Mobile Service: ದೇಶದ ಮೊದಲ ಮೊಬೈಲ್‌ ಕಾಲ್‌ಗೆ 25 ವರ್ಷ!

25 ವರ್ಷಗಳ ಹಿಂದೆ ಭಾರತದಲ್ಲಿ ಮೊಬೈಲ್‌ ಫೋನ್‌ ಸೇವೆ ಆರಂಭವಾಯಿತು. ಆಗ ಮೊಬೈಲ್‌ ಕರೆ ಶುಲ್ಕ ನಿಮಿಷಕ್ಕೆ ರೂ. 8.40 ಇತ್ತು. ಫೋನ್‌ ಟ್ರಾಫಿಕ್‌ ಹೆಚ್ಚಿದ್ದ ಅವಧಿಯಲ್ಲಿ ನಿಮಿಷಕ್ಕೆ ರೂ.16.80ಕ್ಕೂ ಏರುತ್ತಿತ್ತು. ಆರಂಭದಲ್ಲಿ ಹೊರಹೋಗುವ ಕರೆಗಳಿಗಷ್ಟೇ ಅಲ್ಲ, ಸ್ವೀಕರಿಸುವ ಕರೆಗಳಿಗೂ ಗ್ರಾಹಕ ಶುಲ್ಕ ತೆರಬೇಕಿತ್ತು. ಆದರೆ, ಟೆಲಿಕಾಂ ವಲಯದೊಳಗಿನ ಸ್ಪರ್ಧೆಯಿಂದಾಗಿ, ಇಂದು ಮೊಬೈಲ್‌ ಶುಲ್ಕಗಳು ಅಗ್ಗವಾಗಿವೆ.

ಡೇಟಾಕ್ಕಷ್ಟೇ ಹಣ ಪಾವತಿಸಿ ಉಚಿತ ಕರೆ ಮಾಡುವ ಅವಕಾಶವೂ ಇದೆ. 25 ವರ್ಷಗಳ ಹಿಂದೆ ಅಂದರೇ, 1995ರ ಜುಲೈ 31ರಂದು ಭಾರತದಲ್ಲಿ ಮೊದಲ ಬಾರಿಗೆ ಮೊಬೈಲ್‌ ಸೇವೆಗೆ ಚಾಲನೆ ಸಿಕ್ಕಿತು.

ದೇಶದಲ್ಲಿ ಮೊದಲ ಕರೆಯೊಂದಿಗೆ ಮೊಬೈಲ್‌ಗೆ ಚಾಲನೆ ನೀಡಿದ್ದು, ಅಂದಿನ ಟೆಲಿಕಾಂ ಸಚಿವ ಸುಖರಾಮ್‌. ಅಂದು ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿಯಾಗಿದ್ದ ಜ್ಯೋತಿ ಬಸು ಅವರಿಗೆ ಕರೆ ಮಾಡಿದ್ದ ಸುಖರಾಮ್‌, ಸಂಚಲನ ಹುಟ್ಟಿಸುವ ಹೊಸ ಸೇವೆಗೆ ನಾಂದಿಯಾಡಿದ್ದರು. ಅಂದು ಈ ಇಬ್ಬರೂ ಬಳಸಿದ್ದು ನೋಕಿಯಾ ಮೊಬೈಲ್‌ ಆಗಿತ್ತು. ಮೋದಿ-ಟೆಸ್ಟ್ರಾದ ಮೊಬೈಲ್‌ನೆಟ್‌ ಸರ್ವಿಸ್ ಅಂದು ಬಳಕೆಯಾಗಿತ್ತು. ಸೆಲ್ಯುಲರ್‌ ಸೇವೆ ನೀಡಲು ಭಾರತದಲ್ಲಿ ಪರವಾನಗಿ ಪಡೆದಿದ್ದ ಕಂಪನಿಗಳಲ್ಲಿ ಮೋದಿ ಟೆಸ್ಟ್ರಾ ಸಹಾ ಒಂದು. ಇದು ನಂತರದ ದಿನಗಳಲ್ಲಿ ಸ್ಪೈಸ್‌ ಆಗಿ ಬದಲಾಯಿತು.

ಪ್ರಸ್ತುತ ದೇಶದಲ್ಲಿ ರಿಲಯನ್ಸ್ ಜಿಯೋ, ಭಾರ್ತಿ ಏರ್‌ಟೆಲ್, ವೊಡಾಫೋನ್ ಐಡಿಯಾ ಮತ್ತು ಬಿಎಸ್‌ಎನ್‌ಎಲ್ ಪ್ರಮುಖ ಟೆಲಿಕಾಂ ಸೇವಾ ಕಂಪನಿಗಳಾಗಿವೆ.

BlackRock Virus: ನಿಮ್ಮ ಮೊಬೈಲ್‌ಗೂ ಹೊಕ್ಕಬಹುದು ‘ಬ್ಲ್ಯಾಕ್‌ರಾಕ್‌’ ವೈರಸ್‌!