'ಎಫ್‌ಬಿಐ' ನಿಂದ ಮಹತ್ವದ ಎಚ್ಚರಿಕೆ: ಅಮೆರಿಕಾದಲ್ಲಿ ಮತ್ತೆ ಟಿಕ್‌ಟಾಕ್ ನಿಷೇಧ?

ಚೀನಾ ಮೂಲದ ಜನಪ್ರಿಯ ಶಾರ್ಟ್ ವಿಡಿಯೋ ಅಪ್ಲಿಕೇಶನ್ ಟಿಕ್‌ಟಾಕ್ ಮೇಲೆ ಮತ್ತೆ ನಿಷೇಧ ಹೇರಲು ಅಮೆರಿಕಾ ಚಿಂತನೆ ನಡೆಸುತ್ತಿದೆ ಎಂದು ಹೇಳಲಾಗಿದೆ. ಅಮೆರಿಕಾ ದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಟಿಕ್‌ಟಾಕ್ ಆಪ್ ಆಲ್ಗಾರಿದಂ ಮೇಲೆ ಚೀನಾ ಸರ್ಕಾರ ನಿಯಂತ್ರಣ ಹೊಂದಿದ್ದು, ಈ ಟಿಕ್‌ಟಾಕ್ ಆಪ್ ದೇಶದ ಭದ್ರತೆಗೆ ಅಪಾಯ ತರುತ್ತಿದೆ ಎಂದು ಎಫ್‌ಬಿಐ ಅಮೆರಿಕಾ ಸರ್ಕಾರಕ್ಕೆ ಎಚ್ಚರಿಸಿದೆ. ಇದರಿಂದ ಅಮೆರಿಕಾದಲ್ಲಿ ಟಿಕ್‌ಟಾಕ್ ಅಪ್ಲಿಕೇಶನ್ ಮೇಲೆ ಮತ್ತೊಮ್ಮೆ ನಿಷೇಧ ಹೇರಬಹುದು ಎಂದು ವರದಿಗಳು ತಿಳಿಸಿವೆ.

ಎಫ್‌ಬಿಐ ಪ್ರಕಾರ, ಅಮೆರಿಕಾದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಟಿಕ್‌ಟಾಕ್ ಬಳಕೆದಾರರ ಮನಸ್ಸಿಗೆ ಘಾಸಿಯಾಗುವಂತೆ ವಿಡಿಯೊ ಕಂಟೆಂಟ್‌ಗಳನ್ನು ಬದಲಾಯಿಸುತ್ತಿದೆ ಹಾಗೂ ದೇಶದ ಭದ್ರತೆಗೆ ಅಪಾಯ ಉಂಟುಮಾಡುತ್ತಿದೆ. ಅಮೆರಿಕಾಗೆ ಪ್ರತ್ಯೇಕ ಆಲ್ಗಾರಿದಂ ಬಳಕೆ ಮಾಡುವ ಮೂಲಕ ಆಂತರಿಕ ಧಕ್ಕೆ ಉಂಟುಮಾಡುತ್ತಿದೆ ಇದಲ್ಲದೇ, ಟಿಕ್‌ಟಾಕ್ ಒಡೆತನವನ್ನು ಹೊಂದಿರುವ ಬೈಟ್‌ಡ್ಯಾನ್ ಕಂಪೆನಿ ಅಮೆರಿಕಾ ಸರ್ಕಾರದ ಜೊತೆಗೆ ಸಮರ್ಪಕವಾಗಿ ಮಾಹಿತಿ ಹಂಚಿಕೊಳ್ಳುತ್ತಿಲ್ಲ ಎಂದು ಎಫ್‌ಬಿಐ ಸರ್ಕಾರಕ್ಕೆ ಎಚ್ಚರಿಸಿದೆ.

ಬೈಟ್‌ಡ್ಯಾನ್ಸ್ ಒಡೆತನದ ಟಿಕ್‌ಟಾಕ್ ಅಪ್ಲಿಕೇಶನ್ ಮತ್ತು ಮೆಸೇಜಿಂಗ್ ಅಪ್ಲಿಕೇಶನ್ ವಿಚಾಟ್ ಮೇಲೆ ಅಮೆರಿಕ ಸರಕಾರ ಈ ಮೊದಲೇ ಒಮ್ಮೆ ನಿಷೇಧ ಹೇರಿತ್ತು. ಆ ನಂತರ ಪ್ರತಿಕ್ರಿಸಿದ್ದ ಟಿಕ್‌ಟಾಕ್ ಅಮೆರಿಕದಲ್ಲಿ ತನ್ನ ಕಾರ್ಯನಿರ್ವಹಣೆಯನ್ನು ಮಾತ್ರ ಮಾಡುತ್ತೇವೆ, ಆದರೆ ಸೋರ್ಸ್ ಕೋಡ್ ಅನ್ನು ಮಾರಾಟ ಮಾಡುವುದಿಲ್ಲ ಎಂದು ಹೇಳಿತ್ತು. ಜತೆಗೆ ಅಮೆರಿಕದಲ್ಲಿ ಅಗತ್ಯವಿದ್ದರೆ, ಪ್ರತ್ಯೇಕ ಕೋಡ್ ಒದಗಿಸುತ್ತೇವೆ ಎಂದು ಹೇಳಿ ವಾಪಸ್ ಬಂದಿತ್ತು. ಇದೀಗ ಇವೆಲ್ಲವೂ ಚೀನಾ ಸರ್ಕಾರದ ಕುತಂತ್ರ ಎಂದು ಹೇಳಲಾಗಿದೆ.

