OnePlus TV: ಸ್ಕ್ರೀನ್ ಗಾತ್ರ, ಬಿಡುಗಡೆ ವಿವರ

ಚೀನಾ ಮೂಲದ ಒನ್‌ಪ್ಲಸ್ ಈಗಾಗಲೇ ಹೊಸ ಒನ್‌ಪ್ಲಸ್ ಟಿವಿ ಬಿಡುಗಡೆ ಮಾಡುತ್ತಿರುವುದಾಗಿ ಘೋಷಿಸಿದೆ. ನೂತನ ಟಿವಿ ಹೆಸರು, ಬ್ರ್ಯಾಂಡ್ ಮತ್ತು ಲೋಗೋವನ್ನು ಒನ್‌ಪ್ಲಸ್ ಈಗಾಗಲೇ ಅನಾವರಣಗೊಳಿಸಿದೆ. ಹೀಗಾಗಿ ಸಹಜವಾಗಿಯೇ ಜನರಿಗೆ ಹೊಸ ಟಿವಿ ಹೇಗಿರಲಿದೆ ಎಂಬ ಬಗ್ಗೆ ಕುತೂಹಲ ಉಂಟಾಗಿದೆ.

ಒನ್‌ಪ್ಲಸ್‌ನ ಮೊದಲ ಟಿವಿ ಇದಾಗಿದ್ದು, 43 ಇಂಚು, 55 ಇಂಚು, 65 ಇಂಚು ಮತ್ತು 75 ಎಂಬ ನಾಲ್ಕು ಸ್ಕ್ರೀನ್ ಗಾತ್ರಗಳಲ್ಲಿ ಮಾರುಕಟ್ಟೆ ಪ್ರವೇಶಿಸಲಿದೆ.

ಸೆಪ್ಟೆಂಬರ್‌ ತಿಂಗಳಿನಲ್ಲಿ ಒನ್‌ಪ್ಲಸ್ ಟಿವಿ ಬಿಡುಗಡೆಯಾಗುವ ಸಾಧ್ಯತೆಯಿದೆ ಎನ್ನಲಾಗಿದೆ. ದೇಶದಲ್ಲಿನ ಟಿವಿ ಮಾರುಕಟ್ಟೆಯ ಬೇಡಿಕೆಯಿಂದಾಗಿ, ಒನ್‌ಪ್ಲಸ್ ಆದ್ಯತೆಯ ಮೇರೆಗೆ ಭಾರತದಲ್ಲಿ ಹೊಸ ಟಿವಿ ಪರಿಚಯಿಸಲಿದೆ. ಜತೆಗೆ ಚೀನಾ, ಕೆನಡಾ ಮತ್ತು ಅಮೆರಿಕದಲ್ಲೂ ಮಾರುಕಟ್ಟೆ ಪ್ರವೇಶಿಸಲಿದೆ.

ಒನ್‌ಪ್ಲಸ್ ಟಿವಿ ಫುಲ್‌ ಎಚ್‌ಡಿ ರೆಸೊಲ್ಯೂಶನ್‌ನಿಂದ ತೊಡಗಿ, ಕ್ಯೂಎಚ್‌ಡಿ ರೆಸೊಲ್ಯೂಶನ್‌ವರೆಗೆ ಲಭ್ಯವಾಗಲಿದೆ. ಈಗಾಗಲೇ ಮಾರುಕಟ್ಟೆಯಲ್ಲಿರುವ ಶವೋಮಿ ಎಂಐ ಟಿವಿ ಜತೆ ದರಸಮರಕ್ಕೆ ಮುಂದಾಗುವ ಸಾಧ್ಯತೆಯಿದ್ದು, ಗ್ರಾಹಕರಿಗೆ ಪ್ರಯೋಜನವಾಗಲಿದೆ.

ಗೂಗಲ್‌ನ ಅಂಡ್ರಾಯ್ಡ್ ಟಿವಿ ಆಪರೇಟಿಂಗ್ ವ್ಯವಸ್ಥೆಯನ್ನು ಒನ್‌ಪ್ಲಸ್ ಬಳಸುತ್ತಿದ್ದು, ಅಂತರ್ಗತ ಕ್ಯಾಮರಾ, ಗೂಗಲ್ ಅಸಿಸ್ಟೆಂಟ್ ವಾಯ್ಸ್ ಕಂಟ್ರೋಲ್ ವ್ಯವಸ್ಥೆ ಕೂಡ ಲಭ್ಯವಾಗಲಿದೆ. ವಿನ್ಯಾಸದಲ್ಲಿ ಒನ್‌ಪ್ಲಸ್ ಯಾವಾಗಲೂ ವಿಶೇಷವಾಗಿದ್ದು, ಹೆಚ್ಚು ಆಕರ್ಷಕವಾಗಿರಲಿದೆ. ಜತೆಗೆ ಸುಲಭ ಮತ್ತು ವೇಗದ ಸಂಪರ್ಕಕ್ಕೆ ಅನುಕೂಲವಾಗುವಂತೆ ಒನ್‌ಪ್ಲಸ್ ಟಿವಿ ಬ್ಲೂಟೂತ್ 5.0 ವ್ಯವಸ್ಥೆ ಹೊಂದಿರುತ್ತದೆ.