Airtel 5G: ನೋಯ್ಡಾದಲ್ಲಿ ನೆಟ್‌ವರ್ಕ್ ಪರಿಶೀಲನೆ

ದೇಶದ ಎರಡನೇ ಅತಿದೊಡ್ಡ ನೆಟ್‌ವರ್ಕ್ ಜಾಲ ಏರ್‌ಟೆಲ್ ಫಿನ್ಲೆಂಡ್ ಮೂಲದ ನೋಕಿಯಾ ಸಹಯೋಗದಲ್ಲಿ 5G ನೆಟ್‌ವರ್ಕ್‌ ಒದಗಿಸಲು ಮುಂದಾಗಿದೆ.

ನೋಯ್ಡಾದಲ್ಲಿ ಭಾರ್ತಿ ಏರ್‌ಟೆಲ್ ಮತ್ತು ನೋಕಿಯಾ ಜಂಟಿಯಾಗಿ 5G ನೆಟ್‌ವರ್ಕ್ ಅನ್ನು ಅಳವಡಿಸಿ, ಪರೀಕ್ಷಾರ್ಥ ಬಳಕೆ ಮಾಡಲಿವೆ. ದೇಶದಲ್ಲಿ ಡಿಜಿಟಲ್ ಕ್ರಾಂತಿ ಮತ್ತು 5G ನೆಟ್‌ವರ್ಕ್, ಡೇಟಾ ಕ್ಷೇತ್ರದಲ್ಲಿನ ಅಪಾರ ಬೇಡಿಕೆಗೆ ಅನುಗುಣವಾಗಿ ಅತಿವೇಗದ ನೆಟ್‌ವರ್ಕ್ ಪೂರೈಕೆಗೆ ಏರ್‌ಟೆಲ್ ಮುಂದಡಿಯಿರಿಸಿದೆ.

ಪ್ರಸ್ತುತ 4G ನೆಟ್‌ವರ್ಕ್ ಬಳಕೆಯಲ್ಲಿ ಏರ್‌ಟೆಲ್ ದೇಶದಲ್ಲೇ ಅತಿ ವೇಗದ ನೆಟ್‌ವರ್ಕ್ ಎಂಬ ಪ್ರಶಂಸೆಗೆ ಪಾತ್ರವಾಗಿದೆ. ನೆಟ್‌ವರ್ಕ್ ಅಪ್‌ಗ್ರೇಡ್ ಮತ್ತು ಮೊಬೈಲ್ ಬ್ರಾಡ್‌ಬ್ಯಾಂಡ್ ಸೇವೆಯ ಜತೆಗೆ ವಿಶ್ವದರ್ಜೆಯ ಡಿಜಿಟಲ್ ಸೇವೆಯನ್ನು ಗ್ರಾಹಕರಿಗೆ ಒದಗಿಸಲು ಏರ್‌ಟೆಲ್ ಅಗತ್ಯ ಕ್ರಮಕ್ಕೆ ಮುಂದಾಗಲಿದೆ ಎಂದು ಭಾರ್ತಿ ಏರ್‌ಟೆಲ್‌ನ ಸಿಟಿಒ ರಣ್‌ದೀಪ್ ಸೇಖೊನ್ ತಿಳಿಸಿದ್ದಾರೆ.

ಏರ್‌ಟೆಲ್‌ನ ಈಗಿನ ಡೇಟಾ ನೆಟ್‌ವರ್ಕ್ ಅಪ್‌ಗ್ರೇಡ್ ಜತೆಗೆ ಅತಿವೇಗದ 5G ನೆಟ್‌ವರ್ಕ್ ಸೇವೆ ಒದಗಿಸಲು ನೋಕಿಯಾ ಸಹಯೋಗ ನೀಡಿದ್ದು, ಪರೀಕ್ಷಾರ್ಥ ಸೇವೆ ನೀಡುತ್ತಿದೆ.

5G ನೆಟ್‌ವರ್ಕ್‌ ಒದಗಿಸುವ ನಿಗದಿತ ವೇಗ ಮತ್ತು ಇತರ ಸೌಲಭ್ಯಗಳನ್ನು ನೋಕಿಯಾ ಮೂಲಕ ನೀಡಲು ಏರ್‌ಟೆಲ್ ಮುಂದಾಗಿದೆ. ಅದಕ್ಕೆ ತಕ್ಕ ನೆಟ್‌ವರ್ಕ್ ಸವಲತ್ತನ್ನು ಏರ್‌ಟೆಲ್ ಕಲ್ಪಿಸುತ್ತದೆ ಎಂದು ನೋಕಿಯಾದ ಮಾರ್ಕೆಟ್ ಹೆಡ್ ಸಂಜಯ್ ಮಲಿಕ್ ತಿಳಿಸಿದ್ದಾರೆ.