ಭಾರತದಲ್ಲಿ ಸಂಚರಿಸಲು ಸ್ವಯಂ ಚಾಲಿತ ಕಾರುಗಳು ಸಿದ್ಧವಿವೆ, ಆದರೆ ರಸ್ತೆಗಳು?

ಹೊಸದಿಲ್ಲಿ: ಸ್ವಯಂ ಚಾಲಿತ ಕಾರು ಅಥವಾ ಚಾಲಕ ರಹಿತ ಕಾರು ತಂತ್ರಜ್ಞಾನವು ಹೊಸ ವಿಷಯವೇನಲ್ಲ. ಆದರೆ ಭಾರತದ ರಸ್ತೆಗಳಲ್ಲಿ ಸ್ವಯಂ ಚಾಲಿತ ಕಾರುಗಳು ಸಂಚರಿಸುವುದು ಯಾವಾಗ? ಎಂಬ ಪ್ರಶ್ನೆ ಮುನ್ನೆಲೆಗೆ ಬಂದಿದ್ದು ಬಹು ಚರ್ಚಿತ ವಿಷಯವಾಗಿದೆ. ಮುಂದುವರಿದ ಎಲ್ಲ ರಾಷ್ಟ್ರಗಳು ಸ್ವಯಂ ಚಾಲಿತ ಕಾರುಗಳನ್ನು ಹೊಂದುವ ಮೂಲಕ ತಂತ್ರಜ್ಞಾನದ ಮೇಲುಸ್ತರಕ್ಕೆ ದಾಪುಗಾಲಿಡುತ್ತಿರುವ ಸಂದರ್ಭದಲ್ಲಿ ಈ ಪ್ರಶ್ನೆ ಉದ್ಭವಿಸುತ್ತದೆ.

ಲಕ್ಷಾಂತರ ಕಾರು ಚಾಲಕರ ಉದ್ಯೋಗವನ್ನು ಕಸಿಯಲಿರುವ ಈ ತಂತ್ರಜ್ಞಾನ ಭಾರತಕ್ಕೆ ಬೇಡ ಎಂಬುದು ಕೇಂದ್ರ ಭೂಸಾರಿಗೆ ಸಚಿವ ನಿತಿನ್‌ ಗಡ್ಕರಿ ಅವರ ವಾದವಾಗಿದೆ. ಟಾಟಾ ಎಕ್ಸಿ‌ಯ ಉನ್ನತ ಅಧಿಕಾರಿ ನಿತಿನ್‌ ಪೈ ಬಹಳ ಸಿಂಪಲ್‌ಆಗಿ ಪ್ರಶ್ನಿಸುತ್ತಾರೆ, 'ಸ್ವಯಂ ಚಾಲಿತ ಕಾರುಗಳು ಸಿದ್ಧವಿವೆ. ಆದರೆ ಈ ಕಾರುಗಳ ಚಾಲನೆಗೆ ರಸ್ತೆಗಳು ಸಿದ್ಧವಿವೆಯೇ?' ನಿತಿನ್‌ ಪೈ ಹೇಳುವಂತೆ ಮ್ಯಾಪಿಂಗ್‌ ತಂತ್ರಜ್ಞಾನಕ್ಕೆ ಭಾರತದ ರಸ್ತೆಗಳಲ್ಲಿ ಕನಿಷ್ಠ ಶೇ.15ರಷ್ಟು ವಾಹನಗಳ ಗುರುತು ಸಿಗುವುದಿಲ್ಲವಂತೆ.

ಉಬರ್‌ನ ಮಾಜಿ ಮುಖ್ಯಸ್ಥ ಟ್ರಾವಿಸ್‌ ಕಾಲನಿಕ್‌ ಕಳೆದ ವರ್ಷ ಭಾರತಕ್ಕೆ ಭೇಟಿ ನೀಡಿದ ಸಂದರ್ಭ 'ಭೂಮಿಯಲ್ಲಿ ಸ್ವಯಂ ಚಾಲಿತ ಕಾರು ಹೊಂದುವ ಕೊನೆಯ ರಾಷ್ಟ್ರ ಭಾರತ' ಎಂದಿದ್ದರು.

ವರ್ಷಾಂತ್ಯಕ್ಕೆ ಲಾಸ್‌ ಏಂಜಲಿಸ್‌ನಿಂದ ನ್ಯೂಯಾರ್ಕ್‌ ವರೆಗೆ ಚಲಿಸುವ ಸ್ವಯಂ ಚಾಲಿತ ಕಾರು ಉತ್ಪಾದಿಸುವುದಾಗಿ ಟೆಲ್ಸಾ ಮೋಟಾರ್ಸ್‌ನ ಸಿಇಒ ಇಲನ್‌ ಮಸ್ಕ್‌ ತಿಳಿಸಿದ್ದಾರೆ. ಇದೇ ಮೊದಲ ಬಾರಿಗೆ ದೇಶೀಯ ಕಂಪನಿ, ಮುಂಬೈ ಮೂಲದ ಜಿನೆಸಿಸ್‌ ಅಂತಾರಾಷ್ಟ್ರೀಯ ಕಾರ್ಪೋರೇಷನ್‌ ಅಮೆರಿಕದ ಗ್ರಾಹಕರಿಗೆ ಸ್ವಯಂ ಚಾಲಿತ ಕಾರಿಗಾಗಿ ಹೆಚ್ಚು ನಿಖರತೆಯಿರುವ ಎಚ್‌ಡಿ ಮ್ಯಾಪ್‌ಗಳನ್ನು ಅಭಿವೃದ್ಧಿಗೊಳಿಸಿದೆ.

ಭಾರತದಲ್ಲಿ ತಂತ್ರಜ್ಞಾನ ಅಭಿವೃದ್ಧಿ
ಖರಾಗ್‌ಪುರ, ಕಾನ್ಪುರ ಮತ್ತು ಬಾಂಬೆಯ ಇಂಡಿಯನ್‌ ಇನ್ಸ್‌ಟಿಟ್ಯೂಟ್‌ ಆಫ್‌ ಟೆಕ್ನಾಲಜಿ (ಐಐಟಿ)ಯ ತಂಡವು ಭಾರತೀಯ ಕಂಪನಿಗಳ ಸಹಯೋಗದೊಂದಿಗೆ ದೇಶೀಯ ಮಾರುಕಟ್ಟೆಯನ್ನು ಮನನದಲ್ಲಿಟ್ಟುಕೊಂಡು ತಂತ್ರಜ್ಞಾನ ಅಭಿವೃದ್ಧಿಗೊಳಿಸುತ್ತಿವೆ. ವಿಶ್ವದಲ್ಲೇ ಅತಿಹೆಚ್ಚು ಟ್ರ್ಯಾಕ್ಟರ್‌ಗಳ ಉತ್ಪಾದಕ ಕಂಪನಿ ಮಹೀಂದ್ರದ ಮುಖ್ಯಸ್ಥ ಆನಂದ ಮಹೀಂದ್ರ ಸ್ವಯಂ ಚಾಲಿತ ಟ್ರ್ಯಾಕ್ಟರ್‌ಅನ್ನು ಅಭಿವೃದ್ಧಿ ಪಡಿಸಲು ಆಸಕ್ತಿ ಹೊಂದಿರುವುದಾಗ ಕಳೆದ ವರ್ಷ ಹೇಳಿದ್ದರು.