Face Recognition: ಚಹರೆ ಪತ್ತೆ ತಂತ್ರಜ್ಞಾನಕ್ಕೆ ವಿರೋಧ

ಅಮೆರಿಕದ ಸ್ಯಾನ್‌ ಫ್ರಾನ್ಸಿಸ್ಕೋ ಪಟ್ಟಣ, ಮುಖಚಹರೆ ಪತ್ತೆ ತಂತ್ರಜ್ಞಾನವನ್ನು ನಿಷೇಧಿಸುವ ಮೊದಲ ಪಟ್ಟಣ ಎನಿಸಲಿದೆ. ಅದಕ್ಕೆ ಕಾರಣ, ಈಗಾಗಲೇ ಅಲ್ಲಿನ ಮೆಟ್ರೋ ನಿಲ್ದಾಣಗಳಲ್ಲಿರುವ ಮುಖ ಚಹರೆ ಪತ್ತೆ ಹಾಗೂ ರೆಕಾರ್ಡಿಂಗ್‌ ತಂತ್ರಜ್ಞಾನ.

ಅನುಮಾನಾಸ್ಪದ ಎನಿಸಿದ ವ್ಯಕ್ತಿಗಳ ಮುಖಚಹರೆ ಹಾಗೂ ಚಟುವಟಿಕೆಗಳನ್ನು ಈ ಸಿಸಿ ಕ್ಯಾಮೆರಾಗಳು ಟ್ರ್ಯಾಕಿಂಗ್‌ ಮಾಡುತ್ತವೆ; ಮಾತ್ರವಲ್ಲದೆ, ನಿಲ್ದಾಣದ ದೊಡ್ಡ ಸ್ಕ್ರೀನ್‌ಗಳನ್ನು ಪ್ರದರ್ಶಿಸುತ್ತವೆ. ಇದು ಮಾನವ ಹಕ್ಕುಗಳ ಹೋರಾಟಗಾರರ ಕೆಂಗಣ್ಣಿಗೆ ಗುರಿಯಾಗಿದೆ.

ಇದರಿಂದ ಹೆಚ್ಚಾಗಿ ಸಂಕಷ್ಟಕ್ಕೆ ಒಳಗಾಗುತ್ತಿರುವವರು ಕಪ್ಪು ಬಣ್ಣದ ಆಫ್ರಿಕನ್‌ ಅಮೆರಿಕನ್ನರು. ಸಭ್ಯ ಶ್ರೀಸಾಮಾನ್ಯರನ್ನೂ ಈ ವ್ಯವಸ್ಥೆಗಳು ಭಾವಿ ಕಳ್ಳರಂತೆ ತೋರಿಸಿದ್ದಿದೆ. ಈ ಬಗ್ಗೆ ಕೂಗು ಎದ್ದಿರುವುದರಿಂದ, ಇದನ್ನು ಹಿಂತೆಗೆದುಕೊಳ್ಳುವುದಾಗಿ ಸ್ಯಾನ್‌ಫ್ರಾನ್ಸಿಸ್ಕೋ ಆಡಳಿತ ಹೇಳಿದೆ; ಮಾತ್ರವಲ್ಲ, ಆ ತಂತ್ರಜ್ಞಾನ ಕ್ರಿಮಿನಲ್‌ಗಳನ್ನು ಹೆದರಿಸಲು ಮಾತ್ರ ಇದ್ದದ್ದು ಎಂದು ಸಮಜಾಯಿಷಿ ನೀಡಿದೆ.

ಒಂದೆಡೆ ಅಮೆರಿಕ ಇಂಥ ತಂತ್ರಜ್ಞಾನಕ್ಕೆ ಪ್ರತಿರೋಧ ತೋರುತ್ತಿದ್ದರೆ, ಇನ್ನೊಂದೆಡೆ ಚೀನದಲ್ಲಿ, ಅಲ್ಪಸಂಖ್ಯಾತ ಉಯ್ಘರ್‌ ಮುಸ್ಲಿಮರನ್ನು ಪತ್ತೆ ಹಚ್ಚಿ ನಿಗಾ ಕ್ಯಾಂಪ್‌ಗಳಿಗೆ ದಬ್ಬಲು ಈ ತಂತ್ರಜ್ಞಾನವನು ಬಳಸಿಕೊಳ್ಳಲಾಗುತ್ತಿದೆ. ಇದು ತಂತ್ರಜ್ಞಾನದ ಎರಡು ಅಲಗಿನ ಮುಖ.