Facebook: ಬಳಕೆದಾರರಿಗೆ ಫೇಕ್‌ ನ್ಯೂಸ್‌ ಅಲರ್ಟ್‌

ಸೋಷಿಯಲ್‌ ಮೀಡಿಯಾ ದೈತ್ಯ ಫೇಸ್‌ಬುಕ್‌ ಫೇಕ್‌ ನ್ಯೂಸ್‌ ಬಗ್ಗೆ ಅಲರ್ಟ್‌ ವ್ಯವಸ್ಥೆಯನ್ನು ಪರಿಷ್ಕರಿಸಿದೆ. ಹೊಸ ವ್ಯವಸ್ಥೆಯ ಅನ್ವಯ ಫೇಸ್‌ಬುಕ್‌ನಲ್ಲಿ ಬಳಕೆದಾರರು ಫೇಕ್‌ ನ್ಯೂಸ್‌ ವೀಕ್ಷಿಸಿದ ತಕ್ಷಣವೇ ಅದರ ಬಗ್ಗೆ ಅಲರ್ಟ್‌ ನೀಡಲಿದೆ. ಕಳೆದ ವರ್ಷದ ಕರ್ನಾಟಕದಲ್ಲಿ ಸತ್ಯಶೋಧನಾ ಪ್ರೋಗ್ರಾಮ್‌ ಅನ್ನು ಫೇಸ್‌ಬುಕ್‌ ಪೈಲಟ್‌ ಯೋಜನೆಯಾಗಿ ಆರಂಭಿಸಿತ್ತು. ಫೇಸ್‌ಬುಕ್‌ನ ಈ ಪ್ರಯತ್ನಕ್ಕೆ ಬೂಮ್‌, ವಿಶ್ವಾಸ ನ್ಯೂಸ್‌ ಕೈ ಜೋಡಿಸಿದ್ದವು.

ಇದೀಗ ಫೇಸ್‌ಬುಕ್‌ ನಕಲಿ ಸುದ್ದಿಗಳನ್ನು ಎಎಫ್‌ಪಿ ಇಂಡಿಯಾ, ಫ್ಯಾಕ್ಟ್ ಕ್ರೆಸೆಂಡೊ, ಫ್ಯಾಕ್ಟಲೀ, ನ್ಯೂಸ್‌ ಮೊಬೈಲ್‌ ಫ್ಯಾಕ್ಟ್ಚೆಕರ್‌, ದಿ ಕ್ವಿಂಟ್‌ ಮತ್ತು ಇಂಡಿಯಾ ಟುಡೇ ಫ್ಯಾಕ್ಟ್ ಚೆಕ್‌ ಸಹಯೋಗದ ಮೂಲಕ ಪತ್ತೆ ಹಚ್ಚಲಿದೆ. ಫೇಕ್‌ ಸುದ್ದಿ, ಫೇಕ್‌ ಅಕೌಂಟ್‌ಗಳನ್ನು ಕಿತ್ತೊಗೆಯಲು ಫೇಸ್‌ಬುಕ್‌ ತಂತ್ರಜ್ಞಾನ ಜತೆಗೆ ಮಾನವ ಸೇವೆಯನ್ನು ಬಳಸಿಕೊಳ್ಳಲಿದೆ.

ಫೇಕ್‌ ನ್ಯೂಸ್‌ಗಳನ್ನು ಫೇಸ್‌ಬುಕ್‌, ಸುಳ್ಳು ಸುದ್ದಿ, ಸುಳ್ಳು ಶೀರ್ಷಿಕೆ, ಅಭಿಪ್ರಾಯ ಮತ್ತು ವ್ಯಂಗ್ಯ ಸೇರಿದಂತೆ ಇನ್ನಿತರ ವ್ಯಾಖ್ಯಾನಗಳೊಂದಿಗೆ ಪ್ರತ್ಯೇಕಿಸಲಿದೆ. ಆರಂಭದಲ್ಲಿಈ ವ್ಯವಸ್ಥೆಯ 12 ಭಾಷೆಗಳಲ್ಲಿ ದೊರೆಯಲಿದೆ ಎಂದು ಫೇಸ್‌ಬುಕ್‌ ತನ್ನ ಬ್ಲಾಗ್‌ನಲ್ಲಿ ಬರೆದುಕೊಂಡಿದೆ.

ದೇಶದಲ್ಲಿ ಕೂಡ ಫೇಸ್‌ಬುಕ್ ಮೂಲಕ ಹರಡುವ ಸುಳ್ಳು ಸುದ್ದಿ, ನಕಲಿ ಪೋಸ್ಟ್‌ಗಳಿಂದ ಹಲವು ರೀತಿಯ ಸಮಸ್ಯೆಯಾಗಿದೆ. ಕೆಲವು ಪ್ರದೇಶಗಳಲ್ಲಿ ಫೇಸ್‌ಬುಕ್ ಮೂಲಕ ಹರಡಿದ ಫೇಕ್‌ ನ್ಯೂಸ್‌ನಿಂದಾಗಿ ಕೋಮುಗಲಭೆ, ಸಂಘರ್ಷ ಸೃಷ್ಟಿಯಾಗಿದೆ. ಹೀಗಾಗಿ ಸೂಕ್ತ ರೀತಿಯಲ್ಲಿ ನಕಲಿ ಸುದ್ದಿ ತಡೆಯಲು ಫೇಸ್‌ಬುಕ್ ಕ್ರಮ ಕೈಗೊಳ್ಳುತ್ತಿದೆ.

Tech Jobs: 2020ರ ಹಾಟ್ ಟೆಕ್ ಜಾಬ್ ಯಾವುದು ಗೊತ್ತೇ?