Google Pixel C ಟ್ಯಾಬ್ಲೆಟ್ ಉತ್ಪಾದನೆ ಸ್ಥಗಿತ?

2015ರ ಡಿಸೆಂಬರ್ ತಿಂಗಳಲ್ಲಿ ಬಿಡುಗಡೆಯಾಗಿದ್ದ ಗೂಗಲ್‌ನ ಪಿಕ್ಸೆಲ್ ಸಿ ಎಂಬ ಆಂಡ್ರಾಯ್ಡ್ ಟ್ಯಾಬ್ಲೆಟ್‌ಗೆ ಪ್ರತಿ ತಿಂಗಳು ದೊರೆಯುತ್ತಿದ್ದ ಸೆಕ್ಯುರಿಟ್ ಪ್ಯಾಚ್ ಅಪ್‌ಡೇಟ್‌ಗಳು ಸ್ಥಗಿತಗೊಂಡಿದ್ದು, ಈ ಟ್ಯಾಬ್ಲೆಟ್‌ನ ಭವಿಷ್ಯದ ಬಗ್ಗೆ ಆತಂಕ ವ್ಯಕ್ತವಾಗಿದೆ.

ಈ ಕುರಿತು ಅಧಿಕೃತ ದೃಢೀಕರಣ ಇಲ್ಲವಾದರೂ, ಜುಲೈ ತಿಂಗಳ ಅಪ್‌ಡೇಟ್‌ಗಳು ಪಿಕ್ಸೆಲ್ ಸಿ ಟ್ಯಾಬ್ಲೆಟ್‌ಗೆ ಲಭ್ಯವಾಗದಿರುವುದು ಊಹಾಪೋಹಗಳಿಗೆ ಕಾರಣವಾಗಿದೆ.

ಅಪ್‌ಡೇಟ್ ಶೆಡ್ಯೂಲ್ ಪುಟದಲ್ಲಿ ಗೂಗಲ್ ಪಿಕ್ಸೆಲ್ ಸಿ ಹೆಸರೂ ಇಲ್ಲ. ಆದರೆ, ಗೂಗಲ್ ಸ್ಟೋರ್‌ನಲ್ಲಿ ಪಿಕ್ಸೆಲ್ ಸಿ ಮಾರಾಟವಾದ 18 ತಿಂಗಳವರೆಗೆ ಸೆಕ್ಯುರಿಟಿ ಅಪ್‌ಡೇಟ್ಸ್ ದೊರೆಯಲಿದೆ ಎಂದು ಹಿಂದೆಯೇ ಘೋಷಿಸಲಾಗಿತ್ತು. ಪ್ಲೇಸ್ಟೋರ್‌ನಲ್ಲಿ ಕೊನೆಯ ಬಾರಿಗೆ ಗೂಗಲ್ ಪಿಕ್ಸೆಲ್ ಸಿ ಮಾರಾಟವಾಗಿದ್ದು 2017ರ ಡಿಸೆಂಬರ್ ತಿಂಗಳಲ್ಲಿ. ಅಂದರೆ ಸರಿಯಾಗಿ 18 ತಿಂಗಳ ಹಿಂದೆ.

ಪಿಕ್ಸೆಲ್ ಸಿ ಸಾಫ್ಟ್‌ವೇರ್ ಬೆಂಬಲದ ಅವಧಿಯ ಕುರಿತು ನಿರ್ದಿಷ್ಟ ಅವಧಿತೀರಿಕೆ ದಿನಾಂಕವನ್ನೇನೂ ಗೂಗಲ್ ಎಲ್ಲೂ ಪ್ರಕಟಿಸಿಲ್ಲ.

ಹೀಗಾಗಿ ಈಗ ಸೆಕ್ಯುರಿಟಿ ಪ್ಯಾಚ್‌ನ ಪರಿಷ್ಕರಣೆಗಳು ಬಂದಿಲ್ಲವಾದುದರಿಂದ, ಪಿಕ್ಸೆಲ್ ಸಿ ಟ್ಯಾಬ್ಲೆಟ್ ಉತ್ಪಾದನೆ ಸ್ಥಗಿತಗೊಳ್ಳುವ ಸಾಧ್ಯತೆಗಳಿವೆ ಎಂದು ಹೇಳಲಾಗುತ್ತಿದೆ. ಇತ್ತೀಚೆಗೆ ಫೋನ್‌ಗಳ ಗಾತ್ರಗಳು ದೊಡ್ಡದಾಗುತ್ತಿರುವುದರಿಂದ ಗೂಗಲ್ ಟ್ಯಾಬ್ಲೆಟ್ ಉತ್ಪಾದನೆಯನ್ನು ಸ್ಧಗಿತಗೊಳಿಸುವುದೇ ಎಂಬುದನ್ನು ಕಾದು ನೋಡಬೇಕಾಗಿದೆ.