ಟಿಕ್‌ಟಾಕ್‌ ಡೌನ್ಲೋಡ್‌ ನಿಷೇಧ ಆದೇಶ ಹಿಂಪಡೆಯಲು ಮದ್ರಾಸ್ ಹೈಕೋರ್ಟ್ ನಕಾರ

ಮಧುರೈ: ಮದ್ರಾಸ್‌ ಹೈಕೋರ್ಟ್‌ನ ಮಧುರೈ ಪೀಠ ಮಂಗಳವಾರ ಚೀನಾ ಮೂಲದ ಆ್ಯಪ್‌ ಟಿಕ್‌ಟಾಕ್‌ ಕುರಿತು ನೀಡಿದ್ದ ತೀರ್ಪನ್ನು ಮರುಪರಿಶೀಲಿಸಲು ಅಥವಾ ರದ್ದುಗೊಳಿಸಲು ತಿರಸ್ಕರಿಸಿದೆ.

ಟಿಕ್‌ಟಾಕ್‌ ಡೌನ್ಲೋಡ್‌ ಮಾಡುವುದನ್ನು ತಡೆಗಟ್ಟುವಂತೆ ಅಥವಾ ನಿಷೇಧಿಸುವಂತೆ ದ್ವಿಸದಸ್ಯ ಪೀಠ ಸರಕಾರಕ್ಕೆ ಮಧ್ಯಂತರ ಆದೇಶ ನೀಡಿತ್ತು. ಅಲ್ಲದೆ, ಟಿಕ್‌ಟಾಕ್‌ ವೀಡಿಯೋಗಳನ್ನು ಪ್ರಸಾರ ಮಾಡದಂತೆ ಮಾಧ್ಯಮಗಳಿಗೆ ನಿರ್ದೇಶನ ನೀಡಬೇಕು ಎಂದು ಸಹ ಮದ್ರಾಸ್‌ ಹೈಕೋರ್ಟ್‌ನ ಮಧುರೈ ಪೀಠ ಆದೇಶಿಸಿತ್ತು.

ಟಿಕ್‌ಟಾಕ್‌ ಆ್ಯಪ್‌ನಲ್ಲಿ ಶಾಂತಿಗೆ ತೊಂದರೆಯಾಗುವಂತಹ ವಿಚಾರ ಹಾಗೂ ಸಂಸ್ಕೃತಿಯನ್ನು ಕೀಳುದರ್ಜೆ ಮಾಡುವ ಪ್ರೋತ್ಸಾಹ ಮಾಡುತ್ತಿದೆ ಎಂದು ಮಧುರೈನ ಮುತ್ತುಕುಮಾರ್ ಎಂಬುವರು ಸಲ್ಲಿಸಿದ ಪಿಐಎಲ್‌ ಆಧಾರದ ಮೇಲೆ ಕೋರ್ಟ್ ಈ ನಿರ್ದೇಶನಗಳನ್ನು ನೀಡಿತ್ತು.

ಇದೇ ರೀತಿ ಮಂಗಳವಾರ ( ಏಪ್ರಿಲ್ 16, 2019)ರಂದು ಮದ್ರಾಸ್‌ ಹೈಕೋರ್ಟ್ ಈ ವಿಚಾರಣೆಯನ್ನು ಮತ್ತೊಮ್ಮೆ ಕೈಗೆತ್ತಿಕೊಂಡಿತ್ತು. ಆ ವೇಳೆ, ಟಿಕ್‌ಟಾಕ್‌ ಪರ ವಕೀಲರು, ''ಶೇ. 50-60ಕ್ಕೂ ಅಧಿಕ ದೇಹ ಪ್ರದರ್ಶನ ಮಾಡುತ್ತಿರುವ ವೀಡಿಯೋಗಳನ್ನು ಫಿಲ್ಟರ್ ಮಾಡಲಾಗುತ್ತದೆ. ಆಕ್ಷೇಪಾರ್ಹ ವಿಚಾರ ಇರುವ ಬಗ್ಗೆ ಎಚ್ಚರಿಕೆ ವಹಿಸುತ್ತಿದ್ದು, ಭಾರತದ ಬಳಕೆದಾರರ 60 ಲಕ್ಷ ವೀಡಿಯೋಗಳನ್ನು ತೆಗೆದುಹಾಕಲಾಗಿದೆ ಎಂದು ಕೋರ್ಟ್‌ಗೆ ಮಾಹಿತಿ ನೀಡಿದರು.

ಆದರೂ ಸಹ ತನ್ನ ಹಿಂದಿನ ಆದೇಶ ಮರುಪರಿಶೀಲನೆ ಮಾಡಲು ಅಥವಾ ರದ್ದುಗೊಳಿಸಲು ಕೋರ್ಟ್ ತಿರಸ್ಕರಿಸಿದೆ. ಅಲ್ಲದೆ, ಕೋರ್ಟ್‌ಗೆ ಈ ವಿಚಾರದಲ್ಲಿ ಅಸಿಸ್ಟ್‌ ಮಾಡಲು ಹಿರಿಯ ವಕೀಲ ಅರವಿಂದ್. ಪಿ ರನ್ನು ಅಮಿಕ್ಯಸ್ ಕ್ಯೂರಿಯನ್ನಾಗಿ ನೇಮಿಸಿದೆ.