ಸ್ಯಾಮ್ಸಂಗ್ ವಿಯೆಟ್ನಾಂನಲ್ಲಿ ಘಟಕ ಹೊಂದಿದೆ
ಕೊರಿಯಾ ಮೂಲದ ಎಲೆಕ್ಟ್ರಾನಿಕ್ಸ್ ದಿಗ್ಗಜ ಸ್ಯಾಮ್ಸಂಗ್ ವಿಯೆಟ್ನಾಂನಲ್ಲಿ ಉತ್ಪಾದನಾ ಘಟಕ ಹೊಂದಿದೆ. ಹೀಗಾಗಿ ಸ್ಯಾಮ್ಸಂಗ್ ಫೋನ್, ಬಿಡಿಭಾಗ ಉತ್ಪಾದನೆಯ ಮೇಲೆ ಯಾವುದೇ ಸಮಸ್ಯೆಯಾಗಿಲ್ಲ. ಸ್ಯಾಮ್ಸಂಗ್ ಒಟ್ಟು ಉತ್ಪಾದನೆಯ ಭಾಗದಲ್ಲಿ ಅರ್ಧದಷ್ಟು ವಿಯೆಟ್ನಾಂನಿಂದಲೇ ಸಾಧ್ಯವಾಗುತ್ತದೆ. 2009ರಿಂದ ವಿಯೆಟ್ನಾಂನಲ್ಲಿ ಸ್ಯಾಮ್ಸಂಗ್ ಫೋನ್ ಉತ್ಪಾದನೆ ನಡೆಸುತ್ತಿದೆ. ಸರಕಾರದ ಪ್ರೋತ್ಸಾಹ, ಕಡಿಮೆ ಉತ್ಪಾದನಾ ವೆಚ್ಚ ಮತ್ತು ಕಡಿಮೆ ದರಕ್ಕೆ ಕಾರ್ಮಿಕರ, ಉದ್ಯಮ ಪೂರಕ ವಾತಾವರಣ ಸ್ಯಾಮ್ಸಂಗ್ಗೆ ಅನುಕೂಲವಾಗಿದೆ.
Video-Apple iPhone: ಆ್ಯಪಲ್ ಆದಾಯಕ್ಕೆ ಕತ್ತರಿ ಹಾಕಿದ ಕೊರೊನಾ
ಆ್ಯಪಲ್ಗೆ ಹಿನ್ನಡೆ
ಆ್ಯಪಲ್ ಐಫೋನ್, ವಾಚ್, ಐಪ್ಯಾಡ್ ಮತ್ತು ಇತರ ಪ್ರಮುಖ ಉತ್ಪನ್ನಗಳನ್ನು ಅಮೆರಿಕದಲ್ಲಿ ವಿನ್ಯಾಸ ಮಾಡಿದ್ದರೂ, ಚೀನಾದಲ್ಲಿ ಉತ್ಪಾದನೆ ಮತ್ತು ಜೋಡಿಸಲಾಗುತ್ತದೆ. ಆದರೆ ವೈರಸ್ ಹಾವಳಿಯಿಂದ ಚೀನಾದಲ್ಲಿ ಆ್ಯಪಲ್ ಪ್ಲಾಂಟ್ಗಳಲ್ಲಿ ಐಫೋನ್, ವಾಚ್ ಮತ್ತಿತರ ಗ್ಯಾಜೆಟ್ಗಳ ಉತ್ಪಾದನೆ ಕುಂಠಿತವಾಗಿದೆ. ಜತೆಗೆ ಆಮದು, ರಫ್ತಿಗೂ ಸಮಸ್ಯೆಯಾಗಿದೆ. ಹೀಗಾಗಿ ಆ್ಯಪಲ್ ಮಾರುಕಟ್ಟೆಯ ಮೇಲೆ ಪರಿಣಾಮ ಉಂಟಾಗುತ್ತದೆ. ಅಷ್ಟೇ ಅಲ್ಲದೆ, ಚೀನಾದಲ್ಲಿ ಸ್ಮಾರ್ಟ್ಫೋನ್ ಮಾರಾಟದ ಮೇಲೂ ಪ್ರತಿಕೂಲ ಪರಿಣಾಮ ಉಂಟಾಗಿದ್ದು, ಆ್ಯಪಲ್ ಐಫೋನ್ ಮಾರಾಟ ಕುಸಿತವಾಗಿದೆ. ಇದರಿಂದ ಜಾಗತಿಕ ಮಾರುಕಟ್ಟೆಯಲ್ಲಿ ಆ್ಯಪಲ್ ಹಿನ್ನಡೆ ಅನುಭವಿಸಲಿದೆ.
