ಡೇಟಾ ಲೀಕ್; ಕಣ್ಮರೆಯಾಗಲಿರುವ ಗೂಗಲ್ ಪ್ಲಸ್

ಹೊಸದಿಲ್ಲಿ: ಎರಡನೇ ಬಾರಿಗೆ ಡೇಟಾ ಲೀಕ್ ಆಗಿರುವ ಹಿನ್ನಲೆಯಲ್ಲಿ ನಿರೀಕ್ಷೆಗೂ ಮುಂಚಿತವಾಗಿ ಗೂಗಲ್ ಪ್ಲಸ್ ಸಾಮಾಜಿಕ ಜಾಲತಾಣವನ್ನು ಮುಚ್ಚುಗಡೆಗೊಳಿಸಲು ಸರ್ಚ್ ಎಂಜಿನ್ ದೈತ್ಯ ಗೂಗಲ್ ನಿರ್ಧರಿಸಿದೆ.

ಈ ಹಿಂದೆ 2019 ಆಗಸ್ಟ್ ತಿಂಗಳಲ್ಲಿ ಗೂಗಲ್ ಪ್ಲಸ್ ಸೇವೆಯನ್ನು ಸ್ಥಗಿತಗೊಳಿಸಲು ನಿರ್ಧರಿಸಲಾಗಿತ್ತು. ಆದರೆ 55.5 ಮಿಲಿಯನ್ ಬಳಕೆದಾರರ ಡೇಟಾ ಲೀಕ್ ಭೀತಿ ಹಿನ್ನಲೆಯಲ್ಲಿ ಎಪ್ರಿಲ್‌ನಲ್ಲೇ ಬೀಗ ಹಾಕಲು ನಿರ್ಧರಿಸಲಾಗಿದೆ.

2015ರಿಂದಲೇ ಗೂಗಲ್ ಪ್ಲಸ್ ಬಳಕೆದಾರರ ಡೇಟಾ ಲೀಕ್ ಬಗ್ಗೆ ಅಪಾಯ ಕಾಡುತ್ತಿದೆ. ಆದರೆ ಮಾಹಿತಿ ಸೋರಿಕೆ ಅಪಾಯದ ಬಗ್ಗೆ ಮಾಹಿತಿಯಿದ್ದರೂ ಗೂಗಲ್ ಈ ಬಗ್ಗೆ ಹೊರ ಜಗತ್ತಿಗೆ ವಿವರಣೆ ನೀಡಿರಲಿಲ್ಲ.

ನವೆಂಬರ್‌ನಲ್ಲಿ ಗೂಗಲ್ ಪ್ಲಸ್ ಎಪಿಐ ಪ್ರೋಗ್ರಾಂ ಇಂಟರ್‌ಫೇಸ್‌ನಲ್ಲಿ ಮತ್ತೆ ತೊಂದರೆ ಕಾಣಿಸಿಕೊಂಡಿದೆ. ಅಪಾಯ ಕಾಣಿಸಿಕೊಂಡ ಒಂದು ವಾರದೊಳಗೆ ಗೂಗಲ್ ಸಮಸ್ಯೆ ಬಗೆಹರಿಸಿಕೊಂಡಿದೆ.

ಫೇಸ್‌ಬುಕ್‌ಗೆ ಹೋಲಿಸಿದಾಗ ಗೂಗಲ್ ಪ್ಲಸ್ ಅಷ್ಟೊಂದು ಜನಪ್ರಿಯತೆ ಸಾಧಿಸಿಲ್ಲ. ಒಟ್ಟಿನಲ್ಲಿ ಮುಂದಿನ ವರ್ಷ ಎಪ್ರಿಲ್ ತಿಂಗಳಲ್ಲಿ ಗೂಗಲ್ ಪ್ಲಸ್ ಕಣ್ಮರೆಯಾಗಲಿದೆ.