IT Dept Scam Mail: ಐಟಿ ಇಲಾಖೆ ಹೆಸರಲ್ಲಿ ಫಿಶಿಂಗ್‌ ಜಾಲ

ಆದಾಯ ತೆರಿಗೆ ಇಲಾಖೆ(ಐಟಿ) ಹೆಸರಲ್ಲಿ ವೈರಸ್‌ ಒಳಗೊಂಡ ಫಿಶಿಂಗ್‌ ಇ ಮೇಲ್‌ ಸಕ್ರಿಯವಾಗಿದ್ದು, ನಿಮ್ಮ ವೈಯಕ್ತಿಕ ಹಣಕಾಸು ಮಾಹಿತಿಗೆ ಕನ್ನ ಹಾಕುವ ಸಾಧ್ಯತೆ ಇದೆ.

ಕಳೆದ ಸೆ. 12ರಿಂದಲೇ ಈ ರೀತಿಯ ವೈರಸ್‌ ಮತ್ತು ಫಿಶಿಂಗ್‌ ಮೇಲ್‌ ಸಕ್ರಿಯವಾಗಿದ್ದು, ವ್ಯಕ್ತಿಗಳು ಮತ್ತು ಹಣಕಾಸು ಸಂಸ್ಥೆಗಳನ್ನು ಗುರಿಯಾಗಿಸಿಕೊಳ್ಳಲಾಗುತ್ತಿದೆ. ಭಾರತೀಯ ಆದಾಯ ತೆರಿಗೆ ಇಲಾಖೆಯಿಂದಲೇ ಮೇಲ್‌ ಕಳುಹಿಸಲಾಗಿದೆ ಎಂಬ ರೀತಿಯಲ್ಲಿ ಮಾಲ್ವೇರ್‌ ಇರುವ ಮೇಲ್‌ಗಳನ್ನು ಕಳುಹಿಸಲಾಗುತ್ತಿದೆ ಎಂದು ಸಿಇಆರ್‌ಟಿ(ಇಂಡಿಯನ್‌ ಕಂಪ್ಯೂಟರ್‌ ಎಮರ್ಜೇನ್ಸಿ ರೆಸ್ಪಾನ್ಸ್‌ ಟೀಮ್‌) ಎಚ್ಚರಿಸಿದೆ.

ಫಿಶಿಂಗ್‌ ಮಾಡುವುದು ಸೈಬರ್‌ ಅಪರಾಧ. ಇದರ ಮೂಲಕ ವ್ಯಕ್ತಿಯೊಬ್ಬರ ಪ್ರಮುಖ ಮಾಹಿತಿ ಅಂದರೆ, ಬ್ಯಾಂಕಿಂಗ್‌, ಕ್ರೆಡಿಟ್‌ ಕಾರ್ಡ್‌ ವಿವರ ಮತ್ತು ಪಾಸ್‌ವರ್ಡ್‌ಗಳನ್ನು ಕಳುವು ಮಾಡಲಾಗುತ್ತದೆ. ಅದೇ ರೀತಿ ಮಾಲ್ವೇರ್‌ ಎಂದರೆ ವೈರಸ್‌. ಈ ಎರಡನ್ನೂ ಒಳಗೊಂಡ ಇ-ಮೇಲ್‌ಗಳನ್ನು ತೆರಿಗೆದಾರರಿಗೆ ಐಟಿ ಇಲಾಖೆ ಹೆಸರಲ್ಲಿ ಖದೀಮರು ಕಳುಹಿಸುತ್ತಿದ್ದಾರೆ.

ಬ್ಯಾಂಕಿಂಗ್‌ ಮತ್ತು ಐಟಿ ದಾಖಲೆಗಳಿಗೆ ಸಂಬಂಧಿಸಿದಂತೆ ಯಾವುದೇ ಶಂಕಾಸ್ಪದ ಮೇಲ್‌ನಿಂದ ಸುರಕ್ಷಿತವಾಗಿರುವುದು ತುಂಬ ಮುಖ್ಯವಾಗಿರುತ್ತದೆ. ಇಂಥ ನಕಲಿ ಇ ಮೇಲ್‌ಗಳಿಂದ ದೂರ ಇರುವಂತೆ ಜನರು ಮತ್ತು ತೆರಿಗೆದಾರರಿಗೆ ಇಲಾಖೆಯು ಅನೇಕ ಜಾಗೃತಿ ಕಾರ್ಯಕ್ರಮ ಕೈಗೊಂಡಿದೆ ಎನ್ನುತ್ತಾರೆ ತೆರಿಗೆ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು.

Internet Safety: ಗೂಗಲ್‌ನಲ್ಲಿ ಸೇಫ್ ಆಗಿರೋದು ಹೇಗೆ?

2 ಮಾದರಿಯ ಮಾಲ್ವೇರ್‌
ಸಿಇಆರ್‌ಟಿಯ ಪ್ರಕಾರ ಒಟ್ಟು ಎರಡು ನಮೂನೆಯ ಮಾಲ್ವೇರ್‌ ಮೇಲ್‌ಗಳನ್ನು ಹರಿಬಿಡಲಾಗಿದೆ. ಮೊದಲನೆಯ ನಮೂನೆಯ ಮೇಲ್‌ನಲ್ಲಿವೈರಸ್‌ ಇರುವ ಅಟ್ಯಾಚ್‌ಮೆಂಟ್‌ ಇದ್ದರೆ, ಎರಡನೆ ನಮೂನೆಯ ಮೇಲ್‌ ನಕಲಿ ಇನ್‌ಕಮ್‌ಟ್ಯಾಕ್ಸ್‌ಇಂಡಿಯಾ ಡಾಟ್‌ ಇನ್ಫೋ ಡೊಮೇನ್‌ ಇರುವ ಲಿಂಕ್‌ ಹೊಂದಿದ್ದು, ಅದನ್ನು ಡೌನ್‌ಲೋಡ್‌ ಮಾಡುವಂತೆ ಗ್ರಾಹಕರಿಗೆ ಪ್ರೇರೇಪಿಸುತ್ತದೆ. ಈಗ ಡೊಮೇನ್‌ ಅನ್ನು ನಿಷ್ಕ್ರಿಯಗೊಳಿಸಲಾಗಿದೆ ಎಂದು ಸಿಇಆರ್‌ಟಿ ಹೇಳಿದೆ.

ಈ ರೀತಿಯ ಯಾವುದೇ ಶಂಕಾಸ್ಪದ ಮೇಲ್‌ಗಳು ಬಂದಾಗ ಅವುಗಳನ್ನು ಓಪನ್‌ ಮಾಡದಿರುವುದು ಉತ್ತಮ.

ಬ್ಯಾಂಕ್ ವಂಚನೆಯಿಂದ ಪಾರಾಗುವುದು ಹೇಗೆ?