Hong Kong Protest: ನಕಲಿ ಖಾತೆ ಕಿತ್ತೊಗೆದ ಫೇಸ್‌ಬುಕ್

ಫೇಸ್‌ಬುಕ್‌ನಲ್ಲಿ ಸುಳ್ಳು ಸುದ್ದಿ ಹರಡುವವರ ಸಂಖ್ಯೆ ಜಾಸ್ತಿಯಾಗುತ್ತಿದ್ದು, ನಕಲಿ ಖಾತೆ ಮತ್ತು ಸುದ್ದಿ ಹರಡುವುದನ್ನು ತಡೆಯಲು ಹಲವು ಕ್ರಮ ಕೈಗೊಂಡರೂ ಪ್ರಯೋಜನವಾಗುತ್ತಿಲ್ಲ.

ಹಾಂಗ್‌ಕಾಂಗ್‌ನಲ್ಲಿ ನಡೆಯುತ್ತಿರುವ ಗಡಿಪಾರು ಮಸೂದೆ ಕುರಿತ ಪ್ರತಿಭಟನೆಯ ಸಂದರ್ಭ ಫೇಸ್‌ಬುಕ್ ಬಳಸಿ ವಿವಿಧ ಪೋಸ್ಟ್ ಹಾಕುತ್ತಿದ್ದ ಚೀನಾ ಮೂಲದ ಫೇಸ್‌ಬುಕ್‌ ಖಾತೆಗಳನ್ನು ತೆಗೆದು ಹಾಕಲಾಗಿದೆ.

ದ್ವೇಷದ ಪೋಸ್ಟ್ ಹಾಕುತ್ತಿದ್ದ, ನಕಲಿ ಮತ್ತು ಸುಳ್ಳು ಸುದ್ದಿ ಪ್ರಸಾರ ಮಾಡಿ ಜನರನ್ನು ಯಾಮಾರಿಸುತ್ತಿದ್ದ ನಕಲಿ ಖಾತೆಗಳನ್ನು ಫೇಸ್‌ಬುಕ್ ತೆಗೆದಿದೆ. ಏಳು ಪೇಜ್‌ಗಳು, ಮೂರು ಗ್ರೂಪ್‌ಗಳು ಮತ್ತು ಐದು ಖಾತೆಗಳನ್ನು ಫೇಸ್‌ಬುಕ್ ಕಿತ್ತು ಹಾಕಿದ್ದು, ಇತರ ಹಲವು ಖಾತೆಗಳ ಕುರಿತು ಪರಿಶೀಲನೆ ನಡೆಸಲಾಗುತ್ತಿದೆ. ಅದರ ಬಗ್ಗೆ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಹೇಳಿದೆ.

ಫೇಸ್‌ಬುಕ್‌ನ ಸೈಬರ್ ಸೆಕ್ಯುರಿಟಿ ವಿಭಾಗದ ನಿಯಮ ಮೀರಿರುವ ಖಾತೆಗಳ ವಿರುದ್ಧ ಪರಿಶೀಲನೆ ನಡೆಸಿ, ಅವುಗಳನ್ನು ತೆಗೆದು ಹಾಕಿರುವುದಾಗಿ ಸಂಸ್ಥೆ ಹೇಳಿದೆ. ಜತೆಗೆ ದೂರು ಬಂದಿರುವ ಮತ್ತಷ್ಟು ಖಾತೆಗಳ ವಿರುದ್ಧವೂ ಶೀಘ್ರ ಕ್ರಮ ಕೈಗೊಳ್ಳುವುದಾಗಿ ಫೇಸ್‌ಬುಕ್ ತಿಳಿಸಿದೆ.