುವವರಾಗಿದ್ದಾರೆ.

ಆ್ಯಪಲ್ ಕಂಪನಿಯ ಜನಪ್ರಿಯ ಮ್ಯಾಕ್‌ಬುಕ್ ಮತ್ತು ಐಪ್ಯಾಡ್ ಕೂಡ ಗರಿಷ್ಠ ಸಂಖ್ಯೆಯಲ್ಲಿ ಮಾರಾಟವಾಗುತ್ತಿದೆ. ಮ್ಯಾಕ್‌ಬುಕ್‌ನ ವಿವಿಧ ಮಾದರಿಗಳ ಮಾರಾಟದಿಂದ ಆ್ಯಪಲ್ 7.2 ಬಿಲಿಯನ್ ಡಾಲರ್ ಗಳಿಸಿದ್ದರೆ, ಐಪ್ಯಾಡ್ ಮಾರಾಟದಿಂದ ಆ್ಯಪಲ್‌ಗೆ 6 ಬಿಲಿಯನ್ ಡಾಲರ್ ಆದಾಯ ಬಂದಿದೆ. ಆ್ಯಪಲ್ ಸಿಇಒ ಪ್ರಕಾರ ಭಾರತದಲ್ಲಿ ಈ ಬಾರಿ ಆ್ಯಪಲ್ ಐಪ್ಯಾಡ್‌ಗೆ ಬೇಡಿಕೆ ಕುದುರಿದೆ. ಅಲ್ಲದೆ ಒಟ್ಟಾರೆಯಾಗಿ ಆ್ಯಪಲ್ ಜಾಗತಿಕ ಬಳಕೆದಾರರ ಸಂಖ್ಯೆ 150 ಕೋಟಿ ಇದೆ.