ಫೇಸ್‌ಬುಕ್‌ಗೆ ಬಂತು ಡೇಟಿಂಗ್, ಸೀಕ್ರೆಟ್ ಕ್ರಶ್ ವೈಶಿಷ್ಟ್ಯ!

ಈಗಾಗಲೇ ಯುವ ಜನಾಂಗದಲ್ಲಿ ಹುಚ್ಚೆಬ್ಬಿಸಿರುವ ಫೇಸ್‌ಬುಕ್ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿದ್ದು, ಸಂಗಾತಿಯ ಹುಡುಕಾಟದಲ್ಲಿರುವವರಿಗೆ ನೆರವಾಗಲು ಬಂದಿದೆ. ಅಮೆರಿಕದಲ್ಲಿ ಅದು ಡೇಟಿಂಗ್ ವೈಶಿಷ್ಟ್ಯವನ್ನು ಆರಂಭಿಸಿದ್ದು, 18 ವರ್ಷಕ್ಕಿಂತ ಮೇಲ್ಪಟ್ಟವರು ಫೇಸ್‌ಬುಕ್ ಡೇಟಿಂಗ್‌ಗೆ ಇಚ್ಛಿಸಿದರೆ, ಪ್ರತ್ಯೇಕವಾದ ಡೇಟಿಂಗ್ ಪ್ರೊಫೈಲ್ ಒಂದನ್ನು ರಚಿಸಲು ಅನುವು ಮಾಡಿಕೊಡಲಾಗಿದೆ.

ಅಲ್ಲದೆ, ತಮ್ಮ ಇನ್‌ಸ್ಟಾಗ್ರಾಂ ಪೋಸ್ಟ್‌ಗಳನ್ನು ನೇರವಾಗಿ ಡೇಟಿಂಗ್ ಪ್ರೊಫೈಲ್‌ಗೆ ಸಂಪರ್ಕಿಸುವ ಆಯ್ಕೆಯನ್ನೂ ಫೇಸ್‌ಬುಕ್ ತನ್ನ ಬಳಕೆದಾರರಿಗೆ ಒದಗಿಸುತ್ತಿದೆ. ಫೇಸ್‌ಬುಕ್ ಫ್ರೆಂಡ್‌ಗಳಲ್ಲದೆ, ತಮ್ಮ ಇನ್‌ಸ್ಟಾಗ್ರಾಂ ಫಾಲೋವರ್‌ಗಳನ್ನೂ ತಮ್ಮ 'ಸೀಕ್ರೆಟ್ ಕ್ರಶ್' ಪಟ್ಟಿಗೆ ಸೇರಿಸುವ ಆಯ್ಕೆಯ ಕೂಡ ಇದೆ.

'ಈ ವರ್ಷಾಂತ್ಯದೊಳಗೆ, ನಿಮ್ಮ ಡೇಟಿಂಗ್ ಪ್ರೊಫೈಲ್‌ಗೆ ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂ ಸ್ಟೋರಿಗಳನ್ನು ಸೇರಿಸಲು ಸಾಧ್ಯವಾಗಿಸುತ್ತೇವೆ' ಎಂದು ಫೇಸ್‌ಬುಕ್ ಡೇಟಿಂಗ್ ವೈಶಿಷ್ಟ್ಯದ ಪ್ರಾಡಕ್ಟ್ ಮ್ಯಾನೇಜರ್ ನಥಾನ್ ಶಾರ್ಪ್ ಅವರು ಬ್ಲಾಗ್ ಪೋಸ್ಟ್ ಒಂದರಲ್ಲಿ ತಿಳಿಸಿದ್ದಾರೆ.

ಫೇಸ್‌ಬುಕ್ ಡೇಟಿಂಗ್ ಎನೇಬಲ್ ಮಾಡಿಕೊಂಡವರು, ತಮ್ಮ ಪ್ರೊಫೈಲ್‌ಗಳನ್ನು ಬೇರೆಯವರಿಗೆ ಡೇಟಿಂಗ್‌ಗೆ ಸಜೆಸ್ಟ್ ಮಾಡಲು ಕೂಡ ಅನುವು ಮಾಡಿಕೊಡುತ್ತಾರೆ.

ನಿಮಗೆ ಯಾರ ಮೇಲಾದರೂ (ಕ್ರಶ್) ಮನಸ್ಸಾಗಿದ್ದರೆ, ನೇರವಾಗಿ ಅವರ ಪ್ರೊಫೈಲ್‌ನಲ್ಲಿ ಕಾಮೆಂಟ್ ಮಾಡಬಹುದು ಅಥವಾ ಅವರಿಗೆ ತಿಳಿಯುವಂತಾಗಲು ಲೈಕ್ ಬಟನ್ ಒತ್ತಬಹುದಾಗಿದೆ.

