ಶಿಯೊಮಿಯಿಂದ ಕಿಂಡಲ್‌ ರೀತಿಯ ಇ ರೀಡರ್‌

ಸ್ಮಾರ್ಟ್‌ಫೋನ್‌, ಸ್ಮಾರ್ಟ್‌ ಟಿವಿ, ಅಷ್ಟೆ ಯಾಕೆ ಎಲೆಕ್ಟ್ರಾನಿಕ್‌ ಟೂಥ್‌ಬ್ರಶ್‌ ಮೂಲಕ ಮಾರುಕಟ್ಟೆಯಲ್ಲಿ ತನ್ನದೇ ಜಾಗ ಮಾಡಿಕೊಂಡಿರುವ ಚೀನಾ ಮೂಲದ ಶಿಯೊಮಿ ಕಂಪನಿ ಇದೀಗ, ಅಮೆಜಾನ್‌ನ ಕಿಂಡಲ್‌ ರೀತಿಯ ಇ-ರೀಡರ್‌ ಸಾಧನವನ್ನು ಮಾರುಕಟ್ಟೆಗೆ ಪರಿಚಯಿಸಲು ಹೊರಟಿದೆ. ಈಗಾಗಲೇ ಅನೇಕ ಉತ್ಪನ್ನಗಳ ಮೂಲಕ ಬೇರೆ ಬೇರೆ ಕಂಪನಿಗಳಿಗೆ ಸ್ಪರ್ಧೆ ನೀಡಿರುವ ಶಿಯೊಮಿ, ಇ-ರೀಡರ್‌ ಸಾಧನವನ್ನು ಪರಿಚಯಿಸುವ ಮೂಲಕ ಅಮೆಜಾನ್‌ಗೂ ಬಿಸಿ ಮುಟ್ಟಿಸಲು ಸಜ್ಜಾಗಿದೆ. ಕಳೆದ ವರ್ಷ ಮಾದರಿ ಇ-ರೀಡರ್‌ವೊಂದನ್ನು ಕಂಪನಿ ಸಿದ್ಧಪಡಿಸಿತ್ತು. ಆದರೆ, ಆ ಬಳಿಕ ಈ ಸಾಧನದ ಮೇಲೆ ಕಂಪನಿ ಅಷ್ಟೇನೂ ಆಸಕ್ತಿ ತೋರಿಸದೇ, ಸ್ಮಾರ್ಟ್‌ಫೋನ್‌ ಉತ್ಪಾದನೆಗಳ ಮೇಲೆ ಹೆಚ್ಚಿನ ಗಮನ ಹರಿಸಿತು. ಹೀಗಿದ್ದಾಗ್ಯೂ, ಇದೀಗ ಇ ರೀಡರ್‌ ಸಾಧನವನ್ನು ಮಾರುಕಟ್ಟೆಗೆ ಪರಿಚಯಸಲಿದೆ ಎಂದು ವರದಿಗಳು ಹರಿದಾಡುತ್ತಿವೆ. ಆದರೆ, ಈ ಬಗ್ಗೆ ಕಂಪನಿ ಯಾವುದೇ ಅಧಿಕೃತ ಮಾಹಿತಿಯನ್ನು ಒದಗಿಸಿಲ್ಲ.

ಎಚ್‌ಟಿಸಿಯಿಂದ ಶೀಘ್ರ ಹೊಸ ಫೋನ್‌?

