Flipkart: ಡೆಲಿವರಿಗೆ ಇ-ವಾಹನ ಬಳಕೆ

ಇ-ಕಾಮರ್ಸ್‌ ದಿಗ್ಗಜ ಫ್ಲಿಪ್‌ಕಾರ್ಟ್‌ ತನ್ನ ಉತ್ಪನ್ನಗಳನ್ನು ಗ್ರಾಹಕರ ಮನೆ ಬಾಗಿಲಿಗೆ ತಲುಪಿಸುವ ಕೊನೆಯ ಹಂತದ ಸಾಗಾಣಿಕೆಯಲ್ಲಿ ಎಲೆಕ್ಟ್ರಿಕ್‌ ವಾಹನಗಳನ್ನು ಬಳಸಲು ಮುಂದಾಗಿದೆ.

ಫ್ಲಿಪ್‌ಕಾರ್ಟ್‌ ಈಗಿನ ಕೊನೆಯ ಹಂತದ ಸಾಗಣೆಯ ವ್ಯವಸ್ಥೆಯಲ್ಲಿ ಶೇ. 40 ವಾಹನಗಳನ್ನು 2020ರ ಮಾರ್ಚ್‌ ಒಳಗೆ ಎಲೆಕ್ಟ್ರಿಕ್‌ ವಾಹನಗಳಾಗಿ ಬದಲಾಯಿಸಲು ನಿರ್ಧರಿಸಿದೆ.

ಈ ವರ್ಷದ ಅಂತ್ಯದ ವೇಳೆಗೆ ಸುಮಾರು 160 ಎಲೆಕ್ಟ್ರಿಕ್‌ ವಾಹನಗಳನ್ನು ಅಳವಡಿಸಲು ಯೋಜಿಸಿದೆ. ಈ ನಿಟ್ಟಿನಲ್ಲಿ ಸೂಕ್ತ ವಿನ್ಯಾಸದ ವಾಹನಗಳನ್ನು ತಯಾರಿಸಿಕೊಡಲು ಉತ್ಪಾದಕರನ್ನು ಕಂಪನಿ ಸಂಪರ್ಕಿಸಿದೆ.

ಕಳೆದ 6 ತಿಂಗಳಿನಲ್ಲಿ ಫ್ಲಿಪ್‌ಕಾರ್ಟ್‌, ಕಂಪನಿಯ ಹಲವಾರು ವಿಭಾಗಗಳಲ್ಲಿ ಎಲೆಕ್ಟ್ರಿಕ್‌ ವಾಹನಗಳನ್ನು ಅಳವಡಿಸಿದ್ದು, ಇದು ಪರಿಣಾಮಕಾರಿಯಾಗಿದೆ. ಫ್ಲಿಪ್‌ಕಾರ್ಟ್‌ ಹೈದರಾಬಾದ್‌ನಲ್ಲಿ 8, ದಿಲ್ಲಿಯಲ್ಲಿ 10 ಇವಿಗಳನ್ನು ಬಳಸುತ್ತಿದೆ. ಬೆಂಗಳೂರಿನಲ್ಲಿ 30 ಇ-ಬೈಕ್‌ಗಳನ್ನು ಉಪಯೋಗಿಸುತ್ತಿದೆ. ಇದರಿಂದ ಕಂಪನಿಗೆ ವೆಚ್ಚದಲ್ಲೂ ಉಳಿತಾಯವಾಗಲಿದೆ. ಇದು ಪರಿಸರಸ್ನೇಹಿಯೂ ಹೌದು ಎಂದು ಕಂಪನಿಯ ಹಿರಿಯ ಉಪಾಧ್ಯಕ್ಷ ಅಮಿತೇಶ್‌ ಜಾ ತಿಳಿಸಿದ್ದಾರೆ.