Travel Pillow: ಏರ್‌ಬಸ್ ತಂತ್ರಜ್ಞರ ಅವಿಷ್ಕಾರ

ಏರ್‌ಬಸ್‌ನಲ್ಲಿ ಇನ್ನು ಮುಂದೆ ತುಂಬಾ ದೂರದ ಪ್ರಯಾಣ ಮಾಡುವಾಗ ನಿಮಗೆ ಕತ್ತು ನೋವು ಬರುವುದಿಲ್ಲ. ನಿಮ್ಮ ಪ್ರಯಾಣವನ್ನು ಮತ್ತಷ್ಟು ಆರಾಮ ಮಾಡುವ ನಿಟ್ಟಿನಲ್ಲಿ ದೂರದ ಪ್ರಯಾಣ ಮಾಡುವ ಎಕಾನಮಿ-ಕ್ಲಾಸ್ ಪ್ರಯಾಣಿಕರಿಗೆ ವಿನೂತನವಾದ ಕಂಫರ್ಟ್ ಕಿಟ್ ಅನ್ನು ಏರ್‌ಬಸ್ ನೀಡಲಿದೆ. ಯುಯುಒ ಇನೋವೇಶನ್ ಎಂಬ ಸ್ಟಾರ್ಟಪ್ ಕಂಪನಿ ಏರ್‌ಬಸ್‌ ಇಂಡಿಯಾದ ಆಂತರಿಕ ಇಂಜಿನಿಯರ್‌ಗಳ ನೆರವಿನಿಂದ ನ್ಯಾಪ್‍ಈಜಿ ಟ್ರಾವೆಲ್ ಪಿಲ್ಲೋವನ್ನು ಅಭಿವೃದ್ಧಿಪಡಿಸಿದೆ.

ದೇಶದ ವಿಮಾನಯಾನ ಕ್ಷೇತ್ರದಲ್ಲಿ ಇದೇ ಮೊದಲ ಬಾರಿಗೆ ಇಂತಹ ವಿನೂತನವಾದ ಸೌಲಭ್ಯ ನೀಡಲಾಗುತ್ತಿದೆ. ಈ ನ್ಯಾಪ್‍ಈಜಿ ಟ್ರಾವೆಲ್ ಪೊಲ್ಲೋ ಕೇವಲ ಕುತ್ತಿಗೆ ದಿಂಬು ಅಲ್ಲ. ಇದು ಬಹು ಉಪಯೋಗಿ ದಿಂಬಾಗಿರುತ್ತದೆ. ಅಂದರೆ, ಇದನ್ನು ಕೇವಲ ವಿಮಾನದಲ್ಲಿ ಪ್ರಯಾಣಿಸುವಾಗ ಬಳಕೆ ಮಾಡುವುದಷ್ಟೇ ಅಲ್ಲ, ಕಾರಿನಲ್ಲಿ ಪ್ರಯಾಣ ಮಾಡುವಾಗ, ರೈಲಿನಲ್ಲಿ ಪ್ರಯಾಣ ಮಾಡುವಾಗ ಈ ದಿಂಬನ್ನು ಬಳಸಿಕೊಂಡು ಆರಾಮವಾಗಿ ನಿದ್ದೆ ಮಾಡಬಹುದಾಗಿದೆ.

ಏರ್‌ಬಸ್ ಇಂಡಿಯಾ ಈ ಪಿಲ್ಲೋವನ್ನು ಪೂರೈಕೆ ಮಾಡುವ ನಿಟ್ಟಿನಲ್ಲಿ ಯುಯುಒ ಇನೋವೇಶನ್ಸ್ ಸಂಸ್ಥೆಯೊಂದಿಗೆ ಒಡಂಬಡಿಕೆ ಮಾಡಿಕೊಂಡಿದ್ದು, ಈ ಉತ್ಪನ್ನವನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಲೂ ಯುಯುಒ ಇನೋವೇಶನ್‍ಗೆ ನೆರವಾಗಲಿದೆ.

ಬೆಂಗಳೂರಿನ ಏರ್‌ಬಸ್ ಘಟಕದ ಉದ್ಯೋಗಿಗಳಾದ ಪ್ರದಿಪ್ತ ಕಿಶೋರ್ ಸಾಹು ಮತ್ತು ಸೋಹಮ್ ನಾರಾಯಣ್ ಅವರು ಈ ಪೇಟೆಂಟ್ ವಿನ್ಯಾಸವನ್ನು ಆಂತರಿಕ ಯೋಜನೆಯಾಗಿ ಅಭಿವೃದ್ಧಿಪಡಿಸಿದ್ದಾರೆ. ಈ ನ್ಯಾಪ್‍ಈಜಿ ಕಂಫರ್ಟ್ ಕಿಟ್ 2019ರ ಆಗಸ್ಟ್‌ನಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಡಲಿದೆ.