ಏನಿದು ಇ-ಪಾಸ್‌ಪೋರ್ಟ್‌?

ಅತಿ ಶೀಘ್ರದಲ್ಲೇ ಭಾರತೀಯ ನಾಗರಿಕರಿಗೆ ಇ-ಪಾಸ್‌ಪೋರ್ಟ್‌ಗಳು ದೊರೆಯಲಿವೆ.

ಒ-ಪಾಸ್‌ಪೋರ್ಟ್‌ ಬಗ್ಗೆ ಕೆಲವು ಮಾಹಿತಿ ಇಲ್ಲಿದೆ...

ಅರ್ಜಿದಾರರ ಎಲ್ಲ ವೈಯಕ್ತಿಕ ಮಾಹಿತಿಗಳನ್ನು ಡಿಜಿಟಲ್‌ ಸೈನ್‌ ಮಾಡಿಸಿ ಚಿಪ್‌ನಲ್ಲಿ ಸಂಗ್ರಹಿಸಲಾಗುತ್ತದೆ. ಒಂದೊಮ್ಮೆ ಯಾರಾದರೂ ಚಿಪ್‌ ಅನ್ನು ಟ್ಯಾಂಪರ್‌ ಮಾಡಲು ಮುಂದಾದರೆ, ಅದು ತಕ್ಷಣ ಗೊತ್ತಾಗುತ್ತದೆ, ಮತ್ತು ಪಾಸ್‌ಪೋರ್ಟ್‌ ದೃಢೀಕರಣ ವಿಫಲವಾಗುತ್ತದೆ. ಹಾಗಂತ ಇದರ ಮಾಹಿತಿಯನ್ನು ಯಾರು ಬೇಕಾದರೂ ಓದಲು ಸಾಧ್ಯವಿಲ್ಲ. ಅದಕ್ಕೆ ಪಾಸ್‌ವರ್ಡ್‌ ಇರಲೇಬೇಕು. ಇದನ್ನು ಬಯೋಮೆಟ್ರಿಕ್‌ ಪಾಸ್‌ಪೋರ್ಟ್‌ ಎಂದೂ ಕರೆಯಲಾಗುತ್ತದೆ.

ಸದ್ಯವೇ ಬರಲಿದೆ ಇ-ಪಾಸ್‌ಪೋರ್ಟ್‌

ಹಿಂದಿನದಕ್ಕಿಂತ ಹೇಗೆ ಭಿನ್ನ?

1. ಇ-ಪಾಸ್‌ಪೋರ್ಟ್‌ನ ಎದುರು ಮತ್ತು ಹಿಂಬದಿಯಲ್ಲಿ ದಪ್ಪನೆಯ ಹೊದಿಕೆ ಇರುತ್ತದೆ.

2. ಹಿಂದಿನ ಕವಚದಲ್ಲಿ ಅಂಚೆ ಸ್ಟಾಂಪ್‌ಗಿಂತಲೂ ಸಣ್ಣದಾದ ಸಿಲಿಕಾನ್‌ ಚಿಪ್‌ ಇರುತ್ತದೆ. ಅದಕ್ಕೆ ಒಂದು ಆಯತಾಕಾರದ ಆ್ಯಂಟೆನಾದ ಸಂಪರ್ಕವಿರುತ್ತದೆ.

3. ಚಿಪ್‌ ರೀಡ್‌ ಆಗಲು ಕೆಲವೇ ಸೆಕೆಂಡ್‌ಗಳು ಸಾಕು. ಹೀಗಾಗಿ ವಲಸೆ ಕೇಂದ್ರಗಳಲ್ಲಿ ಸಮಯದ ಉಳಿತಾಯವಾಗುತ್ತದೆ.

4. ಇದರ ಸಾಫ್ಟ್‌ ವೇರನ್ನು ಐಐಟಿ ಕಾನ್ಪುರ್‌ ಮತ್ತು ರಾಷ್ಟ್ರೀಯ ಮಾಹಿತಿ ಕೇಂದ್ರ(ಎನ್‌ಐಸಿ)ದಲ್ಲಿ ಅಭಿವೃದ್ಧಿಪಡಿಸಲಾಗಿದ್ದು, ಯಾವುದೇ ಬಾಹ್ಯ ಏಜೆನ್ಸಿ ಭಾಗಿಯಾಗಿಲ್ಲ.

5. ಚಿಪ್‌ನಲ್ಲಿ 64 ಕಿಲೋಬೈಟ್‌ನಷ್ಟು ಸ್ಮರಣೆ ಅವಕಾಶವಿದ್ದು, 30 ಪ್ರಯಾಣ ಮತ್ತು ಅಂತಾರಾಷ್ಟ್ರೀಯ ಪ್ರವಾಸ ವಿವರಗಳನ್ನು ದಾಖಲಿಸಿಕೊಳ್ಳುತ್ತದೆ.

6. ಚಿಪ್‌ನಲ್ಲಿ ವ್ಯಕ್ತಿಯ ಭಾವಚಿತ್ರ ಮತ್ತು ಬೆರಳಚ್ಚನ್ನೂ ಹೊಂದಿಸಲಾಗುತ್ತದೆ.

7. ಇದರ ಮೊದಲ ಪರೀಕ್ಷೆಯನ್ನು ಅಮೆರಿಕ ಸರಕಾರದ ಪ್ರಯೋಗಾಲಯದಲ್ಲಿ ನಡೆಸಲಾಗಿದೆ.

114 ದೇಶಗಳು ಇ- ಪಾಸ್‌ಪೋರ್ಟ್‌ ವ್ಯವಸ್ಥೆ ಹೊಂದಿವೆ. ಅಂದರೆ ವಿಶ್ವಸಂಸ್ಥೆಯ ಸದಸ್ಯ ರಾಷ್ಟ್ರಗಳ (193) ಅರ್ಧಕ್ಕಿಂತ ಹೆಚ್ಚು ರಾಷ್ಟ್ರಗಳು ಇ-ಪಾಸ್‌ಪೋರ್ಟ್‌ ವ್ಯವಸ್ಥೆ ಹೊಂದಿದಂತಾಗಿದೆ.