Xiaomi Foldable Phone: ಶೀಘ್ರದಲ್ಲಿ ಮಾರುಕಟ್ಟೆಗೆ

ಮಡಚಬಲ್ಲ ಸ್ಮಾರ್ಟ್‌ಫೋನ್‌ಗಳು ಜಾಗತಿಕ ಟೆಕ್‌ಲೋಕದಲ್ಲಿ ಚರ್ಚೆಗೆ ಗ್ರಾಸವಾಗಿರುವ ಬೆನ್ನಲ್ಲೇ, ಚೀನಾ ಮೂಲದ ಶಿಯೋಮಿ ಕೂಡ ಮಡಚಬಲ್ಲ ಸ್ಮಾರ್ಟ್‌ಫೋನ್ ಹೊರತರಲು ಸಿದ್ಧತೆ ನಡೆಸಿದೆ.

Mi Fold ಅಥವಾ Mi Flex ಎಂಬ ಹೆಸರಿನಿಂದ ಕರೆಯಲ್ಪಡುವ ಶಿಯೋಮಿ ಫೋಲ್ಡೇಬಲ್ ಸ್ಮಾರ್ಟ್‌ಫೋನ್ ಪ್ರಸ್ತುತ ಮಾರುಕಟ್ಟೆಗೆ ಲಗ್ಗೆ ಇರಿಸಿರುವ ಸ್ಯಾಮ್‌ಸಂಗ್ ಮತ್ತು ಹುವೈ ಮಡಚಬಲ್ಲ ಸ್ಮಾರ್ಟ್‌ಫೋನ್‌ಗಳ ಅರ್ಧದಷ್ಟು ಕಡಿಮೆ ಬೆಲೆಗೆ ಲಭ್ಯವಾಗುವ ಸಾಧ್ಯತೆಯಿದೆ.

ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಫೋಲ್ಡ್ ದೇಶದಲ್ಲಿ ಅಂದಾಜು 1,40,760 ರೂ. ಮತ್ತು ಹುವೈ ಮೇಟ್ ಎಕ್ಸ್ 1,85,220 ರೂ. ಬೆಲೆ ಹೊಂದಿರಬಹುದು ಎಂದು ಹೇಳಲಾಗಿದ್ದು, ಇದಕ್ಕಿಂತ ಅರ್ಧದಷ್ಟು ಕಡಿಮೆ ಬೆಲೆಗೆ ಶಿಯೋಮಿ ಸ್ಮಾರ್ಟ್‌ಫೋನ್ ಹೊರತರಬಹುದು ಎನ್ನಲಾಗಿದೆ.

ಏಪ್ರಿಲ್ ಮತ್ತು ಜೂನ್ ಮಧ್ಯೆ ಶಿಯೋಮಿ ನೂತನ ಫೋನ್ ಹೊರತರುವ ನಿರೀಕ್ಷೆಯಿದ್ದು, ದೇಶದಲ್ಲಿ ಅಂದಾಜು 74,999 ರೂ.ಗೆ ದೊರೆಯುವ ಸಾಧ್ಯತೆಯಿದೆ. ಇದರಿಂದ ಮಡಚಬಲ್ಲ ಸ್ಮಾರ್ಟ್‌ಫೋನ್ ಹೊಂದಬೇಕು ಎಂಬ ಆಕಾಂಕ್ಷಿಗಳಿಗೆ ಪ್ರಯೋಜನವಾಗಲಿದೆ.

Visionox Technology OLED ಡಿಸ್‌ಪ್ಲೇ ತಂತ್ರಜ್ಞಾನ ಬಳಸಲಿರುವ ಶಿಯೋಮಿ, ಟಾಪ್ ನಾಚ್ ಸಹಿತ Snapdragon 855 ಪ್ರೊಸೆಸರ್ ಮತ್ತು 8GB ಯಿಂದ 10GB RAM ಬಳಸುವ ಸಾಧ್ಯತೆಯಿದೆ.