ನೀವು ಇಂಟರ್‌ನೆಟ್ಟನ್ನು ಸಿಕ್ಕಾಪಟ್ಟೆ ಬಳಸುವವರಾದರೆ, ನಿಮ್ಮ ಸಂಪೂರ್ಣ ಡಿಜಿಟಲ್‌ ಪ್ರೊಫೈಲ್‌ ಈಗಾಗಲೇ ಹಲವಾರು ಟ್ರ್ಯಾಕಿಂಗ್‌ ಕಂಪನಿಗಳ ಬಳಿ ಸಿದ್ಧವಾಗಿರುತ್ತದೆ.
ನಿಮ್ಮ ಹೆಸರು, ಲಿಂಗ, ಚಹರೆ, ಧರ್ಮ, ನಂಬಿಕೆ, ರಾಜಕೀಯ ನಿಲುವು, ಆರೋಗ್ಯ, ಲೈಂಗಿಕ ಆಯ್ಕೆ, ಅಂತರ್ಜಾಲ ಹಿಸ್ಟರಿ, ಲೊಕೇಶನ್‌, ಸಂಪರ್ಕಗಳು, ಸೋಶಿಯಲ್‌ ಮೀಡಿಯಾ ಚಟುವಟಿಕೆ, ಹಣಕಾಸಿನ ಸ್ಥಿತಿ, ಬಯೋಮೆಟ್ರಿಕ್‌ ಮಾಹಿತಿ ಇವೆಲ್ಲವೂ ಅವುಗಳಿಗೆ ಗೊತ್ತು. ನಾವು ಸ್ಮಾರ್ಟ್‌ಫೋನ್‌ಗಳಲ್ಲಿ ಬಳಸುವ ಹತ್ತರಲ್ಲಿ 7 ಆ್ಯಪ್‌ಗಳು ತಮಗೆ ಲಭ್ಯವಾದ ನಿಮ್ಮ ಡೇಟಾವನ್ನು ಗೂಗಲ್‌ ಅನಾಲಿಟಿಕ್ಸ್‌ನಂಥ ಟ್ರ್ಯಾಕಿಂಗ್‌ ಕಂಪನಿಗಳಿಗೆ ಮಾರಿಕೊಳ್ಳುತ್ತಿವೆ.
ಹೆಚ್ಚಿನ ಕಂಪನಿಗಳು ಈ ಮಾಹಿತಿ ಪಡೆದು ತಮ್ಮ ಉತ್ಪನ್ನಗಳನ್ನು ನಿಮಗೆ ಮಾರಲು ಯತ್ನಿಸುತ್ತವೆ. ಇದೆಲ್ಲ ನಮ್ಮ ಅರಿವು, ಒಪ್ಪಿಗೆ, ನಿಯಂತ್ರಣವಿಲ್ಲದೆ ಆಗುತ್ತಿದೆ ಎಂಬುದು ಮಾತ್ರ ಆತಂಕಕಾರಿ. ನೀವು ಮಾಡಿದ ಮೂರ್ನಾಲ್ಕು ಕರೆಗಳ ಆಧಾರದಲ್ಲಿ, ನಿಮಗೊಂದು ಆರೋಗ್ಯ ಸಮಸ್ಯೆಯಿದೆ ಎಂಬುದನ್ನು ಪತ್ತೆಹಚ್ಚಬಹುದು. ನಿಮಗೆ ಕೆಲಸ ಕೊಡಲಿರುವ ಕಂಪನಿ ಈ ಮಾಹಿತಿಯನ್ನು ಪಡೆದರೆ, ಆಗ ನಿಮ್ಮ ಗತಿಯೇನು? ಊಹಿಸಿ.