ಗೂಗಲ್ ವರ್ಕ್‌ಸ್ಪೇಸ್ ಆಪ್‌ಗಳಲ್ಲಿ ಹೊಸ ವೈಶಿಷ್ಟ್ಯಗಳು: ಅಪ್‌ಡೇಟ್ಸ್ ಯಾವುವು ನೋಡಿ!

ಗೂಗಲ್ ಸಂಸ್ಥೆಯ ಜನಪ್ರಿಯ ವರ್ಕ್‌ಸ್ಪೇಸ್ ಅಪ್ಲಿಕೇಶನ್‌ಗಳಾದ ಗೂಗಲ್ ಡಾಕ್ಸ್, ಗೂಗಲ್ ಮೀಟ್, ಗೂಗಲ್ ಶೀಟ್ಸ್ ಮತ್ತು ಗೂಗಲ್ ಸ್ಲೈಡ್ ಎಲ್ಲವೂ ಮತ್ತಷ್ಟು ಹೊಸ ವೈಶಿಷ್ಟ್ಯಗಳೊಂದಿಗೆ ನವೀಕರಣಗೊಳ್ಳುತ್ತಿವೆ. ಗೂಗಲ್ ಬ್ಲಾಗ್ ಪೋಸ್ಟ್ ಪ್ರಕಾರ, ಮುಂದಿನ 15 ದಿನಗಳಲ್ಲಿ ಗೂಗಲ್ ಡಾಕ್ಸ್, ಗೂಗಲ್ ಶೀಟ್ಸ್ ಮತ್ತು ಗೂಗಲ್ ಸ್ಲೈಡ್ ಅಪ್ಲಿಕೇಶನ್ಗಳಲ್ಲಿ ಹಲವು ಕಾರ್ಯಗಳನ್ನು ಸುಲಭವಾಗಿರುವ ಬದಲಾವಣೆಗಳು ಕಾಣಿಸಕೊಳ್ಳಲಿದ್ದು, ಜೀಮೇಲ್‌ನಲ್ಲಿ ಸರ್ಚ್ ಮಾಡಲು ಸುಲಭವಾಗುವಂತ ಬದಲಾವಣೆ ತರಲಾಗುತ್ತಿದ್ದರೆ, ಗೂಗಲ್ ಮೀಟ್ ಬಳಕೆದಾರರು ಚಾಟ್‌ನಲ್ಲಿ ಫೈಲ್‌ಗಳನ್ನು ಹಂಚಿಕೊಳ್ಳಲು ಮತ್ತು ಸ್ಪ್ರೆಡ್‌ಶೀಟ್ ಅಪ್ಲಿಕೇಶನ್‌ನಲ್ಲಿ ಡೇಟಾವನ್ನು ಸುಲಭವಾಗಿ ವೀಕ್ಷಿಸಲು ಸಾಧ್ಯವಾಗುವಂತಹ ಹೊಸ ವೈಶಿಷ್ಟ್ಯಗಳನ್ನು ನೀಡಲಾಗುತ್ತಿದೆ.

ಕಳೆದ ಜುಲೈನಲ್ಲಿ ಜೀಮೇಲ್ ಅಪ್ಲಿಕೇಶನ್‌ನಲ್ಲಿ ಸರ್ಚ್ ಮಾಡಲು ಸುಲಭವಾಗುವಂತ ಬದಲಾವಣೆ ತರುತ್ತಿರುವ ಬಗ್ಗೆ ಗೂಗಲ್ ಸಂಸ್ಥೆ ತಿಳಿಸಿತ್ತು. ಅದಂತೆ, ಮುಂದಿನ 15 ದಿನಗಳಲ್ಲಿ ಜೀಮೇಲ್ ಸರ್ಚ್ ಹೆಚ್ಚು ಪ್ರಸ್ತುತ ಮತ್ತು ಸಂದರ್ಭೋಚಿತ ಫಲಿತಾಂಶಗಳನ್ನು ನೀಡುವಂತಹ ವೈಶಿಷ್ಟ್ಯವನ್ನು ಪರಿಚಯಿಸಲಾಗುತ್ತಿದೆ. ಇದರಿಂದ ಜೀಮೇಲ್‌ನಲ್ಲಿನ ಸರ್ಚ್ ಆಯ್ಕೆಗಳು ಮತ್ತು ಸಲಹೆಗಳು ಸುಲಭವಾಗಿ ದೊರೆಯಲಿವೆ. ಇತ್ತ ಗೂಗಲ್ ಡಾಕ್ಸ್, ಶೀಟ್‌ಗಳು ಅಥವಾ ಸ್ಲೈಡ್ಗಳಲ್ಲಿ Meet ಚಾಟ್‌ನಿಂದ ಫೈಲ್‌ಗಳನ್ನು ಹಂಚಿಕೊಳ್ಳಲು ಇದೀಗ ಬಳಕೆದಾರರಿಗೆ ಅವಕಾಶ ನೀಡಲಾಗುತ್ತಿದೆ. ಗೂಗಲ್ ಮೀಟಿಂಗ್ ಸೇರುವ ಬಳಕೆದಾರರು ಚಾಟ್ ವೈಶಿಷ್ಟ್ಯದ ಮೂಲಕ ಫೈಲ್‌ಗಳನ್ನು ಹಂಚಿಕೊಳ್ಳಬಹುದು ( ಇದು ಡಾಕ್ಯುಮೆಂಟ್ ಅಥವಾ ಸ್ಪ್ರೆಡ್‌ಶೀಟ್‌ಗಳು ಆಗಿರಬಹುದು).