'ನಿಮಗಿಷ್ಟವಿಲ್ಲವೆಂದಾದರೆ, ಸುಮ್ಮನಿರಬಹುದು. ಸ್ನೇಹಿತರ ಸ್ನೇಹಿತರು ಮತ್ತು/ಅಥವಾ ನಿಮ್ಮ ಸ್ನೇಹಿತರ ವಲಯದಲ್ಲಿ ಇಲ್ಲದ ವ್ಯಕ್ತಿಗಳೊಂದಿಗೆ ಕೂಡ ನೀವು ಹೊಂದಿಕೆ ಮಾಡಿಕೊಳ್ಳಲು ಫೇಸ್‌ಬುಕ್ ಅವಕಾಶ ನೀಡುತ್ತದೆ' ಎಂದು ಕಂಪನಿ ಹೇಳಿದೆ.

ಸೀಕ್ರೆಟ್ ಕ್ರಶ್ ವೈಶಿಷ್ಟ್ಯವನ್ನು ಬಳಸಲು ನೀವು ಆಯ್ಕೆ ಮಾಡಿಕೊಂಡರೆ ಮಾತ್ರ ಹಾಗೂ ಇಬ್ಬರೂ ಪರಸ್ಪರರನ್ನು ತಮ್ಮ ಪಟ್ಟಿಗೆ ಸೇರಿಸಿಕೊಳ್ಳದ ಹೊರತು, ಫೇಸ್‌ಬುಕ್ ಡೇಟಿಂಗ್ ನಿಮಗೆ ಈ ರೀತಿಯ ಹೊಂದಾಣಿಕೆಗೆ ಅವಕಾಶ ಮಾಡುವುದಿಲ್ಲ.

"ನಿಮ್ಮೆಲ್ಲ ಡೇಟಿಂಗ್ ಚಟುವಟಿಕೆಗಳು ಫೇಸ್‌ಬುಕ್ ಡೇಟಿಂಗ್‌ನಲ್ಲೇ ಉಳಿಯುತ್ತವೆ. ಅದನ್ನು ನಿಮ್ಮ ಪ್ರಧಾನ ಫೇಸ್‌ಬುಕ್ ಪುಟದಲ್ಲಿ ಹಂಚುವುದು ಸಾಧ್ಯವಿಲ್ಲ" ಎಂದು ಕಂಪನಿ ತಿಳಿಸಿದೆ.

ಇದರಲ್ಲಿ ಖಾಸಗಿತನಕ್ಕೆ, ಸುರಕ್ಷತೆಗೆ ಅತ್ಯಂತ ಹೆಚ್ಚು ಪ್ರಾಧಾನ್ಯ ನೀಡಲಾಗಿದೆ ಎಂದು ನಥಾನ್ ಶಾರ್ಪ್ ತಿಳಿಸಿದ್ದಾರೆ.

ಸೀಕ್ರೆಟ್ ಕ್ರಶ್ ಪಟ್ಟಿಯನ್ನು ಸಕ್ರಿಯಗೊಳಿಸಿದರೆ, ಯಾರ ಮೇಲೆ ಯಾರಿಗೆ 'ಕ್ರಶ್' ಆಗಿದೆ ಎಂಬುದನ್ನು ನೋಟಿಫಿಕೇಶನ್ ಮೂಲಕ ಅವರಿಗೆ ಮಾತ್ರ ತಿಳಿಸಲಾಗುತ್ತದೆ. ಅವರೂ ನಿಮ್ಮನ್ನು ಸೀಕ್ರೆಟ್ ಕ್ರಶ್ ಪಟ್ಟಿಗೆ ಸೇರಿಸಿದರೆ, 'ಮ್ಯಾಚ್ ಆಗಿದೆ!' ಎಂಬ ಸೂಚನೆ ದೊರೆಯುತ್ತದೆ.

ಅಮೆರಿಕ ಮಾತ್ರವಲ್ಲದೆ 19 ದೇಶಗಳಲ್ಲಿ ಫೇಸ್‌ಬುಕ್ ಡೇಟಿಂಗ್ ವೈಶಿಷ್ಟ್ಯ ಪರಿಚಯಿಸಲಾಗಿದ್ದು, ಭಾರತಕ್ಕಿನ್ನೂ ಬಂದಿಲ್ಲ. 2020ರ ಆದಿಭಾಗದಲ್ಲಿ ಯೂರೋಪ್‌ನಲ್ಲಿ ಈ ವೈಶಿಷ್ಟ್ಯವನ್ನು ಪರಿಚಯಿಸಲಾಗುತ್ತದೆ.