ShareChat App: ಶೇರ್‌ಚಾಟ್ ಆ್ಯಪ್ ಯಾವ ದೇಶದ್ದು? ಚೀನಾ ಮೂಲವೇ?

ಭದ್ರತೆ ಮತ್ತು ರಾಷ್ಟ್ರೀಯ ಹಿತಾಸಕ್ತಿಯ ಕಾರಣದಿಂದ ದೇಶದಲ್ಲಿ ಈಗಾಗಲೇ ಚೀನಾ ಮೂಲದ 59 ಆ್ಯಪ್‌ಗಳನ್ನು ನಿಷೇಧಿಸಲಾಗಿದೆ. ಅವುಗಳ ಪೈಕಿ ಹೆಚ್ಚು ಸದ್ದು ಮಾಡಿದ್ದು ಟಿಕ್‌ಟಾಕ್! ಆದರೆ ಟಿಕ್‌ಟಾಕ್ ಬ್ಯಾನ್ ಬೆನ್ನಲ್ಲೇ ಮತ್ತಷ್ಟು ಆ್ಯಪ್‌ಗಳು ಕೂಡ ಸುದ್ದಿ ಮಾಡಿದವು. ಚೀನಾದ ಟಿಕ್‌ಟಾಕ್ ಬ್ಯಾನ್ ಆದ ಬಳಿಕ ರೋಪೊಸೊ, ಚಿಂಗಾರಿ ಮತ್ತು ಮಿತ್ರೋ ಅತ್ಯಂತ ಹೆಚ್ಚಿನ ಸಂಖ್ಯೆಯಲ್ಲಿ ಡೌನ್‌ಲೋಡ್ ಆಯಿತು. ಜತೆಗೆ ಬಳಕೆದಾರರ ಸಂಖ್ಯೆಯೂ ಏರಿಕೆಯಾಗಿದೆ.

ಆದರೆ ಅದಕ್ಕೂ ಮೊದಲೇ ಬಳಕೆಯಲ್ಲಿರುವ ಶೇರ್‌ಚಾಟ್ ಆ್ಯಪ್‌ ಕುರಿತು ಬಹಳಷ್ಟು ಜನರು ಗೊಂದಲದಲ್ಲಿದ್ದಾರೆ. ಚೀನಾ ಆ್ಯಪ್‌ ನಿಷೇಧದ ಬಳಿಕ ಶೇರ್‌ಚಾಟ್ ಕೂಡ ಚೀನಾ ಮೂಲದ ಆ್ಯಪ್‌ ಎಂಬ ಸುದ್ದಿ ಹಬ್ಬಿರುವುದು ಇದಕ್ಕೆ ಕಾರಣ. ಆದರೆ ಶೇರ್‌ಚಾಟ್ ಚೀನಾ ಮೂಲದ ಆ್ಯಪ್‌ ಅಲ್ಲ, ಬದಲಾಗಿ ಅದು ನಮ್ಮ ದೇಶದಲ್ಲೇ ತಯಾರಾದ ಆ್ಯಪ್‌. ಹೀಗಾಗಿ ಜನರು ಶೇರ್‌ಚಾಟ್ ಬಳಸಲು ಅಡ್ಡಿಯಿಲ್ಲ.

ದೇಸಿ ಆ್ಯಪ್‌ ಶೇರ್‌ಚಾಟ್!
ಐಐಟಿ ಕಾನ್ಪುರದ ಮೂವರು ಪದವೀಧರರಾದ ಅಂಕುಶ್ ಸಚ್‌ದೇವಾ, ಭಾನು ಪ್ರತಾಪ್ ಸಿಂಗ್ ಮತ್ತು ಫರೀದ್ ಅಶಾನ್ ಎಂಬವರು ಸ್ಥಾಪಿಸಿದ ಮೊಹಲ್ಲಾ ಟೆಕ್ ಪ್ರೈವೇಟ್ ಲಿಮಿಟೆಡ್, ಬೆಂಗಳೂರಿನಲ್ಲಿ ಕಚೇರಿ ಹೊಂದಿದ್ದು, ಅದರ ಮೂಲಕ ಶೇರ್‌ಚಾಟ್ ಆ್ಯಪ್‌ ಬಿಡುಗಡೆಯಾಗಿದೆ.


ಶೇರ್‌ಚಾಟ್‌ನಲ್ಲಿ ವಿಡಿಯೋ, ಕಂಟೆಂಟ್ ಅನ್ನು ಪೋಸ್ಟ್ ಮಾಡಬಹುದಾಗಿದೆ. ಕನ್ನಡ ಸಹಿತ ದೇಶದ ಎಲ್ಲ ಪ್ರಮುಖ ಪ್ರಾಂತೀಯ ಭಾಷೆಗಳಲ್ಲಿ ಶೇರ್‌ಚಾಟ್ ಆ್ಯಪ್‌ ಲಭ್ಯವಿದೆ. ಗೂಗಲ್ ಪ್ಲೇ ಸ್ಟೋರ್ ಮತ್ತು ಆ್ಯಪಲ್ ಆ್ಯಪ್‌ ಸ್ಟೋರ್ ಮೂಲಕ ಶೇರ್‌ಚಾಟ್ ಡೌನ್‌ಲೋಡ್ ಮಾಡಿಕೊಂಡು ಬಳಸಬಹುದು.

Non China Mobile: ಹೊಸ ಮೊಬೈಲ್ ಕೊಳ್ಳುತ್ತಿದ್ದೀರಾ? ಇಲ್ಲಿ ಗಮನಿಸಿ.