ಗೂಗಲ್ ಪೇನಲ್ಲಿ ಇನ್ನು ಫಿಕ್ಸೆಡ್ ಡೆಪಾಸಿಟ್ ಮಾಡಿ !..ಬಡ್ಡಿ ದರ ಎಷ್ಟು ಗೊತ್ತಾ?

ಆನ್‌ಲೈನ್ ಪಾವತಿ ಸೇವೆಯಲ್ಲಿ ಜನಪ್ರಿಯವಾಗಿರುವ ಪ್ರತಿಷ್ಠಿನ ಗೂಗಲ್ ಕಂಪೆನಿ ಒಡೆತನದ 'ಗೂಗಲ್ ಪೇ' ಆಪ್ ಇದೀಗ ಹೊಸದೊಂದು ವಿಶೇಷ ಸೇವೆ ನೀಡಲು ಮುಂದಾಗಿದೆ. ಯಾವಾಗಲೂ ತನ್ನ ಸೇವೆಗಳ ಪಟ್ಟಿಯನ್ನು ವಿಸ್ತರಿಸಿಕೊಳ್ಳುತ್ತಾ ಸಾಗುತ್ತಿರುವ ಡಿಜಿಟಲ್ ಪಾವತಿ ಆಪ್ ಗೂಗಲ್ ಪೇ ಮೂಲಕ ಇನ್ಮುಂದೆ ನಿಶ್ಚಿತ ಠೇವಣಿ (ಎಫ್ ಡಿ) ತೆರೆಯಲು ಶೀಘ್ರವೇ ಅವಕಾಶ ಸಿಗಲಿದೆ. ಇದರಿಂದ ನೀವು ನಿಮ್ಮ ಹಣವನ್ನು ಗೂಗಲ್ ಪೇನಲ್ಲಿ ಫಿಕ್ಸೆಡ್ ಇಟ್ಟು ಅದಕ್ಕೆ ಬಡ್ಡಿಯನ್ನು ಪಡೆಯಬಹುದು.!

ಭಾರತೀಯ ಫಿನ್‌ಟೆಕ್ ಸ್ಟಾರ್ಟಪ್ ಕಂಪೆನಿ ಸೇತು ಜೊತೆಗೆ ಗೂಗಲ್ ಇತ್ತೀಚೆಗೆ ಘೋಷಿಸಿದ ಪಾಲುದಾರಿಕೆಯ ಭಾಗವಾಗಿ ಈ ಸೇವೆ ಬರುತ್ತಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿದ್ದು, ಗೂಗಲ್ ಪೇ ಆರಂಭದಲ್ಲಿ ತನ್ನ ಬಳಕೆದಾರರ ಈಕ್ವಿಟಾಸ್ ಸ್ಮಾಲ್ ಫೈನಾನ್ಸ್ ಬ್ಯಾಂಕ್‌ನ ಎಫ್‌ಡಿಗಳನ್ನು ಒಂದು ವರ್ಷದವರೆಗೆ ನೀಡುತ್ತದೆ ಎಂದು ಸೂಚಿಸುತ್ತದೆ. ನಂತರ ಉಜ್ಜೀವನ್ ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಮತ್ತು ಎಯು ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಕೂಡ ಶೀಘ್ರದಲ್ಲೇ ಪಟ್ಟಿಗೆ ಸೇರುವ ನಿರೀಕ್ಷೆಯಿದೆ.

