ಇನ್‌ಸ್ಟಾಗ್ರಾಮ್ ನಲ್ಲಿ ಯುವ ಜನತೆಗೆ ಹೊಸದೊಂದು ಫೀಚರ್ ಲಭ್ಯ!

ಫೇಸ್‌ಬುಕ್ ಒಡೆತನದ ಜನಪ್ರಿಯ ಫೋಟೋ ಹಂಚಿಕೆ ವೇದಿಕೆಯಾಗಿರುವ ಇನ್‌ಸ್ಟಾಗ್ರಾಮ್ ತನ್ನ ವೇದಿಕೆಯಲ್ಲಿ ಹದಿಹರೆಯ ಯುವ ಜನತೆಗೆ ಹೊಸದೊಂದು ಫೀಚರ್ ಅನ್ನು ತರುವುದಾಗಿ ತಿಳಿಸಿದೆ. ತನ್ನ ವೇದಿಕೆಯಲ್ಲಿ ಹದಿಹರೆಯ ಬಳಕೆದಾರರು ಹಾನಿಕಾರಕ ವಿಷಯಗಳಿಂದ ದೂರವಿರಲು ಮತ್ತು ಪ್ಲಾಟ್‌ಫಾರ್ಮ್‌ನಿಂದ "ವಿರಾಮ ತೆಗೆದುಕೊಳ್ಳಲು" ಹೇಳುವಂತಹ ಹೊಸ ಕ್ರಮಗಳನ್ನು ಪರಿಚಯಿಸಲಾಗುತ್ತಿದ್ದು, ಹದಿಹರೆಯ ಬಳಕೆದಾರರು ಇನ್ಮುಂದೆ ಇನ್‌ಸ್ಟಾಗ್ರಾಮ್ ಖಾತೆಯನ್ನು ಸ್ವಯಂ ನಿರ್ವಹಣೆ ಮಾಡಬಹುದಾದ ಹಾಗೂ ಹದಿಹರೆಯ ಯುವ ಜನತೆಯನ್ನು ಮೇಲ್ವಿಚಾರಣೆ ಮಾಡಲು ಪೋಷಕರಿಗೆ ಐಚ್ಛಿಕ ನಿಯಂತ್ರಣಗಳನ್ನು ತರಲಾಗುತ್ತಿದೆ ಎಂದು ತಿಳಿದುಬಂದಿದೆ.

ಇನ್‌ಸ್ಟಾಗ್ರಾಮ್ ತಾಣವು ಯುವಜನರ ಮಾನಸಿಕ ಆರೋಗ್ಯದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು ಎಂಬ ವರದಿ ಬೆನ್ನಲ್ಲೇ ಇಂತಹದೊಂದು ಪರಿಣಾಮಕಾರಿ ಬದಲಾವಣೆಯನ್ನು ತರಲಾಗಿದ್ದು, ಇನ್‌ಸ್ಟಾಗ್ರಾಮ್ ತಾಣದ ಮೂಲಕ ಹದಿಹರೆಯದವರು ಒಂದೇ ವಿಷಯವನ್ನು ಪದೇ ಪದೇ ನೋಡುತ್ತಿದ್ದಾರೆ ಮತ್ತು ಇದು ಅವರ ಯೋಗಕ್ಷೇಮಕ್ಕೆ ಅನುಕೂಲವಾಗದ ವಿಷಯ ಎಂಬುದನ್ನು ನಮ್ಮ ವ್ಯವಸ್ಥೆಗಳು ನೋಡುತ್ತಿವೆ. ಹಾಗಾಗಿ, ಹದಿಹರೆಯ ಮಕ್ಕಳು ವೇದಿಕೆಯಲ್ಲಿ ಹಾನಿಕಾರಕ ವಿಷಯಗಳಿಂದ ದೂರವಿರುವಂತೆ ಮಾಡಲಿದ್ದೇವೆ. ಮತ್ತು ''ವಿರಾಮ ತೆಗೆದುಕೊಳ್ಳಲು" ಹೇಳುವಂತಹ ಹೊಸ ಕ್ರಮಗಳನ್ನು ಪರಿಚಯಿಸಲಾಗುತ್ತಿದೆ ಎಂದು ಇನ್‌ಸ್ಟಾಗ್ರಾಮ್ ಸಂಸ್ಥೆಯ ವಕ್ತಾರರು ತಿಳಿಸಿದ್ದಾರೆ.

