ಜುಲೈ ತಿಂಗಳಲ್ಲಿ ಏಸಸ್‌ ರೋಗ್ ಫೋನ್ 2 ಬಿಡುಗಡೆ: ಕಂಪನಿ ಸ್ಪಷ್ಟನೆ

ಹೊಸದಿಲ್ಲಿ: ತೈವಾನ್ ಮೂಲದ ಸ್ಮಾರ್ಟ್‌ಫೋನ್‌ ಏಸಸ್‌ ಮುಂದಿನ ಪೀಳಿಗೆಯ ಗೇಮಿಂಗ್ ಸ್ಮಾರ್ಟ್‌ಫೋನ್‌ ಅನ್ನು ಶೀಘ್ರದಲ್ಲೇ ಬಿಡುಗಡೆ ಮಾಡಲಿದೆ. ಜುಲೈ ತಿಂಗಳಲ್ಲಿ ಏಸಸ್‌ ರೋಗ್ ಫೋನ್ 2 ಅನ್ನು ಬಿಡುಗಡೆಗೊಳಿಸುವುದಾಗಿ ಕಂಪನಿ ಸ್ಪಷ್ಟಪಡಿಸಿದೆ.

ಚೀನಾದ ಟೆನ್ಸೆಂಟ್‌ ಗೇಮ್ಸ್‌ನ ಪಾಲುದಾರಿಕೆಯೊಂದಿಗೆ ಸ್ಮಾರ್ಟ್‌ಫೋನ್‌ ಬಿಡುಗಡೆಗೊಳಿಸುವುದಾಗಿಯೂ ತಿಳಿಸಿದೆ. ಈ ಮೂಲಕ ಬಳಕೆದಾರರಿಗೆ ಆಳವಾದ ಗೇಮಿಂಗ್ ಕಂಟೆಂಟ್‌ ಅನ್ನು ನೀಡುವುದು ಅವರ ಉದ್ದೇಶ ಎಂದು ತಿಳಿದುಬಂದಿದೆ.

ಈ ಸ್ಮಾರ್ಟ್‌ಫೋನ್‌ ಕ್ವಾಲ್ಕಂ ಸ್ನ್ಯಾಪ್‌ಡ್ರ್ಯಾಗನ್ 855 ಪ್ರೊಸೆಸರ್ ಹೊಂದಿದ್ದು, 10 ಜಿಬಿ ಅಥವಾ 12 ಜಿಬಿ ರ‍್ಯಾಮ್ ಇದೆ ಎನ್ನಲಾಗಿದೆ. ಅಲ್ಲದೆ, 512ಜಿಬಿ ಆಂತರಿಕ ಶೇಖರಣೆ ಇದೆ ಎಂದೂ ಹೇಳಲಾಗುತ್ತಿದೆ.

ಅಲ್ಲದೆ, ಏಸಸ್‌ ಸ್ಮಾರ್ಟ್‌ಫೋನ್‌ ಉತ್ತಮ ಗೇಮ್‌ ಕೂಲ್‌ ವ್ಯವಸ್ಥೆಯೊಂದಿಗೆ ಬರಲಿದ್ದು, ಜತೆಗೆ, ಉತ್ತಮ ಕ್ಯಾಮೆರಾ, ಉತ್ತಮ ಬ್ಯಾಟರಿಯೊಂದಿಗೆ ವೇಗವಾಗಿ ಚಾರ್ಜ್ ಆಗುವ ಸೌಲಭ್ಯವಿರಲಿದೆ ಎಂಬ ಊಹಾಪೋಹಗಳು ಸಹ ಇವೆ.