WhatsApp 10ನೇ ಹುಟ್ಟುಹಬ್ಬಕ್ಕೆ 1000GB ಇಂಟರ್ನೆಟ್ ಫ್ರೀ ಎಂಬ ಸಂದೇಶದಲ್ಲಿ ಏನಿದೆ?

ವಾಟ್ಸ್ಆ್ಯಪ್ ಕಿರು ತಂತ್ರಾಂಶದ ಜನಪ್ರಿಯತೆಗೆ ಎಣೆಯಿಲ್ಲ. ಸಂವಹನದ ಮೂಲ ಮಾಧ್ಯಮವಾಗಿ ವಾಟ್ಸ್ಆ್ಯಪ್ ಇಂದು ಜಗತ್ತಿನ ಕೋಟ್ಯಂತರ ಮಂದಿ ಬಳಕೆದಾರರ ಆದ್ಯತೆಯಾಗಿದೆ. ಹೀಗಿರುವಾಗ ವಂಚಕರು ಇಲ್ಲೂ ತಮ್ಮ ಕೈಚಳಕ ಪ್ರದರ್ಶಿಸುತ್ತಲೇ ಬಂದಿದ್ದಾರೆ. ಇದರ ಹೆಸರಿನಲ್ಲಿ ಪ್ರತಿದಿನವೂ ಸಾವಿರಾರು ನಕಲಿ ಸಂದೇಶಗಳು ಹರಿದಾಡುತ್ತಿವೆ. ಅದನ್ನು ಓದಿದ್ದೀರಿ. ಈಗ ಹೊಸದೊಂದು ವಂಚನೆ ಬಯಲಾಗಿದೆ. ವಾಟ್ಸ್ಆ್ಯಪ್ ತನ್ನ ಬಳಕೆದಾರರಿಗೆ 1000 ಜಿಬಿ ಡೇಟಾವನ್ನು ಉಚಿತವಾಗಿ ನೀಡುತ್ತಿದೆ ಎಂಬ ಸಂದೇಶ ಈಗ ಹೊಸತು.

ವಾಟ್ಸ್ಆ್ಯಪ್ 1000 GB ಇಂಟರ್ನೆಟ್ ಡೇಟಾವನ್ನು ಉಚಿತವಾಗಿ ನೀಡುತ್ತಿದೆ. ಕ್ಲಿಕ್ ಮಾಡಿ ಎಂಬ ಒಕ್ಕಣೆಯುಳ್ಳ ಸಂದೇಶ ನಿಮಗೂ ಬಂದರೆ ಅದನ್ನು ಕ್ಲಿಕ್ ಮಾಡಲೇಬೇಡಿ.

ಲಿಂಕ್ ಕ್ಲಿಕ್ ಮಾಡಿದಿರಿ ಎಂದಾದರೆ, ವಾಟ್ಸ್ಆ್ಯಪ್ ಲೋಗೋ ಇರುವ ಒಂದು ಪುಟ ನಿಮಗೆ ಕಾಣಿಸುತ್ತದೆ. "ವೈಫೈ ಇಲ್ಲದೆಯೇ 1000 ಜಿಬಿ ಇಂಟರ್ನೆಟ್ ಉಚಿತವಾಗಿ ನೀಡುತ್ತೇವೆ. ಇದು ನಮ್ಮ ವಾಟ್ಸ್ಆ್ಯಪ್‌ನ 10ನೇ ವರ್ಷಾಚರಣೆಯ ಕೊಡುಗೆ" ಎಂಬ ಸಂದೇಶ ಅದರಲ್ಲಿರುತ್ತದೆ.

ಕೆಲವೇ ಕೆಲವು ಪ್ಯಾಕ್‌ಗಳು ಬಾಕಿ ಇವೆ. ತ್ವರೆ ಮಾಡಿ ಅಂತಲೂ ನಿಮ್ಮನ್ನು ಪ್ರಚೋದಿಸಲಾಗುತ್ತದೆ. ಬಳಿಕ ನಿಮಗೆ ಕೆಲವು ಪ್ರಶ್ನೆಗಳೂ ಇರುತ್ತವೆ. ಈ ಕೊಡುಗೆಯ ಬಗ್ಗೆ ಹೇಗೆ ತಿಳಿಯಿತು ಎಂದು ಕೇಳಲಾಗುತ್ತದೆ ಮತ್ತು ಉತ್ತರಗಳ ಬಟನ್ ಕ್ಲಿಕ್ ಮಾಡಬೇಕಾಗುತ್ತದೆ. ಇವು ಸಂಶಯಾಸ್ಪದ ಲಿಂಕ್‌ಗಳಾಗಿದ್ದು ಕ್ಲಿಕ್ ಮಾಡಬೇಡಿ. ಉತ್ತರಿಸಿದ ಬಳಿಕ, ಇದನ್ನು 30 ಮಂದಿಗೆ ಶೇರ್ ಮಾಡಿದರೆ 1000 ಜಿಬಿ ಇಂಟರ್ನೆಟ್ ಪ್ಯಾಕ್ ಉಚಿತವಾಗಿ ಸಿಗುತ್ತದೆ ಎಂಬ ಸಂದೇಶವೊಂದು ಕಾಣಿಸುತ್ತದೆ.

ಇದನ್ನು ಕ್ಲಿಕ್ ಫ್ರಾಡ್ ಎಂದು ಕರೆಯಲಾಗುತ್ತದೆ. ಇದನ್ನು ಕ್ಲಿಕ್ ಮಾಡಿದರೆ ನಷ್ಟ ಆಗುವುದಿಲ್ಲವಾದರೂ, ನಮ್ಮ ಫೋನ್‌ನ ವೈಯಕ್ತಿಕ ಮಾಹಿತಿಯ ಗೌಪ್ಯತೆಯು ಅಪಾಯಕ್ಕೀಡಾಗಬಲ್ಲುದು. ಇದುವರೆಗೆ ಯಾವುದೇ ಕುತಂತ್ರಾಂಶ (ಮಾಲ್‌ವೇರ್) ಇದರಲ್ಲಿ ಪತ್ತೆಯಾಗಿಲ್ಲವಾದರೂ, ನಮ್ಮ ಸುರಕ್ಷತೆ ನಮ್ಮ ಕೈಯಲ್ಲಿದೆ ಎನ್ನುತ್ತಾರೆ ತಜ್ಞರು. ಇದು ನಕಲಿ ಸಂದೇಶ ಎಂದೂ ಅವರು ಸ್ಪಷ್ಟಪಡಿಸುತ್ತಾರೆ.

ಇದೇ ರೀತಿಯಲ್ಲಿ ಉಚಿತ ಅಡಿಡಾಸ್ ಶೂ, ಉಚಿತ ಪಿಜ್ಜಾ ಇತ್ಯಾದಿ ಸ್ಕ್ಯಾಮ್‌ಗಳು ಈ ಹಿಂದೆಯೂ ಬಯಲಾಗಿದ್ದವು.