ಫೇಸ್‌ಬುಕ್‌ ಸಂಸ್ಥೆಯ ಭಾಗವಾಗಿರುವ ಇನ್‌ಸ್ಟಾಗ್ರಾಮ್ ಹರೆಯದ ಸಮುದಾಯದಲ್ಲಿ ಅತ್ಯಂತ ಜನಪ್ರಿಯವಾಗಿದೆ. ಆದರೆ ಅದು ಎಳೆಯ ಮನಸ್ಸುಗಳ ಮೇಲೆ ಆಘಾತಕಾರಿ ಪ್ರಭಾವ ಬೀರುವ ಅಂಶಗಳನ್ನು ಹೊಂದಿದೆ ಎಂದು ದಾಖಲೆಗಳ ಮೂಲಕ ಫೇಸ್‌ಬುಕ್‌ನ ಮಾಜಿ ಉದ್ಯೋಗಿ ಡೇಟಾ ವಿಜ್ಞಾನಿ ಫ್ರಾನ್ಸಸ್‌ ಹಾಗೆನ್‌ ಫೇಸ್‌ಬುಕ್‌ ವ್ಯವಹಾರ ತಂತ್ರಗಳನ್ನು ಬಯಲಿಗೆ ಎಳೆದಿದ್ದರು. ಇನ್‌ಸ್ಟಾಗ್ರಾಮ್ ನಿಂದಾಗಿ 13.5% ಹರೆಯದ ಹೆಣ್ಣು ಮಕ್ಕಳಿಗೆ ಆತ್ಮಹತ್ಯೆ ಮಾಡಿಕೊಳ್ಳಬೇಕು ಎನ್ನಿಸುತ್ತದೆ ಎಂದು ಅಭಿಪ್ರಾಯಪಟ್ಟಿರುವುದಾಗಿ, 17% ಮಕ್ಕಳಿಗೆ ಆಹಾರ ಸೇವನೆಯ ಸಮಸ್ಯೆಯನ್ನು ಇನ್ನಷ್ಟು ತೀವ್ರವಾಗಿಸಿದೆ ಎಂದು ಆ ದಾಖಲೆಗಳಲ್ಲಿ ಹೇಳಲಾಗಿತ್ತು..
ಫೇಸ್‌ಬುಕ್ ಸ್ಥಗಿತದ ಸಮಯದಲ್ಲಿ ಪೋರ್ನ್ ವೀಕ್ಷಿಸಿದ ಜನರೆಷ್ಟು ಗೊತ್ತಾ?
ಫೇಸ್‌ಬುಕ್‌ ಸಂಶೋಧನೆಯೇ ಹೇಳುವಂತೆ, ಈ ಹರೆಯದ ಹೆಣ್ಣುಮಕ್ಕಳು ಆಹಾರಕ್ಕೆ ಸಂಬಂಧಿಸಿದ ಪೋಸ್ಟ್‌ಗಳಿಂದಾಗಿ ಇನ್ನಷ್ಟು ಖಿನ್ನರಾಗುತ್ತಿದ್ದಾರೆ ಇದು ಹೆಚ್ಚು ಹೆಚ್ಚು ಆಪ್‌ ಬಳಸುವಂತೆ ಮಾಡುತ್ತಿದೆ. ಇದರಿಂದ ಅವರು ತಮ್ಮ ದೇಹವನ್ನು ಹೆಚ್ಚು ಹೆಚ್ಚು ದ್ವೇಷಿಸುವಂತಾಗುತ್ತದೆ ಎಂದು ಹಾಗೆನ್ ಸಂದರ್ಶನದಲ್ಲಿ ಇನ್‌ಸ್ಟಾಗ್ರಾಮ್ ಪರಿಣಾಮಗಳ ಬಗ್ಗೆ ವಿವರಿಸಿದ್ದರು. ಫೇಸ್‌ಬುಕ್‌ ತನ್ನೆಲ್ಲಾ ಸೇವೆಗಳ ಮೂಲಕ, ಈ ಸಂಕಷ್ಟವನ್ನೇ ಬಂಡವಾಳ ಮಾಡಿಕೊಂಡು ಹಣ ಮಾಡುತ್ತಿದೆ. ಆದರೆ ಫೇಸ್‌ಬುಕ್‌ ಹೇಳುವುದೇ ಬೇರೆ ಎಂದು ಫೇಸ್‌ಬುಕ್‌ನ ಮಾಜಿ ಉದ್ಯೋಗಿ ಡೇಟಾ ವಿಜ್ಞಾನಿ ಫ್ರಾನ್ಸಸ್‌ ಹಾಗೆನ್ ಅವರು ಹೇಳಿದ್ದನ್ನು ನಾವಿಲ್ಲಿ ನೆನಪಿಸಿಕೊಳ್ಳಬಹುದು.