​4.5 ಕೋಟಿಗೆ ಹರಾಜಾಯ್ತು 45 ವರ್ಷದ ಹಳೆಯ ಆಪಲ್-1 ಕಂಪ್ಯೂಟರ್!

ಆಪಲ್ ಕಂಪನಿಯ ಸಂಸ್ಥಾಪಕರಾದ ಸ್ಟೀವ್ ಜಾಬ್ಸ್ ಜೊತೆ ಸೇರಿಕೊಂಡು ಸ್ಟೀವ್ ವೋಜ್ನಿಯಾಕ್ ಅವರು ತಮ್ಮ ಕೈಯಿಂದ ನಿರ್ಮಿಸಿದ ಆಪಲ್ ಕಂಪ್ಯೂಟರ್ ಒಂದು ಬರೋಬ್ಬರಿ 4.5 ಕೋಟಿ ರೂ. ಬೆಲೆಗೆ ಮಾರಾಟವಾಗಿದೆ.! ಯುನೈಟೆಡ್ ಸ್ಟೇಟ್ಸ್‌ನ (United States) ಕ್ಯಾಲಿಫೋರ್ನಿಯಾದ ಮನ್ರೋವಿಯಾದಲ್ಲಿ ಮಂಗಳವಾರ ಹರಾಜಿಗೆ ಇಡಲಾಗಿದ್ದ ಈ ಅತಿ ಅಪರೂಪದ ಆಪಲ್ ಕಂಪ್ಯೂಟರ್ ಅನ್ನು ಹರಾಜಿನಲ್ಲಿ $400,000 ಡಾಲರ್, ಅಂದರೆ 4.5 ಕೋಟಿ ರೂ. ಗಳಿಗೆ ಖರೀದಿಸಲಾಗಿದ್ದು, "ಇದು ವಿಂಟೇಜ್ ಎಲೆಕ್ಟ್ರಾನಿಕ್ಸ್ ಮತ್ತು ಕಂಪ್ಯೂಟರ್ ಟೆಕ್ ಕಲೆಕ್ಟರ್‌ಗಳಿಗೆ ಕುತೂಹಲದ ವಿಷಯವಾಗಿದೆ" ಎಂದು ಟೆಕ್ ಪರಿಣಿತ ಕೋರೆ ಕೊಹೆನ್ ಅವರು ಅಭಿಪ್ರಾಯಪಟ್ಟಿದ್ದಾರೆ.

ಹೌದು, "ಚಾಫಿ ಕಾಲೇಜ್" ಆಪಲ್-1 ಎಂದು ಕರೆಯಲ್ಪಡುವ ಕಂಪ್ಯೂಟರ್ ಈ ದುಬಾರಿ ಮೊತ್ತಕ್ಕೆ ಹರಾಜಾಗಿದ್ದು, ಅಪರೂಪದ ಮತ್ತು ಹೆಚ್ಚು ದುಬಾರಿಯಾದ ಕೋವಾ ಮರದಲ್ಲಿ ಸುತ್ತುವರಿದ ಆರು ಮಾದರಿಗಳಲ್ಲಿ ಒಂದಾಗಿದ್ದ ಈ ಆಪಲ್-1 ಕಂಪ್ಯೂಟರ್ ಅಚ್ಚರಿ ಮೂಡಿಸದೆ. 45 ವರ್ಷದ ಹಳೆದಾಗಿರುವ ಈ ಕಂಪ್ಯೂಟರ್ ಪ್ಯಾನಾಸೋನಿಕ್ ವೀಡಿಯೋ ಮಾನಿಟರ್, Apple-1 ಮೂಲ ಕೈಪಿಡಿ ಮತ್ತು ಕಾರ್ಯಾಚರಣೆಗಳ ಮಾರ್ಗದರ್ಶಿಯ ನಕಲು, ಮೂಲ ಪ್ರೋಗ್ರಾಮಿಂಗ್ ಕೈಪಿಡಿ, ಮತ್ತು ಎರಡು Apple-1 ಸಾಫ್ಟ್‌ವೇರ್ ಕ್ಯಾಸೆಟ್ ಟೇಪ್‌ಗಳು ಮತ್ತು ಮೂರು ಮೂಲ ವೀಡಿಯೊ, ವಿದ್ಯುತ್ ಮತ್ತು ಕ್ಯಾಸೆಟ್ ಇಂಟರ್ಫೇಸ್ ಕೇಬಲ್‌ಗಳನ್ನು ಹೊಂದಿರುವ ಈ ಕಂಪ್ಯೂಟರ್ ಇದೀಗ ಟೆಕ್ ಲೋಕದ ಗಮನಸೆಳೆದಿದೆ.

