Facebook Messenger Dark Mode: ಸ್ಮಾರ್ಟ್‌ಫೋನ್‌ನಲ್ಲಿ ಬಳಸುವುದು ಹೇಗೆ?

ಫೇಸ್‌ಬುಕ್ ಹೊಸದಾಗಿ ಮೆಸೆಂಜರ್‌ನಲ್ಲಿ ಡಾರ್ಕ್ ಮೋಡ್ ಪರಿಚಯಿಸಲು ಸಿದ್ಧತೆ ನಡೆಸಿದ್ದು, ಶೀಘ್ರದಲ್ಲೇ ಬಳಕೆದಾರರಿಗೆ ಒದಗಿಸುವುದಾಗಿ ಹೇಳಿತ್ತು.

ಕಳೆದ ಅಕ್ಟೋಬರ್‌ನಲ್ಲೇ ಫೇಸ್‌ಬುಕ್ ಆ್ಯಂಡ್ರಾಯ್ಡ್ ಮತ್ತು ಐಫೋನ್‌ ಬಳಕೆದಾರರಿಗೆ ಬಹುಬೇಡಿಕೆಯ ಡಾರ್ಕ್‌ ಮೋಡ್ ಪರಿಚಯಿಸುತ್ತೇವೆ ಎಂದು ಹೇಳಿತ್ತಾದರೂ, ಅಧಿಕೃತವಾಗಿ ಈವರೆಗೆ ಬಿಡುಗಡೆ ಮಾಡಿಲ್ಲ.

ಆದರೆ ರೆಡ್ಡಿಟ್ ಬಳಕೆದಾರರ ಪ್ರಕಾರ, ಹೊಸ ಫೀಚರ್‌ ಈಗಾಗಲೇ ಕೆಲವು ದೇಶಗಳಲ್ಲಿ ಲಭ್ಯವಿದೆ. ಅದನ್ನು ಮೆಸೆಂಜರ್‌ನಲ್ಲಿ ಇಮೋಜಿ ಕಳುಹಿಸುವ ಮೂಲಕ ಆಕ್ಟಿವೇಟ್ ಮಾಡಿಕೊಳ್ಳಬಹುದು ಎಂದಿದೆ.

ಫಿಲಿಪ್ಪೀನ್ಸ್, ಪೋರ್ಚುಗಲ್, ಜೆಕ್ ರಿಪಬ್ಲಿಕ್, ಸೌದಿ ಅರೇಬಿಯಾ ಮತ್ತು ಇಂಡೋನೇಷ್ಯಾದ ಬಳಕೆದಾರರು ತಮಗೆ ಫೇಸ್‌ಬುಕ್ ಮೆಸೆಂಜರ್‌ನಲ್ಲಿ ಡಾರ್ಕ್‌ ಮೋಡ್ ದೊರೆಯುತ್ತಿದೆ ಎಂದಿದ್ದಾರೆ.

ಆದರೆ ಭಾರತದಲ್ಲೂ ಆ್ಯಂಡ್ರಾಯ್ಡ್ ಮತ್ತು ಐಫೋನ್‌ ಬಳಕೆದಾರರಿಗೆ ಮೆಸೆಂಜರ್‌ನಲ್ಲಿ ಡಾರ್ಕ್‌ ಮೋಡ್ ದೊರೆಯುತ್ತಿದೆ. ಫೇಸ್‌ಬುಕ್ ಈ ಕುರಿತು ಅಧಿಕೃತ ಪ್ರಕಟಣೆ ಹೊರಡಿಸಿಲ್ಲ. ಆದರೆ ಬಳಕೆದಾರರು ಮೆಸೆಂಜರ್ ಆ್ಯಪ್ ತೆರೆದು ಅದರಲ್ಲಿ ಯಾರಿಗಾದರೂ ಅರ್ಧಚಂದ್ರ ಇರುವ ಇಮೋಜಿ ಕಳುಹಿಸಿದರೆ, ತಕ್ಷಣ ಮೇಲ್ಗಡೆ You Found Dark Mode! ಎಂಬ ಸಂದೇಶ ಕಾಣಿಸಿಕೊಳ್ಳುತ್ತದೆ. ನಂತರ ಸೆಟ್ಟಿಂಗ್ಸ್‌ನಲ್ಲಿ ಡಾರ್ಕ್ ಮೋಡ್ ಆನ್ ಮಾಡಿಕೊಳ್ಳಲು ಅನುವು ಮಾಡಿಕೊಡುತ್ತದೆ.

ಫೇಸ್‌ಬುಕ್ ಈ ಬಗ್ಗೆ ಇನ್ನೂ ಕಾರ್ಯನಿರತವಾಗಿದ್ದು, ಅಧಿಕೃತ ಬಿಡುಗಡೆಯಾಗುವವರೆಗೆ ಎಲ್ಲ ಸಂದರ್ಭದಲ್ಲೂ ದೊರೆಯುವುದು ಅನುಮಾನ ಎನ್ನಲಾಗಿದೆ.