ಶವೋಮಿಗೂ ಸಮಸ್ಯೆ
ಚೀನಾ ಮೂಲದ ಶವೋಮಿಗೂ ಕೊರೊನಾವೈರಸ್ ಹಾವಳಿ ತಟ್ಟಿದೆ. ಕೊರೊನಾ ವೈರಸ್ನಿಂದಾಗಿ ಚೀನಾದಲ್ಲಿ ಶವೋಮಿ ಉತ್ಪಾದನೆ ಕಡಿಮೆಯಾಗಿದೆ. ರಫ್ತು ಇಳಿಕೆಯಾಗಿದೆ. ಅಲ್ಲದೆ ಉತ್ಪಾದನೆ ಕುಸಿದಿದ್ದರಿಂದ, ನಿಗದಿತ ಮಾರುಕಟ್ಟೆಗೆ ಅಗತ್ಯ ಪೂರೈಕೆಯಾಗುತ್ತಿಲ್ಲ. ಚೀನಾದಲ್ಲಿ ತಯಾರಾಗುವ ಶವೋಮಿ, ಜಾಗತಿಕ ಮಾರುಕಟ್ಟೆಗೆ ಸರಿಯಾಗಿ ಸರಬರಾಜು ಆಗುತ್ತಿಲ್ಲ. ಹೀಗಾಗಿ ಮಾರುಕಟ್ಟೆಯಲ್ಲಿ ಅದು ಹಿನ್ನಡೆ ಅನುಭವಿಸುತ್ತಿದೆ. ಭಾರತದಲ್ಲಿ ಒಂದನೇ ಸ್ಥಾನದಲ್ಲಿದ್ದ ಶವೋಮಿ ಮಾರಾಟದ ಮೇಲೂ ಪರಿಣಾಮ ಉಂಟಾಗಿದ್ದು, ಕೆಲವೊಂದು ಮಾದರಿಗಳ ಬೆಲೆ ಏರಿಕೆ ಮಾಡಬೇಕಿದೆ.
ಸ್ಯಾಮ್ಸಂಗ್ಗೆ ಸಮಸ್ಯೆಯಿಲ್ಲ!
ಚೀನಾದಲ್ಲಿ ಕೊರೊನಾವೈರಸ್ ಬಂದಿರುವುದು ಸ್ಯಾಮ್ಸಂಗ್ಗೆ ಸಮಸ್ಯೆಯಾಗಿಲ್ಲ. ಯಾಕೆಂದರೆ ಚೀನಾದಲ್ಲಿ ಸ್ಯಾಮ್ಸಂಗ್ ಹೇಳಿಕೊಳ್ಳುವಂತಹ ಮಾರುಕಟ್ಟೆ ಪಾಲು ಹೊಂದಿಲ್ಲ, ಅಲ್ಲದೆ ಅಲ್ಲಿ ಸ್ಟೋರ್ ಮತ್ತು ಉತ್ಪಾದನಾ ಘಟಕ ಮುಚ್ಚಿರುವುದು ಕೂಡ ಸ್ಯಾಮ್ಸಂಗ್ ಮೇಲೆ ಯಾವುದೇ ಪ್ರಭಾವ ಬೀರಿಲ್ಲ. ಆದರೆ, ಆ್ಯಪಲ್, ಶವೋಮಿ ಮತ್ತು ಹುವೈ ಘಟಕ ತಾತ್ಕಾಲಿಕ ಮುಚ್ಚಿದ್ದು ಹಾಗೂ ಸ್ಟೋರ್ ಕ್ಲೋಸ್ ಆಗಿರುವುದರಿಂದ, ಅವರ ಮಾರಾಟದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ. 2019ರಲ್ಲಿ ಸ್ಯಾಮ್ಸಂಗ್ ಚೀನಾದಲ್ಲಿ ಸ್ಮಾರ್ಟ್ಫೋನ್ ಉತ್ಪಾದನೆಯನ್ನು ನಿಲ್ಲಿಸಿದೆ. ಜತೆಗೆ ಅಲ್ಲಿನ ಮಾರುಕಟ್ಟೆ ಮೇಲೆ ಅಷ್ಟೇನೂ ಹೂಡಿಕೆ ಮಾಡುತ್ತಿಲ್ಲ.
