ಬೀದಿಗಿಳಿದ Google: ಸೆಲ್ಫೀ ಮಾಹಿತಿ ನೀಡಿ, 5 ಡಾಲರ್ ಪಡೆಯಿರಿ!

ಗೂಗಲ್ ತನ್ನ ಅತ್ಯಾಧುನಿಕ ಪಿಕ್ಸೆಲ್ 4 ಸ್ಮಾರ್ಟ್‌ಫೋನ್‌ಗಾಗಿ ಮುಖಚಹರೆ ಗುರುತಿಸುವ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸುತ್ತಿದ್ದು, ಈ ಕುರಿತ ಸಂಶೋಧನೆಗೆ ಅದು ಬೇರೆಯೇ ಮಾರ್ಗ ತುಳಿದಿದೆ. ಸರ್ಚ್ ಎಂಜಿನ್ ಕಂಪನಿಯ ಉದ್ಯೋಗಿಗಳು ನ್ಯೂಯಾರ್ಕ್‌ನ ಬೀದಿಗಳಲ್ಲಿ ಅಲೆಯುತ್ತಿದ್ದು, ಜನರಿಂದ ಅವರ ಮುಖಚಹರೆ ದಾಖಲಿಸಿಕೊಳ್ಳಲು ಮನವಿ ಮಾಡಿಕೊಳ್ಳುತ್ತಿದ್ದಾರೆ.

ಇದಕ್ಕೆ ಅಲ್ಲಿ ಓಡಾಡುತ್ತಿರುವ ಜನರಿಗೆ ಭರ್ಜರಿ ಕೊಡುಗೆಯೇ ಇದೆ. ಮುಖ ಚಹರೆ ದಾಖಲಿಸಲು ಅನುಮತಿ ಕೊಟ್ಟವರೆಲ್ಲರಿಗೂ 5 ಡಾಲರ್ (ಅಂದರೆ ಸುಮಾರು 350 ರೂ.) ನೀಡಲಾಗುತ್ತದೆಯಂತೆ. ಅಂದರೆ, ಗೂಗಲ್ ಉದ್ಯೋಗಿಗಳು ಮುಖದ ಸ್ಕ್ಯಾನಿಂಗ್ ಮಾಡಲು ನಿಮ್ಮ ಅನುಮತಿ ಪಡೆಯುತ್ತಾರೆ ಮತ್ತು ನೀವು ಈ ಕುರಿತ ಸಮ್ಮತಿ ಪತ್ರಕ್ಕೆ ಸಹಿ ಹಾಕಬೇಕಾಗುತ್ತದೆ. ಆ ಬಳಿಕ 5 ಡಾಲರ್ ಮೌಲ್ಯದ ಗಿಫ್ಟ್ ಕೂಪನ್ ನಿಮಗೆ ನೀಡಲಾಗುತ್ತದೆ. ಡೇಟಾ ಸಂಗ್ರಹಣೆಯ ಈ ಹೊಸ ವಿಧಾನ ಇದೀಗ ಹಲವಾರು ನಗರಗಳಿಗೆ ವ್ಯಾಪಿಸಿದೆ ಎಂದು ವರದಿಯಾಗಿದೆ.

ಪಿಕ್ಸೆಲ್ 4 ಫೋನ್‌ನಲ್ಲಿ ಮುಖ ಚಹರೆಯ ಮೂಲಕ ಸ್ಕ್ರೀನ್ ಅನ್‌ಲಾಕ್ ಮಾಡುವ ಫೇಸ್ ರೆಕಗ್ನಿಷನ್ ತಂತ್ರಜ್ಞಾನವಿದೆ. ಫೋನ್ ಬಿಡುಗಡೆಗೆ ಮುನ್ನ ಈ ವೈಶಿಷ್ಟ್ಯವನ್ನು ಅದರಲ್ಲಿ ಅಳವಡಿಸಿ, ತಂತ್ರಜ್ಞಾನವು ಪರ್ಫೆಕ್ಟ್ ಆಗಿ ಕೆಲಸ ಮಾಡುವಂತೆ ಮಾಡುವುದು ಗೂಗಲ್ ಉದ್ದೇಶ.

ಈ ವರ್ಷಾಂತ್ಯದಲ್ಲಿ ಪಿಕ್ಸೆಲ್ 4 ಬಿಡುಗಡೆಯಾಗಲಿದೆ. ಫೋನ್ ಅನ್‌ಲಾಕ್ ಮಾಡುವುದಕ್ಕಾಗಿ ಫೇಸ್ ರೆಕಗ್ನಿಷನ್ ತಂತ್ರಜ್ಞಾನವನ್ನು ಮುಂದಿನ ಪೀಳಿಗೆಯ ಕ್ರಾಂತಿಗೆ ಪೂರಕವಾಗುವಂತೆ ಅಭಿವೃದ್ಧಿಪಡಿಸುವ ನಿಟ್ಟಿನಲ್ಲಿ, ಗೂಗಲ್ ಉದ್ಯೋಗಿಗಳು ಬೀದಿ ಬೀದಿಯಲ್ಲಿ ಸುತ್ತಾಡಿ ಮುಖದ ಚರ್ಯೆಗಳ ಸ್ಯಾಂಪಲ್ ಸಂಗ್ರಹಿಸುತ್ತಿದ್ದಾರೆ ಎಂದು ZDNet ವರದಿ ಮಾಡಿದೆ.

ಸಮ್ಮತಿ ನೀಡಿದ ಬಳಿಕ, ದೊಡ್ಡ ಪೆಟ್ಟಿಗೆಯೊಳಗೆ ಇರಿಸಲಾಗಿರುವ, ಪಿಕ್ಸೆಲ್ 4 ಎನ್ನಲಾಗುತ್ತಿರುವ ಫೋನ್‌ನಲ್ಲಿ ಬಳಕೆದಾರರು ಸೆಲ್ಫೀ ಮೋಡ್ ಮೂಲಕ ಫೋಟೋ ತೆಗೆಯಬೇಕಾಗುತ್ತದೆ. ವಿಭಿನ್ನ ಕೋನಗಳಲ್ಲಿ ಸೆಲ್ಫೀ ತೆಗೆದುಕೊಳ್ಳಬೇಕಾಗುತ್ತದೆ. ಇದಕ್ಕೆ ಪ್ರತಿಯಾಗಿ ಅವರಿಗೆ ಅಮೆಜಾನ್ ಅಥವಾ ಸ್ಟಾರ್‌ಬಕ್ಸ್‌ನ 4 ಡಾಲರ್ ಮೌಲ್ಯದ ಗಿಫ್ಟ್ ಕೂಪನ್ ಸಿಗಲಿದೆ.

ಇದು ಜನರ ಮಾಹಿತಿ ಗೌಪ್ಯತೆಯ ಉಲ್ಲಂಘನೆ ಎಂಬುದು ಹೌದಾದರೂ, ಗೂಗಲ್ ಬಳಿ ನಮ್ಮ ಸಂಪೂರ್ಣ ಮಾಹಿತಿಯೇ ಇರುವಾಗ ಇದೇನೂ ದೊಡ್ಡ ಸಂಗತಿಯಲ್ಲ ಎಂಬುದು ಅಲ್ಲಿನ ಕೆಲವರ ಅಭಿಪ್ರಾಯ.