ಹಾಗೆಯೇ, ಗೂಗಲ್ ಡಾಕ್ಸ್, ಶೀಟ್‌ ಅಪ್ಲಿಕೇಶನ್‌ಗಳನ್ನು ಬಳಸುವ ಟ್ಯಾಬ್ಲೆಟ್‌ಗಳು ಮತ್ತು ಮಡಚಬಹುದಾದ ದೊಡ್ಡ ಪರದೆಯ ಸಾಧನಗಳಿಗೆ ಗೂಗಲ್ ಡ್ರ್ಯಾಗ್ ಮತ್ತು ಡ್ರಾಪ್ ವೈಶಿಷ್ಟ್ಯವನ್ನು ಪರಿಚಯಿಸುತ್ತಿದೆ. 'ಸ್ಪ್ಲಿಟ್ ವ್ಯೂ' ಮೂಲಕ ಎರಡೂ ವರ್ಕ್‌ಸ್ಪೇಸ್ ಅಪ್ಲಿಕೇಶನ್‌ಗಳನ್ನು ಅಕ್ಕಪಕ್ಕದಲ್ಲಿ ತೆರೆದಿರುವಾಗ, ಬಳಕೆದಾರರು ಒಂದರಿಂದ ಇನ್ನೊಂದಕ್ಕೆ ಡೇಟಾವನ್ನು ಎಳೆಯಬಹುದು ಮತ್ತು ಬಿಡಬಹುದು (ಡ್ರ್ಯಾಗ್ ಮತ್ತು ಡ್ರಾಪ್). ಇದರಿಂದ ಫೈಲ್‌ಗಳನ್ನು ಒಂದು ಡಾಕ್ಯುಮೆಂಟ್‌ನಿಂದ ಇನ್ನೊಂದಕ್ಕೆ ವರ್ಗಾಯಿಸುವ ಪ್ರಕ್ರಿಯೆಯನ್ನು ಸರಳಗೊಳಿಸುತ್ತದೆ.ಈ ವೈಶಿಷ್ಟ್ಯವು ಒಂದೇ ರೀತಿಯ ಗೆಸ್ಚರ್‌ಗಳನ್ನು ಬಳಸಿಕೊಂಡು ಫೈಲ್‌ಗಳನ್ನು ಅಪ್‌ಲೋಡ್ ಮಾಡಲು ಬಳಕೆದಾರರಿಗೆ ಸುಲಭವಾಗಿಸಿದೆ. ಇದರಿಂದ ಬಳಕೆದಾರರ ಸಮಯ ಹೆಚ್ಚು ಉಳಿತಾಯವಾಗಲಿದೆ.

ಗಮನಿಸುವುದಾದರೆ, ಗೂಗಲ್ ಇತ್ತೀಚಿಗಷ್ಟೇ ತನ್ನ ಗೂಗಲ್ ಮೆಸೇಜ್ ಅಪ್ಲಿಕೇಶನ್ ನಲ್ಲಿ ಎಮೋಜಿ ರಿಯಾಕ್ಷನ್ ವೈಶಿಷ್ಟ್ಯವನ್ನು ಪರಿಚಯಿಸಿದೆ. ಗೂಗಲ್‌ ಎಸ್‌ಎಮ್‌ಎಸ್‌ ಅಪ್‌ಡೇಟ್ ವರ್ಷನ್ ಅಪ್ಲಿಕೇಶನ್‌ನಲ್ಲಿ ಪ್ರಸ್ತುತ ಬಳಕೆದಾರರು ಏಳು ಎಮೋಜಿಗಳನ್ನು ಬಳಕೆ ಮಾಡಲು ಸಾಧ್ಯವಿದೆ. ಥಂಬ್ಸ್ ಅಪ್, ಥಂಬ್ಸ್ ಡೌನ್‌, ಹೃದಯಾಕಾರದ ಕಣ್ಣುಗಳೊಂದಿಗೆ ನಗುತ್ತಿರುವ ಫೇಸ್‌, ಸಂತೋಷದ ಕಣ್ಣೀರಿನ ಫೇಸ್‌, ಓಪನ್‌ ಮೌತ್, ಅಳುವ ಫೀಲಿಂಗ್‌ನಲ್ಲಿರುವ ಫೇಸ್‌ ಮತ್ತು ಕೋಪದ ಫೇಸ್‌ಗಳ ಎಮೋಜಿಗಳು ಬಳಕೆದಾರರಿಗೆ ಲಭ್ಯವಾಗಲಿವೆ. ಇದರಿಂದ ಯಾವುದೇ ಟೆಕ್ಸ್ಟ್‌ ಸಂದೇಶಗಳಿಗೆ ನಿಮ್ಮ ಭಾವನೆ ಏನೆಂಬುದನ್ನು ಕ್ಷಣಮಾತ್ರದಲ್ಲಿ ತಿಳಿಸಲು ಸಾಧ್ಯವಾಗುತ್ತದೆ ಎಂದು ಇತ್ತೀಚಿನ ಹಲವು ಟೆಕ್ ಮಾಧ್ಯಮ ವರದಿಗಳು ತಿಳಿಸಿವೆ.