Instagram Bug: ಚೆನ್ನೈ ಯುವಕನಿಗೆ 20 ಲಕ್ಷ ರೂ. ಬಹುಮಾನ

ಚೆನ್ನೈ ಮೂಲದ ಭದ್ರತಾ ಸಂಶೋಧಕ ಲಕ್ಷ್ಮಣ್ ಮುತ್ತಯ್ಯ ಇತ್ತೀಚೆಗೆ ಫೇಸ್‌ಬುಕ್ ಒಡೆತನದ ಇನ್‌ಸ್ಟಾಗ್ರಾಂನಲ್ಲಿನ ದೋಷವೊಂದನ್ನು ಪತ್ತೆಹಚ್ಚಿ ಕಂಪನಿಗೆ ತಿಳಿಸಿದ್ದಕ್ಕೆ 30,000 ಅಮೆರಿಕನ್ ಡಾಲರ್ (ಅಂದಾಜು 20,67,483 ರೂ.) ಮೊತ್ತವನ್ನು ಬಹುಮಾನವಾಗಿ ಪಡೆದಿದ್ದಾರೆ.

ಮುತ್ತಯ್ಯ ಇನ್‌ಸ್ಟಾಗ್ರಾಂ ಖಾತೆಯೊಂದನ್ನು ವ್ಯಕ್ತಿಯ ಅರಿವಿಗೆ ಬಾರದಂತೆಯೇ ಹ್ಯಾಕ್ ಮಾಡುವ ಲೋಪವನ್ನು ಪತ್ತೆಹಚ್ಚಿದ್ದರು. ನಂತರ ಕಂಪನಿಗೆ ಈ ಕುರಿತು ಇ ಮೇಲ್ ಮಾಡಿದ್ದರು.

ಆದರೆ ಮೊದಲು ಪ್ರತಿಕ್ರಿಯೆ ಬಾರದಿದ್ದರಿಂದ, ನಂತರ ವಿಡಿಯೋ, ದಾಖಲೆ ಮತ್ತು ಸ್ಕ್ರೀನ್ ಶಾಟ್ ಸಮೇತ ಅವರಿಗೆ ಭದ್ರತಾ ಲೋಪವನ್ನು ಮನವರಿಕೆ ಮಾಡಿಕೊಡುವಲ್ಲಿ ಯಶಸ್ವಿಯಾಗಿದ್ದರು.

ಇದನ್ನು ಗಮನಿಸಿದ ಫೇಸ್‌ಬುಕ್ ಒಡೆತನದ ಇನ್‌ಸ್ಟಾಗ್ರಾಂ, ಬಗ್ ಬೌಂಟಿ ಯೋಜನೆಯಡಿ ಮುತ್ತಯ್ಯಗೆ 30,000 ಅಮೆರಿಕನ್ ಡಾಲರ್ ಮೊತ್ತದ ಬಹುಮಾನ ನೀಡಿದೆ.

ಜತೆಗೆ ಸಮಸ್ಯೆಯನ್ನು ಸರಿಪಡಿಸಿದೆ. ಅಲ್ಲದೆ ಅಂತಹ ಸಮಸ್ಯೆ ಮತ್ತೆ ಮರುಕಳಿಸದಂತೆ ಕ್ರಮ ಕೈಗೊಂಡಿದೆ ಎಂದು ಇನ್‌ಸ್ಟಾಗ್ರಾಂ ಹೇಳಿದೆ.