Facebook: ಕ್ರಿಪ್ಟೋಕರೆನ್ಸಿ ಬಿಡುಗಡೆಗೆ ಸಿದ್ಧತೆ

ಸಾಮಾಜಿಕ ಜಾಲತಾಣದ ದಿಗ್ಗಜ ಫೇಸ್‌ಬುಕ್‌, ತನ್ನ ಕ್ರಿಪ್ಟೋಕರೆನ್ಸಿ 'ಲಿಬ್ರಾ' ವನ್ನು ಬಿಡುಗಡೆ ಮಾಡಲು ಸಿದ್ಧತೆ ನಡೆಸಿದೆ. ಈ ಬಗ್ಗೆ ಮುಂದಿನ ವಾರ ಪ್ರಕಟಣೆ ಹೊರಬೀಳುವ ಸಾಧ್ಯತೆ ಇದೆ.

ಕ್ಯಾಲಿಫೋರ್ನಿಯಾ ಮೂಲದ ಫೇಸ್‌ಬುಕ್‌ ಕಂಪನಿಯು ಕ್ರಿಪ್ಟೋಕರೆನ್ಸಿ ಆಧರಿಸಿದ ಹಣಕಾಸು ಮತ್ತು ಇಂಟರ್ನೆಟ್‌ ಸೇವೆಗಳ ಯೋಜನೆಯನ್ನು ಜಾರಿಗೊಳಿಸಲಿದೆ. ವೀಸಾ, ಮಾಸ್ಟರ್‌ಕಾರ್ಡ್‌, ಪೇಪಾಲ್‌, ಉಬರ್‌, ಸ್ಟ್ರೈಪ್‌ ಸೇರಿದಂತೆ ನಾನಾ ಕಂಪನಿಗಳು ಫೇಸ್‌ಬುಕ್‌ ಜೊತೆ ಈ ಸಂಬಂಧ ಒಪ್ಪಂದ ಮಾಡಿಕೊಂಡಿವೆ ಎಂದು 'ವಾಲ್‌ ಸ್ಟ್ರೀಟ್‌ ಜನರಲ್‌' ವರದಿಯಲ್ಲಿ ಹೇಳಲಾಗಿದೆ.

ಪ್ರತಿ ಕಂಪನಿಯೂ 10 ದಶಲಕ್ಷ ಡಾಲರ್‌ ಅನ್ನು ಈ ಕರೆನ್ಸಿ ಅಭಿವೃದ್ಧಿಯ ಯೋಜನೆಗೆ ವಿನಿಯೋಗಿಸಲಿವೆ. ಈ ಸಹಭಾಗಿತ್ವದಿಂದ ಕಂಪನಿಗಳು ಹೆಚ್ಚಿನ ಅನುಕೂಲ ಪಡೆಯುವ ಅವಕಾಶಗಳಿವೆ ಎಂದೂ ವರದಿಯಲ್ಲಿ ಹೇಳಲಾಗಿದೆ.

ಜೂ.18ರಂದು ಕ್ರಿಪ್ಟೋ ಕರೆನ್ಸಿಯನ್ನು ಫೇಸ್‌ಬುಕ್‌ ಪ್ರಕಟಿಸಲಿದ್ದು, ಪೂರ್ಣ ಪ್ರಮಾಣದಲ್ಲಿ ಈ ಯೋಜನೆಯು 2020ರಲ್ಲಿ ಜಾರಿಗೆ ಬರಲಿದೆ.

ಭಾರತದಲ್ಲಿ ಹೇಗೆ?ಭಾರತೀಯ ಮಾರುಕಟ್ಟೆಯಲ್ಲಿ 30 ಕೋಟಿಗೂ ಅಧಿಕ ಫೇಸ್‌ಬುಕ್‌ ಬಳಕೆದಾರರಿದ್ದು, ದೊಡ್ಡ ಜಾಲವನ್ನು ಹೊಂದಿದೆ. ಇದನ್ನು ಆಧರಿಸಿ ತನ್ನ ಕ್ರಿಪ್ಟೋಕರೆನ್ಸಿಯನ್ನು ಜನಪ್ರಿಯಗೊಳಿಸುವುದು ಫೇಸ್‌ಬುಕ್‌ ಲೆಕ್ಕಾಚಾರ. ಆದರೆ, ಕ್ರಿಪ್ಟೋಕರೆನ್ಸಿಯನ್ನು ಆರ್‌ಬಿಐ ಕಳೆದ ವರ್ಷ ನಿರ್ಬಂಧಿಸಿದೆ. ಆದಾಗ್ಯೂ, ಡಿಜಿಟಲ್‌ ಟೋಕನ್‌ಗಳನ್ನು ವಿನಿಮಯ ಮಾಡಿಕೊಳ್ಳಲು ಯಾವ ಬಳಕೆದಾರನನ್ನೂ ತಡೆಯುವ ಕಾನೂನುಗಳು ಸದ್ಯಕ್ಕಿಲ್ಲ.