International Roaming: ಭಾರ್ತಿ ಏರ್‌ಟೆಲ್, ವೊಡಾಫೋನ್ ಐಡಿಯಾ ದರ ಏರಿಕೆ

ದೇಶದ ಟೆಲಿಕಾಂ ಮಾರುಕಟ್ಟೆಗೆ ರಿಲಯನ್ಸ್ ಜಿಯೋ ಲಗ್ಗೆಇಟ್ಟ ಬೆನ್ನಲ್ಲೇ ದರಸಮರಕ್ಕೆ ನಾಂದಿ ಹಾಡಿದ್ದ ಭಾರ್ತಿ ಏರ್‌ಟೆಲ್ ಮತ್ತು ವೊಡಾಫೋನ್ ಐಡಿಯಾ, ಅಂತಾರಾಷ್ಟ್ರೀಯ ರೋಮಿಂಗ್ ದರದಲ್ಲಿ ಶೇ. 25 ಏರಿಕೆ ಮಾಡಿವೆ.

ನಷ್ಟ ಸರಿತೂಗಿಸಲು ಮತ್ತು ಹೆಚ್ಚಿನ ಆದಾಯ ಗಳಿಕೆಯ ಉದ್ದೇಶದಿಂದ ರೋಮಿಂಗ್ ಪ್ಯಾಕ್ ದರದಲ್ಲಿ ಬದಲಾವಣೆ ಮಾಡಿದ್ದು, ಗ್ರಾಹಕರಿಗೆ ಹೊರೆಯಾಗಲಿದೆ.

ಏರ್‌ಟೆಲ್ ಮತ್ತು ವೊಡಾಫೋನ್ ಐಡಿಯಾ ದರ ಏರಿಕೆಯ ಲಾಭವನ್ನು ಸಿಮ್‌ ಕಾರ್ಡ್‌ ವಿತರಕ ಸಂಸ್ಥೆ ಮ್ಯಾಟ್ರಿಕ್ಸ್ ಪಡೆದುಕೊಳ್ಳುವ ನಿರೀಕ್ಷೆಯಿದ್ದು, ವಿದೇಶಕ್ಕೆ ತೆರಳುವ ಗ್ರಾಹಕರಿಗೆ ಏರ್‌ಟೆಲ್ ಮತ್ತು ವೊಡಾಫೋನ್ ಐಡಿಯಾ ನೀಡುವ ರೋಮಿಂಗ್ ಪ್ಯಾಕ್‌ಗಿಂತ ಕಡಿಮೆ ದರದಲ್ಲಿ ದರನಿಗದಿ ಪಡಿಸಿ ಪ್ಯಾಕೇಜ್ ನೀಡಲಿದೆ.

ವೊಡಾಫೋನ್ ಅಂತಾರಾಷ್ಟ್ರೀಯ ರೋಮಿಂಗ್ ಪ್ಲ್ಯಾನ್ 500 ರೂ., 2,500 ರೂ., 3,500 ರೂ., ಮತ್ತು 5,500 ರೂ. ಇದ್ದಿದ್ದು ಕ್ರಮವಾಗಿ 599 ರೂ., 2,999 ರೂ., 3,999 ರೂ., ಮತ್ತು 5,999 ರೂ.ಗೆ ಏರಿಕೆಯಾಗಿದೆ.

ಏರ್‌ಟೆಲ್ ಪ್ರಸ್ತುತ ರೋಮಿಂಗ್ ಪ್ಯಾಕೇಜ್ ದರದಲ್ಲಿ ಶೇ. 25 ಏರಿಕೆ ಮಾಡಿದ್ದು, 1,499 ರೂ. ಆಗಿದೆ. ಅಮೆರಿಕ, ಇಂಗ್ಲೆಂಡ್, ಯುರೋಪ್ ಮತ್ತು ಇಂಡೋನೇಷ್ಯಾ ಮತ್ತು ಯುಎಇ ಪ್ಯಾಕೇಜ್‌ನಲ್ಲಿ ಶೇ. 20 ಏರಿಕೆಯಾಗಿದ್ದು, 3,599 ರೂ. ಆಗಿದೆ.