ಲ್ಯಾಪ್‌ಟಾಪ್‌ ಜತೆ ಸಿಮ್‌

ಟೆಲಿಕಾಮ್‌ ವಲಯದಲ್ಲಿ ತನ್ನದೇ ಆದ ಕ್ರೇಜ್‌ ಸೃಷ್ಟಿಸಿರುವ ರಿಲಿಯನ್ಸ್‌ ಜಿಯೊ ಇದೀಗ ಮತ್ತೊಂದು ಸಾಹಸಕ್ಕೆ ಮುಂದಾಗುತ್ತಿದೆ. 4ಜಿ ಫೀಚರ್‌ ಫೋನ್‌ ಮತ್ತು ಸ್ಮಾರ್ಟ್‌ಫೋನ್‌ಗಳ ಬಳಿಕ ರಿಲಯನ್ಸ್‌ ಜಿಯೊ ಇದೀಗ ಸಿಮ್‌ ಇರುವ ಲ್ಯಾಪ್‌ಟಾಪ್‌ಗಳನ್ನು ಬಿಡುಗಡೆ ಮಾಡಲು ಮುಂದಾಗುತ್ತಿದೆ. ಮುಕೇಶ್‌ ಅಂಬಾನಿ ನೇತೃತ್ವದ ಕಂಪನಿಯು ಈ ಬಗ್ಗೆ ಈಗಾಗಲೇ ಅಮೆರಿಕ ಚಿಪ್‌ ತಯಾರಿಕಾ ಕಂಪನಿ ಕ್ವಾಲಕಾಮ್‌ ಜತೆ ಮಾತುಕತೆ ನಡೆಸಿದೆ. ಇನ್‌ಬಿಲ್ಟ್‌ ಆಗಿಯೇ ಸೆಲ್ಯೂಲರ್‌ ಕನೆಕ್ಷ ನ್‌ ಇರುವ ವಿಂಡೋಸ್‌ 10 ಒಎಸ್‌ ಆಧರಿತ ಲ್ಯಾಪ್‌ಟಾಪ್‌ಗಳನ್ನು ಭಾರತೀಯ ಮಾರುಕಟ್ಟೆಗೆ ಪರಿಚಯಿಸುವ ಬಗ್ಗೆ ಮಾತುಕತೆ ನಡೆಸಿದೆ. ಈಗಾಗಲೇ ಕ್ವಾಲಕಾಮ್‌ ಕಂಪನಿ ರಿಲಯನ್ಸ್‌ ರಿಟೇಲ್‌ಗಾಗಿ ಕೆಲಸ ಮಾಡುತ್ತಿದ್ದು, ಈ ಬಗ್ಗೆ ನಾವು ಈಗಾಗಲೇ ಜಿಯೊ ಜತೆ ಮಾತನಾಡಿದ್ದೇವೆ ಎಂದು ಕ್ವಾಲಕಾಮ್‌ ಟೆಕ್ನಾಲಿಜಸ್‌ನ ಸೀನಿಯರ್‌ ಡೈರೆಕ್ಟರ್‌ ಒಬ್ಬರು ಹೇಳಿದ್ದಾರೆ. ರಿಲಯನ್ಸ್‌ನ ಹೊಸ ಸಾಹಸ ವಾಸ್ತವಕ್ಕೆ ಬಂದರೆ ಮಾರುಕಟ್ಟೆಯಲ್ಲಿ ಸಂಚಲನ ಸೃಷ್ಟಿಯಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ.


