Honor: ಶೀಘ್ರದಲ್ಲಿ 5ಜಿ ಸ್ಮಾರ್ಟ್‌ಫೋನ್‌

ಬಹುಶಃ 4ಜಿ ತಂತ್ರಜ್ಞಾನ ಮೂಲೆಗೆ ಸೇರುವ ದಿನಗಳು ದೂರಿಲ್ಲ. ಆ ಸ್ಥಾನಕ್ಕೆ 5ಜಿ ತಂತ್ರಜ್ಞಾನ ಲಗ್ಗೆ ಇಡಲು ಸಜ್ಜಾಗಿದ್ದು, ಇದಕ್ಕಾಗಿ ಬಹುತೇಕ ಎಲ್ಲ ಸ್ಮಾರ್ಟ್‌ಫೋನ್‌ ತಯಾರಿಕಾ ಕಂಪನಿಗಳು ಸಿದ್ಧತೆ ಮಾಡಿಕೊಳ್ಳುತ್ತಿವೆ. ಹುವೈ ಸಂಸ್ಥೆಯ ಸಬ್‌ ಬ್ರಾಂಡ್‌ ಆಗಿರುವ ಹಾನರ್‌ ಈ ವರ್ಷವೇ 5ಜಿಗೆ ಸಪೋರ್ಟ್‌ ಮಾಡುವ ಸ್ಮಾರ್ಟ್‌ಫೋನ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸಲು ಮುಂದಾಗಿದೆ.

ಈಗ ನಡೆಯುತ್ತಿರುವ ಮೊಬೈಲ್‌ ವರ್ಲ್ಡ್‌ ಕಾಂಗ್ರೆಸ್‌ನಲ್ಲಿ ಹಾನರ್‌ ಅಧ್ಯಕ್ಷ ಜಾರ್ಜ್‌ ಝಾಹೈ ಈ ವಿಷಯವನ್ನು ಖಚಿತಪಡಿಸಿದ್ದು, 2020ರಲ್ಲಿ 5ಜಿ ಸ್ಮಾರ್ಟ್‌ಫೋನ್‌ಗಳು ಹೆಚ್ಚಿನ ಪ್ರಾಮುಖ್ಯತೆ ಪಡೆದುಕೊಳ್ಳಲಿವೆ ಎಂದು ತಿಳಿಸಿದ್ದಾರೆ. ಹೀಗಿದ್ದೂ, ಅವರು ತಮ್ಮ ಕಂಪನಿಯ 5ಜಿ ಸ್ಮಾರ್ಟ್‌ಫೋನ್‌ ಬಗ್ಗೆ ಯಾವುದೇ ಹೆಚ್ಚಿನ ಮಾಹಿತಿಯನ್ನು ಬಿಟ್ಟುಕೊಟ್ಟಿಲ್ಲ.

ಏತನ್ಮಧ್ಯೆ, ಹಾನರ್‌ 20 ಮಾದರಿಯ ಸ್ಮಾರ್ಟ್‌ಫೋನ್‌ಗಳಿಗೆ ಆ್ಯಂಡ್ರಾಯ್ಡ್‌ ಕ್ಯೂ ಅಪ್‌ಡೇಟ್‌ ಒದಗಿಸುವ ಭರವಸೆಯನ್ನು ಸಂಸ್ಥೆಯು ನೀಡಿದೆ. ಈ ಅಪ್‌ಡೇಟ್‌ ಜತೆಗೆ ಸೆಕ್ಯುರಿಟಿ ಪ್ಯಾಚಸ್‌ಗಳನ್ನೂ ಒದಗಿಸುವ ವಾಗ್ದಾನವನ್ನು ಕಂಪನಿ ನೀಡಿದೆ. ಇತ್ತೀಚೆಗಷ್ಟೇ ಹಾನರ್‌ ಹೊಸ ಮಾದರಿಯ ಮೂರ್ನಾಲ್ಕು ಫೋನ್‌ಗಳನ್ನು ಭಾರತೀಯ ಮಾರುಕಟ್ಟೆಗೆ ಪರಿಚಯಿಸಿತ್ತು.