ಭಾರತದಲ್ಲಿಯೂ ನಿಷೇಧವಾಗಿದೆ!
ಚೀನಾ ಮೂಲದ ಮೊಬೈಲ್ ಅಪ್ಲಿಕೇಶನ್‌ಗಳು ದೇಶದ ಭದ್ರತೆಗೆ ಅಪಾಯ ತಂದೊಡ್ಡುತ್ತಿವೆ ಎಂದು ಭಾರತ ಸರ್ಕಾರವು ಎಲ್ಲಾ ಚೀನಾ ಅಪ್ಲಿಕೇಶನ್‌ಗಳನ್ನು ನಿಷೇಧಿಸಿದೆ. ಇವುಗಳ ಪೈಕಿ ಜನಪ್ರಿಯ ಟಿಕ್‌ಟಾಕ್ ಅಪ್ಲಿಕೇಶನ್ ಭಾರತದಲ್ಲಿ ಅತಿಹೆಚ್ಚು ಬಳಕೆದಾರರನ್ನು (20 ಕೋಟಿಗೂ ಹೆಚ್ಚು) ಹೊಂದಿತ್ತು. ದೇಶದಲ್ಲಿ ಟಿಕ್‌ಟಾಕ್ ಆಪ್‌ ನಿಷೇಧಿಸಿದ ಪರಿಣಾಮ ಟಿಕ್‌ಟಾಕ್‌ನ ಮಾತೃ ಕಂಪನಿ ಬೈಟ್‌ಡ್ಯಾನ್ಸ್‌ಗೆ 45,000 ಕೋಟಿ ರು. (ಸುಮಾರು 6 ಬಿಲಿಯನ್‌ ಡಾಲರ್‌) ನಷ್ಟವಾಗಿತ್ತು ಎಂದು ಹಲವು ಮಾರುಕಟ್ಟೆ ವಿಶ್ಲೇಷಣೆಗಳು ತಿಳಿಸಿದ್ದವು.

ಇಲ್ಲಿ ಗಮನಿಸಬೇಕಾದ ಮತ್ತೊಂದು ಸಂಗತಿಯೆಂದರೆ, ಟಿಕ್‌ಟಾಕ್‌ಗೆ ಭಾರತದ ಮಾರುಕಟ್ಟೆಯೇ ಅತಿದೊಡ್ಡ ಮಾರುಕಟ್ಟೆಯೇನೂ ಆಗಿರಲಿಲ್ಲ. ಟಿಕ್‌ಟಾಕ್ ವಿಶ್ವದ ಹಲವು ದೊಡ್ಡ ಮಾರುಕಟ್ಟೆಗಳಲ್ಲಿ ಟಿಕ್‌ಟಾಕ್ ಬೇರೂರಿದೆ. ಇದೀಗ ಅಮೆರಿಕಾದಲ್ಲಿ ಟಿಕ್‌ಟಾಕ್ ಬ್ಯಾನ್ ಆದರೆ ಮತ್ತೊಂದು ದೊಡ್ಡ ಮಾರುಕಟ್ಟೆಯನ್ನು ಟಿಕ್‌ಟಾಕ್ ಕಳೆದುಕೊಂಡಂತಾಗುತ್ತದೆ. ಟಿಕ್‌ಟಾಕ್ ಆಪ್ ಆಲ್ಗಾರಿದಂ ಮೇಲೆ ಚೀನಾ ಸರ್ಕಾರ ನಿಯಂತ್ರಣ ಹೊಂದಿರುವ ಸುದ್ದಿಯಿಂದಾಗಿ ಮತ್ತಷ್ಟು ಕಡೆಗಳಲ್ಲಿ ಟಿಕ್‌ಟಾಕ್ ಅಪ್ಲಿಕೇಶನ್ ನಿಷೇಧವಾಗುವ ಸಾಧ್ಯತೆ ಇದೆ.