Fake FaceApp: ಎಚ್ಚರಿಕೆ, ನಕಲಿ ಆ್ಯಪ್ ನಿಮ್ಮ ಡಾಟಾ ಕದಿಯಬಹುದು!

ಫೇಸ್‌ಆ್ಯಪ್ ಕ್ರೇಜ್‌ ಇದ್ದಕ್ಕಿದ್ದಂತೆ ಟ್ರೆಂಡ್ ಆಗಿದ್ದು, ಯುವಕರು ಅತಿಯಾಗಿ ಬಳಸುತ್ತಿದ್ದಾರೆ. ಫೇಸ್‌ಆ್ಯಪ್ ಕ್ರೇಜ್‌ನಿಂದಾಗಿ ಜನರು ಪ್ಲೇಸ್ಟೋರ್‌ ಅಥವಾ ಥರ್ಡ್‌ ಪಾರ್ಟಿ ಆ್ಯಪ್‌ಗಳನ್ನು ಹಿಂದೆಮುಂದೆ ನೋಡದೇ ಡೌನ್‌ಲೋಡ್ ಮಾಡಿಕೊಳ್ಳುತ್ತಿದ್ದಾರೆ.

ಆದರೆ ನೈಜ್ ಫೇಸ್‌ಆ್ಯಪ್‌ ಅನ್ನೇ ಹೋಲುವ ಹಲವು ನಕಲಿ ಫೇಸ್‌ಆ್ಯಪ್‌ಗಳಿದ್ದು, ಅದರ ಮೂಲಕ ಮೊಬಿಡ್ಯಾಶ್ ಎಂಬ ಆಡ್‌ವೇರ್ ಒಂದು ಸ್ಮಾರ್ಟ್‌ಫೋನ್ ಪ್ರವೇಶಿಸುತ್ತಿದೆ. ಇದರಿಂದ ನಿಮ್ಮ ಖಾಸಗಿ ದತ್ತಾಂಶ ಕಳವಾಗುವ ಸಾಧ್ಯತೆಯಿದೆ.

ಫೋನಿನಲ್ಲಿರುವ ಮಾಹಿತಿಯನ್ನು ನಕಲಿ ಆ್ಯಪ್ ಕದ್ದು, ತನ್ನ ಸರ್ವರ್‌ಗೆ ರವಾನಿಸುತ್ತದೆ. ಅದರಿಂದ ಬಳಕೆದಾರರ ಡಾಟಾ ಸುಲಭದಲ್ಲಿ ಹ್ಯಾಕರ್‌ಗಳ ಕೈಸೇರಿ ಸಮಸ್ಯೆಗೆ ತುತ್ತಾಗುವ ಸಾಧ್ಯತೆಯಿದೆ.

ಅಲ್ಲದೆ ನೈಜ ಫೇಸ್‌ಆ್ಯಪ್ ಫೋಟೋಗಳು ಕೂಡ ಕ್ಲೌಡ್‌ನಲ್ಲಿ ಶೇಖರವಾಗುತ್ತಿದ್ದು, ಬಳಕೆದಾರರ ಫೋಟೋವನ್ನು ಹೇಗೆ ಬೇಕಾದರೂ ಬಳಸಿಕೊಳ್ಳಬಹುದು ಎಂದು ಅದು ಹೇಳಿದೆ.

ಹೀಗಾಗಿ ಗ್ರಾಹಕರ ಮಾಹಿತಿ ರಕ್ಷಣೆಯ ಸಮಸ್ಯೆ ಎದುರಾಗಿದ್ದು, ಖಾಸಗಿ ಮಾಹಿತಿ ಸೋರಿಕೆಗೂ ಮುನ್ನ ಎಚ್ಚರಿಕೆ ವಹಿಸಬಹುದಾಗಿದೆ. ಈ ಕುರಿತು ಕಾಸ್ಪರ್‌ಸ್ಕೈ ಕೂಡ ಎಚ್ಚರಿಕೆ ನೀಡಿದೆ.