ಈ "ಚಾಫಿ ಕಾಲೇಜ್" ಆಪಲ್-1 ಬಹಳ ವಿಶೇಷ ಹಿನ್ನಲೆ ಹೊಂದಿದ್ದು,. ಜಾಬ್ಸ್ ಮತ್ತು ವೋಜ್ನಿಯಾಕ್ ಒಡಿಸ್ಸಿಯ ಪ್ರಾರಂಭದಲ್ಲಿ ಗ್ಯಾರೇಜ್ ಪ್ರಾರಂಭಿಸಿದಾಗ ತಯಾರಿಸಿದ ಕಂಪ್ಯೂಟರ್ ಇದಾಗಿದೆ. ಹಾಗೂ ಈ ಬೃಹತ್ ಮೊತ್ತಕ್ಕೆ ಹರಾಜಾದ ಕಂಪ್ಯೂಟರ್ ಅನ್ನು "ಚಾಫಿ ಕಾಲೇಜ್" ಎಂದು ಕರೆಯುವುದಕ್ಕೆ ಕಾರಣವೂ ಇದ್ದೂ, ಈ ಆಪಲ್-1 ಅದರ ಮೂಲ ಮಾಲೀಕರು ಕ್ಯಾಲಿಫೋರ್ನಿಯಾದ ರಾಂಚೊ ಕುಕಮೊಂಗಾದಲ್ಲಿರುವ ಚಾಫಿ ಕಾಲೇಜಿನಲ್ಲಿ ಪ್ರಾಧ್ಯಾಪಕರಾಗಿದ್ದರು. ನಂತರ ಅವರು ಆಪಲ್-II ಕಂಪ್ಯೂಟರ್ ಖರೀದಿಸಲು 1977 ರಲ್ಲಿ ಕಂಪ್ಯೂಟರ್ ಅನ್ನು ತನ್ನ ವಿದ್ಯಾರ್ಥಿಗೆ ಮಾರಾಟ ಮಾಡಿದರು. ಅಚ್ಚರಿಯ ವಿಚಾರವೆಂದರೆ, ಈ ಕಂಪ್ಯೂಟರ್ ಕೇವಲ ಇಬ್ಬರು ಮಾಲೀಕರನ್ನು ಹೊಂದಿದೆ ಎಂದು ಹರಾಜುದಾರರು ಹೇಳಿದ್ದಾರೆ.
WhatsAppನಲ್ಲಿ 5 ಕ್ಕಿಂತ ಹೆಚ್ಚು ಜನರಿಗೆ ಮೆಸೇಜ್ ಫಾರ್ವರ್ಡ್ ಮಾಡುವ ಟ್ರಿಕ್ ಇಲ್ಲಿದೆ!
ಇನ್ನು ಲಾಸ್ ಏಂಜಲೀಸ್ ಟೈಮ್ಸ್ ಪ್ರಕಾರ, ಇದು ಇನ್ನೂ ಅಸ್ತಿತ್ವದಲ್ಲಿರುವ ಸುಮಾರು 60 Apple-1 ಘಟಕಗಳಲ್ಲಿ ಒಂದಾಗಿದೆ ಮತ್ತು ಇನ್ನೂ ಕಾರ್ಯನಿರ್ವಹಿಸುತ್ತಿರುವ 20 ಘಟಕಗಳಲ್ಲಿ ಒಂದಾಗಿದೆ. ಆದರೆ, ಈಗ ಹರಾಜಾಗಿರುವ ಈ "ಚಾಫಿ ಕಾಲೇಜ್" ಹೆಸರಿನ ಆಪಲ್-1 ಕಂಪ್ಯೂಟರ್ ಅತಿ ಹೆಚ್ಚು ಗಳಿಸಿದ Apple-1 ಕಂಪ್ಯೂಟರ್ ಅಲ್ಲ. ಏಕೆಂದರೆ, 2014 ರಲ್ಲಿ ನ್ಯೂಯಾರ್ಕ್‌ನಲ್ಲಿ ನಡೆದ ಬೋನ್‌ಹ್ಯಾಮ್ಸ್ ಹರಾಜಿನಲ್ಲಿ ಆಪಲ್-1 ಕಂಪ್ಯೂಟರ್ ಒಂದು $905,000 ಕ್ಕೆ ಮಾರಾಟವಾವಾಗಿತ್ತು. 2014 ರಲ್ಲಿ ಆಪಲ್ ಉತ್ಪನ್ನಗಳ ಬಗ್ಗೆ ಇದ್ದ ಕುತೋಹಲ ಮತ್ತು ಪ್ರಚಾರವು ಈ ಬೆಲೆಯನ್ನು ನೀಡಿತ್ತು ಎಂದು ಮಾಧ್ಯಮಗಳು ಅಭಿಪ್ರಾಯಪಟ್ಟಿವೆ.