ಗೂಗಲ್ ಪೇನಲ್ಲಿ ಫಿಕ್ಸೆಡ್ ಡೆಪಾಸಿಟ್ ಗರಿಷ್ಠ ಬಡ್ಡಿದರವನ್ನು ಶೇಕಡಾ 6.35 ಕ್ಕೆ ನಿಗದಿಪಡಿಸಲಾಗಿದ್ದು, ವರದಿಯ ಪ್ರಕಾರ, ಕಂಪನಿಯು ಈಗಾಗಲೇ ಆಪ್‌ನಲ್ಲಿ ಪರೀಕ್ಷಾ ಆವೃತ್ತಿಯನ್ನು ರಚಿಸಿದ್ದು ಅದು ಎಫ್‌ಡಿಗಳಿಗಾಗಿ ವಿವಿಧ ಅವಧಿಗಳನ್ನು ನೀಡುತ್ತದೆ. ಇವುಗಳಲ್ಲಿ 7-29 ದಿನಗಳು, 30-45 ದಿನಗಳು, 46-90 ದಿನಗಳು, 91-180 ದಿನಗಳು, 181-364 ದಿನಗಳು ಮತ್ತು 365 ದಿನಗಳಿದ್ದು, ಶೇಕಡಾ 3.5 ಕಡಿಮೆ ಬಡ್ಡಿದರದೊಂದಿಗೆ ರಿಂದ ಶೇ 6.35 % ವರೆಗೆ ಬಡ್ಡಿದರಗಳು ಸೇರಿವೆ.

ನೀವು ಕೂಡ ಗೂಗಲ್ ಪೇನಲ್ಲಿ ಫಿಕ್ಸೆಡ್ ಡೆಪಾಸಿಟ್ ಇಡಬೇಕು ಎಂದರೆ, ಗೂಗಲ್ ಪೇ ಬಳಕೆದಾರರುಬಳಕೆದಾರರು ಆಧಾರ್ ಆಧಾರಿತ KYC (ನಿಮ್ಮ ಗ್ರಾಹಕರನ್ನು ತಿಳಿದುಕೊಳ್ಳಿ) ಪ್ರಕ್ರಿಯೆಯನ್ನು ಅನುಸರಿಸಿ ಸೈನ್ ಅಪ್ ಮಾಡಬೇಕಾಗುತ್ತದೆ. ಇದನ್ನು ಒನ್-ಟೈಮ್ ಪಾಸ್‌ವರ್ಡ್ (OTP) ಮೂಲಕ ಸಕ್ರಿಯಗೊಳಿಸಲಾಗುತ್ತದೆ. ಒಮ್ಮೆ ಫಿಕ್ಸೆಡ್ ಇಟ್ಟಿರುವ ಹಣಕ್ಕೆ ವಾಯಿದೆ ಮುಗಿದ ನಂತರವಷ್ಟೇ ಬಡ್ಡಿಯ ಹಣ ಸಿಗಲಿದೆ. ಮುಂಚಿತವಾಗಿ ಹಣ ಪಡೆದುಕೊಂಡರೆ ಹೆಚ್ಚುವರಿ ಇಂಟ್ರೆಸ್ಟ್ ಹಣ ಸಿಗುವುದಿಲ್ಲ.

ಈಗಾಗಲೇ ಗೂಗಲ್ ಪೇ ಆಪ್‌ ಮೂಖಾಂತರವೇ ಚಿನ್ನವನ್ನು ಖರೀದಿಸಬಹುದಾದ, ರೇಲ್ವೆ ಟಿಕೆಟ್ ಬುಕ್ಕಿಂಗ್ ಮಾಡುವ ಸೌಲಭ್ಯಗಳನ್ನು ಒದಗಿಸುತ್ತಿರುವ ಗೂಗಲ್, ಇದೀಗ ನಿಶ್ಚಿತ ಠೇವಣಿ (ಎಫ್ ಡಿ) ತೆರೆಯಲು ಶೀಘ್ರವೇ ಅವಕಾಶ ನೀಡುವ ಮೂಲಕ ಗ್ರಾಹಕರನ್ನು ಸೆಳೆಯಲು ಪ್ರಯತ್ನಿಸುತ್ತಿದೆ. ಗೂಗಲ್ ಪೇ ದೇಶದಲ್ಲಿ ಡಿಜಿಟಲ್ ಪಾವತಿಗಳಿಗೆ ಜನಪ್ರಿಯ ವೇದಿಕೆಯಾಗಿದ್ದು, ಈ ಆಪ್ ಭಾರತದಲ್ಲಿ ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ 10 ಕೋಟಿಗೂ ಅಧಿಕ ಡೌನ್‌ಲೋಡ್‌ಗಳನ್ನು ಹೊಂದಿದೆ.