Online Voting: ಸ್ಪಷ್ಟನೆ ನೀಡಿದ ಚುನಾವಣಾ ಆಯೋಗ

ಕಳೆದ ಕೆಲವು ದಿನಗಳಿಂದ ವಾಟ್ಸಪ್ ಮತ್ತು ಇತರ ಸಾಮಾಜಿಕ ತಾಣಗಳಲ್ಲಿ ಹರಿದಾಡುತ್ತಿದ್ದ ಭಾರತೀಯ ಪಾಸ್‌ಪೋರ್ಟ್ ಇದ್ದರೆ ಆನ್‌ಲೈನ್‌ನಲ್ಲೇ ಮತದಾನ ಮಾಡಬಹುದು ಎಂಬ ಸಂದೇಶ ಕುರಿತು ಚುನಾವಣಾ ಆಯೋಗ ಸ್ಪಷ್ಟನೆ ನೀಡಿದೆ.

ಚುನಾವಣೆ ಮತ್ತು ಮತದಾನ ಕುರಿತು ಈಗಾಗಲೇ ವಾಟ್ಸಪ್ ಸ್ಪಷ್ಟನೆ ಹೊರಡಿಸಿ, ಸುಳ್ಳು ಸುದ್ದಿ ಹರಡಬೇಡಿ ಎಂದು ಸೂಚಿಸಿತ್ತು. ಆದರೆ ಅದರ ಬೆನ್ನಲ್ಲೇ ಚುನಾವಣಾ ಆಯೋಗದ ವೆಬ್‌ಸೈಟ್ ಲಿಂಕ್ ಸಹಿತ, ಭಾರತೀಯ ಪಾಸ್‌ಪೋರ್ಟ್‌ದಾರರು 2019ರ ಚುನಾವಣೆಯಲ್ಲಿ ಆನ್‌ಲೈನ್ ವೋಟ್ ಮಾಡಬಹುದು.

ನಿಮ್ಮ ಹೆಸರನ್ನು https://eci.gov.in ನಲ್ಲಿ ನೋಂದಾಯಿಸಿ. ನಂತರ ಎನ್‌ಆರ್‌ಐ ವೋಟರ್‌ ಎಂದು ಆಯ್ಕೆ ಮಾಡಿಕೊಳ್ಳಿ, ಈ ಸಂದೇಶವನ್ನು ಫಾರ್‌ವರ್ಡ್‌ ಮಾಡಿ ಎಂಬ ಒಕ್ಕಣೆಯಿದ್ದ ವಾಟ್ಸಪ್ ಮೆಸೇಜ್ ಹರಿದಾಡುತ್ತಿತ್ತು.


ಆದರೆ ಚುನಾವಣಾ ಆಯೋಗದ ವಕ್ತಾರ ಶೆಫಾಲಿ ಶರಣ್ ಪ್ರಕಾರ, ಅದೊಂದು ಸುಳ್ಳು ಸುದ್ದಿಯಾಗಿದ್ದು, ಆನ್‌ಲೈನ್ ಮತದಾನಕ್ಕೆ ಅವಕಾಶ ಲಭ್ಯವಿಲ್ಲ. ಆದರೆ http://nvsp.in ಪೋರ್ಟಲ್ ಮೂಲಕ ಮತದಾರರು ನೋಂದಣಿ, ವೋಟರ್ ಐಡಿ ಹೆಸರು ಬದಲಾವಣೆ ಮತ್ತು ಅಪ್‌ಡೇಟ್‌ ಮಾಡಲು ಮಾತ್ರ ಅವಕಾಶವಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಶೆಫಾಲಿ ಈ ಬಗ್ಗೆ ಟ್ವೀಟ್ ಮಾಡಿದ್ದು, ನಕಲಿ ವಾಟ್ಸಪ್ ಸಂದೇಶ ಕುರಿತು ಜನರು ಎಚ್ಚರದಿಂದಿರಿ ಎಂದಿದ್ದಾರೆ.