Facebook: ನಕಲಿ ಖಾತೆ ರಚಿಸುತ್ತಿದ್ದ ಚೀನಾ ಕಂಪನಿಗಳ ವಿರುದ್ಧ ದಾವೆ

ಸ್ಯಾನ್‌ ಫ್ರಾನ್ಸಿಸ್ಕೋ: ನಕಲಿ ಖಾತೆ ರಚಿಸಿ, ಫೇಕ್ ಲೈಕ್ಸ್ ಮತ್ತು ಕಮೆಂಟ್ಸ್ ನೀಡುತ್ತಿದ್ದ ಚೀನಾ ಮೂಲದ ನಾಲ್ಕು ಕಂಪನಿಗಳು ಮತ್ತು ಮೂವರು ವ್ಯಕ್ತಿಗಳ ವಿರುದ್ಧ ಫೇಸ್‌ಬುಕ್ ದಾವೆ ಹೂಡಿದೆ.

ಅಮೆರಿಕದ ಫೆಡರಲ್ ಕೋರ್ಟ್‌ನಲ್ಲಿ ದಾವೆ ಹೂಡಿರುವ ಫೇಸ್‌ಬುಕ್, ಇದೇ ಕಂಪನಿಗಳು ನಕಲಿ ಖಾತೆ ಮೂಲಕ ಅಮೆಜಾನ್, ಆ್ಯಪಲ್, ಗೂಗಲ್, ಟ್ವಿಟರ್ ಮತ್ತು ಲಿಂಕ್ಡ್‌ಇನ್‌ಗೂ ವಂಚಿಸಿವೆ ಎನ್ನಲಾಗಿದೆ.

ಚೀನಾದ ಸಂಸ್ಥೆಗಳ ವಿರುದ್ಧ ದಾವೆ ಹೂಡಿರುವ ಕುರಿತಂತೆ ಪ್ರತಿಕ್ರಿಯಿಸಿರುವ ಫೇಸ್‌ಬುಕ್‌ನ ಪಾಲ್ ಗ್ರೇವಲ್, ನಮ್ಮ ಬ್ರ್ಯಾಂಡ್ ಮತ್ತು ಟ್ರೇಡ್‌ಮಾರ್ಕ್ ಬಳಸಿಕೊಂಡು ಚೀನಾದ ಸಂಸ್ಥೆ ಅಕ್ರಮ ಎಸಗಿದೆ. ಈ ಕುರಿತು ಹಕ್ಕುಸ್ವಾಮ್ಯ ಮತ್ತು ವಂಚನೆ ಕುರಿತು ಪ್ರಕರಣ ದಾಖಲಿಸಿದ್ದು, ನ್ಯಾಯಾಲಯದ ಮೂಲಕ ಕ್ರಮ ಕೈಗೊಳ್ಳುತ್ತೇವೆ ಎಂದಿದ್ದಾರೆ.

ನಕಲಿ ಖಾತೆ ರಚಿಸಿ, ಅದರ ಮೂಲಕ ಫೇಕ್ ಲೈಕ್ಸ್ ಮತ್ತು ಕಮೆಂಟ್ಸ್‌ ರಚಿಸಿ, ವಂಚಿಸುವ ಕುರಿತು ಫೇಸ್‌ಬುಕ್ ಎಚ್ಚರಿಕೆ ನೀಡುತ್ತಿದೆ.

ಅಲ್ಲದೆ ನಕಲಿ ಖಾತೆ ಮತ್ತು ವಂಚನೆ ಕುರಿತು ಕ್ರಮ ಕೈಗೊಳ್ಳಲು ಪೇಸ್‌ಬುಕ್ ಮುಂದಾಗಿದ್ದು, ದಾವೆ ಹೂಡಲಾಗಿರುವ ಚೀನಾದ ಕಂಪನಿ ಮತ್ತು ವ್ಯಕ್ತಿಗಳ ಹೆಸರನ್ನು ಬಹಿರಂಗಪಡಿಸಿಲ್ಲ. ಫೇಸ್‌ಬುಕ್ ಮಾತ್ರವಲ್ಲದೆ, ಇನ್‌ಸ್ಟಾಗ್ರಾಂನಲ್ಲೂ ನಕಲಿ ಖಾತೆ ರಚಿಸಿ ವಂಚಿಸಲಾಗುತ್ತಿತ್ತು ಎಂದು ಫೇಸ್‌ಬುಕ್ ಹೇಳಿದೆ.