ಇತ್ತೀಚಿನ ದಿನಗಳಲ್ಲಿ ಎಚ್‌ಟಿಸಿಯಿಂದ ಯಾವುದೇ ಹೊಸ ಸ್ಮಾರ್ಟ್‌ಫೋನ್‌ಗಳು ಮಾರುಕಟ್ಟೆಗೆ ಬಂದಿಲ್ಲ. ಸಹಜವಾಗಿಯೇ, ಎಚ್‌ಟಿಸಿ ಸ್ಮಾರ್ಟ್‌ಫೋನ್‌ ಉತ್ಪಾದನೆಯಿಂದ ಹಿಂದೆ ಸರಿದಿದೆ ಎಂಬ ವರದಿಗಳಿದ್ದವು. ಆದರೆ, ಈ ವರದಿಗಳನ್ನು ನಿರಾಕರಿಸಿರುವ ಕಂಪನಿಯು, ಸ್ಮಾರ್ಟ್‌ಫೋನ್‌ಗಳ ಉತ್ಪಾದನೆಯನ್ನು ಮುಂದುವರಿಸುವುದಾಗಿ ಹೇಳಿದೆ. ಅಲ್ಲದೆ, ಪ್ರಸಕ್ತ ವರ್ಷ ಮತ್ತು 2019ರಲ್ಲಿ 5ಜಿ, ಎಐ ಮತ್ತು ಬ್ಲಾಕ್‌ಚೈನ್‌ ತಂತ್ರಜ್ಞಾನ ಆಧರಿತ ಸ್ಮಾರ್ಟ್‌ಫೋನ್‌ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವುದಾಗಿ ಹೇಳಿದೆ. ಈ ಬಗ್ಗೆ ಡಿಜಿಟೈಮ್ಸ್‌ ವರದಿ ಮಾಡಿದ್ದು, 5ಜಿ ಶಕೆಯನ್ನು ಆರಂಭಿಸುವ ಉತ್ಸಾಹದಲ್ಲಿ ಎಚ್‌ಟಿಸಿ ಇದೆ ಎಂದು ಹೇಳಿದೆ. ಜತೆಗೆ, 6ಜಿ ರಾರ‍ಯಮ್‌/128 ಜಿಬಿ ಮೆಮೊರಿ ಇರುವ ಎಚ್‌ಟಿಸಿ ಯು12 ಫೋನ್‌ ಅನ್ನು ಡಿಸೆಂಬರ್‌ ಅಂತ್ಯಕ್ಕೆ ಬಿಡುಗಡೆ ಮಾಡಲಿದ್ದು, ಹಾಗೆಯೇ 2019ರ ಆದಿಯಲ್ಲಿ ಬೇರೆ ಬೇರೆ ಮಾದರಿಯ ಫೋನ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸುವ ಉದ್ದೇಶವನ್ನು ಎಚ್‌ಟಿಸಿ ಕಂಪನಿ ಹೊಂದಿದೆ ಎಂದು ಹೇಳಲಾಗುತ್ತಿದೆ.ಘ್ಕಿ ಈ ಮೂಲಕ ಎಚ್‌ಟಿಸಿ ಸ್ಮಾರ್ಟ್‌ಫೋನ್‌ಗಳ ಸ್ಪರ್ಧೆಯಲ್ಲಿ ತನ್ನ ಇರುವಿಕೆಯನ್ನು ಸಾಬೀತುಪಡಿಸಲು ಮುಂದಾಗಿದೆಂದು ಹೇಳಬಹುದು.

Memrise
ನಿಮ್ಮ ಮಾತೃಭಾಷೆಯ ಹೊರತಾದ ಬೇರೆ ಬೇರೆ ದೇಶಗಳ ಭಾಷೆಯನ್ನು ಕಲಿಯುವ ಆಸಕ್ತಿ ಇದೆಯೇ? ಹಾಗಿದ್ದರೆ, ನಿಮಗೆ ಈ ಆ್ಯಪ್‌ ಅತ್ಯಂತ ಸೂಕ್ತವಾಗಿದೆಂದು ಹೇಳಬಹುದು. ಜಗತ್ತಿನ ನಾನಾ 25 ಭಾಷೆಗಳಲ್ಲಿ 150ಕ್ಕೂ ಹೆಚ್ಚು ಕೋರ್ಸ್‌ಗಳನ್ನು ಈ ಆ್ಯಪ್‌ ಒದಗಿಸುತ್ತದೆ. ಈ ಆ್ಯಪ್‌ ಬಳಸಿಕೊಂಡು ನೀವು ಇಂಗ್ಲಿಷ್‌, ಸ್ಪ್ಯಾನಿಷ್‌, ಫ್ರೆಂಚ್‌, ಜಾಪನೀಸ್‌, ಇಟಾಲಿಯನ್‌, ಚೀನೀಸ್‌, ಜರ್ಮನ್‌, ರಷ್ಯನ್‌, ಅರೆಬಿಕ್‌, ಪೋರ್ಚುಗೀಸ್‌, ಡ್ಯಾನಿಷ್‌, ಸ್ವಿಡಿಷ್‌, ತುರ್ಕಿಷ್‌, ಡಚ್‌, ಮುಂಗೊಲಿಯನ್‌ ಸೇರಿದಂತೆ ಇತರ ವಿದೇಶಿ ಭಾಷೆಗಳನ್ನು ಕಲಿಯಬಹುದಾಗಿದೆ. ಈ ಆ್ಯಪ್‌ನಲ್ಲಿ 35 ದಶಲಕ್ಷ ಅಧಿಕೃತ ಬಳಕೆದಾರರು ಇದ್ದಾರೆ.