ಡೇಟಾ ಡೌನ್‌ಲೋಡ್‌ ಮಾಡಿ

ಫೇಸ್‌ಬುಕ್‌ ಒಡೆತನದ ಫೋಟೋ ಶೇರಿಂಗ್‌ ವೆಬ್‌ಸೈಟ್‌ ಇನ್‌ಸ್ಟಾಗ್ರಾಮ್‌ ಶೀಘ್ರದಲ್ಲೇ ತನ್ನ ಬಳಕೆದಾರರಿಗೆ ಡೇಟಾ ಡೌನ್‌ಲೋಡ್‌ ಮಾಡಲು ಅವಕಾಶ ಕಲ್ಪಿಸಲಿದೆ. ಬಳಕೆದಾರರು ಅಪ್‌ಲೋಡ್‌ ಮಾಡಿರುವ ಎಲ್ಲ ಕಂಟೆಂಟ್‌ ಡೌನ್‌ಲೋಡ್‌ ಮಾಡಿಕೊಳ್ಳಬಹುದು ಎಂದು ಕಂಪನಿಯ ವಕ್ತಾರರು ತಿಳಿಸಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಬಳಕೆದಾರರ ಮಾಹಿತಿ ದುರುಪಯೋಗವಾಗುತ್ತಿರುವ ಆರೋಪ ಕೇಳಿ ಬರುತ್ತಿರುವ ಹಿನ್ನೆಲೆಯಲ್ಲಿ ಕಂಪನಿ ಈ ನಿರ್ಧಾರಕ್ಕೆ ಬಂದಿದೆ. ಇದಕ್ಕಾಗಿ ಕಂಪನಿಯ ಡೇಟಾ ಫೋರ್ಟೆಬಿಲಿಟಿ ಟೂಲ್‌ವೊಂದನ್ನು ಅಭಿವೃದ್ಧಿಪಡಿಸುತ್ತಿದೆ. ಫೇಸ್‌ಬುಕ್‌ ಕೂಡ ಈ ವಿಷಯದಲ್ಲಿ ಜಗತ್ತಿನಾದ್ಯಂತ ತೀವ್ರ ಟೀಕೆಯನ್ನು ಎದುರಿಸುತ್ತಿರುವುದನ್ನು ಇಲ್ಲಿ ಸ್ಮರಿಸಬಹುದು. ಈ ಅವಕಾಶವನ್ನು ಈಗಾಗಲೇ ಫೇಸ್‌ಬುಕ್‌ ತನ್ನ ಬಳಕೆದಾರರಿಗೆ ನೀಡಿದ್ದು, ಅದೇ ಹಾದಿಯನ್ನು ಇನ್‌ಸ್ಟಾಗ್ರಾಮ್‌ ಇದೀಗ ಅನುಸರಿಸುತ್ತಿದೆ. ಆ ಮೂಲಕ ವಿಶ್ವಾಸಾರ್ಹತೆಯನ್ನು ಕಾಯ್ದುಕೊಳ್ಳುವ ಪ್ರಯತ್ನ ಮಾಡುತ್ತಿದೆ ಎಂದು ಹೇಳಬಹುದು.

ಆರ್ಕುಟ್‌ ಸ್ಥಾಪಕನಿಂದ 'ಹಲೊ'

ಆರ್ಕುಟ್‌ ಬಳಕೆದಾರರಿಗೆ ಅದರ ಸ್ಥಾಪಕ ಈಗ 'ಹಲೊ' ಹೇಳುತ್ತಿದ್ದಾರೆ! ಹೀಗೆ ಹೇಳಿದಾಕ್ಷ ಣ ಗೊಂದಲಕ್ಕೆ ಬೀಳಬೇಡಿ. ಫೇಸ್‌ಬುಕ್‌ ಅಬ್ಬರಕ್ಕೆ ತನ್ನ ಸದ್ದನ್ನೇ ಕಳೆದುಕೊಂಡಿತ್ತು ಆರ್ಕುಟ್‌. ಇದೀಗ ಅದರ ಸ್ಥಾಪಕ ಆರ್ಕುಟ್‌ ಬಯುಕ್ಕುಟಿನ್‌ ಅವರು 'ಹಲೊ' ಎಂಬ ಹೊಚ್ಚ ಹೊಸ ಸಾಮಾಜಿಕ ಜಾಲತಾಣದೊಂದಿಗೆ ಪ್ರತ್ಯಕ್ಷ ವಾಗಿದ್ದಾರೆ. ಮಾಹಿತಿ ಮಾರಾಟ ಹಿನ್ನೆಲೆಯಲ್ಲಿ ಬಹಳಷ್ಟು ಜನರು ಫೇಸ್‌ಬುಕ್‌ ಡಿಲಿಟ್‌ ಮಾಡುತ್ತಿರುವ ಸಂದರ್ಭದಲ್ಲಿ ಆರ್ಕುಟ್‌ ಸ್ಥಾಪಕ ಹಲೊ ಮೊಬೈಲ್‌ ಆ್ಯಪ್‌ನೊಂದಿಗೆ ಎಂಟ್ರಿ ಕೊಟ್ಟಿರುವುದು ಕುತೂಹಲ ಮೂಡಿಸಿದೆ. ಸೃಜನಾತ್ಮಕ ಮತ್ತು ಅರ್ಥಪೂರ್ಣವಾದ ಸಂಬಂಧವನ್ನು ಬೆಸೆಯುವ ವೇದಿಕೆಯನ್ನಾಗಿ ಹಲೊ ನಿರ್ಮಿಸಲಾಗಿದೆ ಎಂಬುದು ಅವರ ಅಂಬೋಣ. ಫೇಸ್‌ಬುಕ್‌ ಪ್ರವರ್ಧಮಾನಕ್ಕೆ ಬರುವ ಮುಂಚೆ ಆರ್ಕುಟ್‌ ತುಂಬ ಜನಪ್ರಿಯವಾಗಿತ್ತು. ಅದರಲ್ಲೂ ಭಾರತದಲ್ಲಂತೂ ಅದಕ್ಕೆ ಸಿಕ್ಕಾಪಟ್ಟೆ ಬಳಕೆದಾರರಿದ್ದರು. ಈಗಲೂ ಅನೇಕರು ಆರ್ಕುಟ್‌ ವ್ಯಾಮೋಹ ಹೊಂದಿದ್ದಾರೆ.