ಹುವೈಗೂ ಹೊಡೆತ!
ಚೀನಾ ಮೂಲದ ಮತ್ತೊಂದು ದೊಡ್ಡ ಬ್ರ್ಯಾಂಡ್ ಹುವೈ ಮೇಲೂ ಕೊರೊನಾವೈರಸ್ ಪ್ರಭಾವ ಬೀರಿದೆ. ಹುವೈ ಸ್ಮಾರ್ಟ್ಫೋನ್ ಉತ್ಪಾದನೆ ಮತ್ತು ಮಾರುಕಟ್ಟೆ ಕುಸಿತವಾಗಿದೆ. ಚೀನಾದಲ್ಲಿ ವೈರಸ್ ಪ್ರಭಾವ ಕಡಿಮೆಯಾಗುವವರೆಗೂ ಈ ಸಮಸ್ಯೆ ಮುಂದುವರಿಯಲಿದೆ. ಆ್ಯಪಲ್ ಕೂಡ ಹಿನ್ನಡೆಗೊಳಗಾಗಿದೆ. ಹುವೈ, ಆ್ಯಪಲ್ ಮತ್ತು ಶವೋಮಿಯ ನಷ್ಟ, ಸ್ಯಾಮ್ಸಂಗ್ಗೆ ಮಾರುಕಟ್ಟೆ ಪಾಲು ಪಡೆಯಲು ಅನುವು ಮಾಡಿಕೊಡಲಿದೆ.
ಹೊಸ ಫೋನ್ ಬಿಡುಗಡೆ ವಿಳಂಬ!
ಕೊರೊನಾವೈರಸ್ ಪ್ರಭಾವದಿಂದಾಗಿ ಜಾಗತಿಕ ಸಮ್ಮೇಳನ ವರ್ಲ್ಡ್ ಮೊಬೈಲ್ ಕಾಂಗ್ರೆಸ್ 2020 ಕೂಡ ರದ್ದಾಗಿದೆ. ಅಲ್ಲದೆ ಹೊಸ ಫೋನ್ ಉತ್ಪಾದನೆ ಮತ್ತು ಬಿಡುಗಡೆ ವಿಳಂಬವಾಗುತ್ತಿದೆ. ಆ್ಯಪಲ್, ಒನ್ಪ್ಲಸ್, ಶವೋಮಿ ಮತ್ತು ಹುವೈಯ ಹೊಸ ಮಾದರಿಗಳು ತಡವಾಗಿ ಮಾರುಕಟ್ಟೆ ಪ್ರವೇಶಿಸಲಿದೆ. ಆದರೆ ಸ್ಯಾಮ್ಸಂಗ್ ಕೆಲವೇ ಮಾದರಿಗಳು ಮಾತ್ರ ಚೀನಾದಲ್ಲಿ ತಯಾರಾಗುವುದರಿಂದ, ಅದೂ ಅಲ್ಲದೆ ಕಡಿಮೆ ದರದ ಫೋನ್ಗಳಿಗೆ ಮಾತ್ರ ಸ್ಯಾಮ್ಸಂಗ್ ಚೀನಾ ಮೇಲೆ ಅವಲಂಬಿತವಾಗಿರುವುದು ಯಾವುದೇ ಸಮಸ್ಯೆ ಉಂಟುಮಾಡಿಲ್ಲ.