ಐಫೋನ್‌ಗೆ ಮಾಲ್‌ವೇರ್‌

ಭಾರತದಲ್ಲಿರುವ ಐಫೋನ್‌ಗಳನ್ನೇ ಗುರಿಯಾಗಿಸಿಕೊಂಡಿರುವ ಒಂದು ಮಾಲ್‌ವೇರ್‌ (ಕುತಂತ್ರಾಂಶ) ಇತ್ತೀಚೆಗೆ ಪತ್ತೆಯಾಗಿದೆ. ಭಾರತದಲ್ಲಿ ಇದುವರೆಗೆ 13 ಮಂದಿ ಗಣ್ಯರ ಐಫೋನ್‌ಗಳು ಈ ಮಾಲ್‌ವೇರ್‌ಗೆ ತುತ್ತಾಗಿದ್ದು, ಅವುಗಳಲ್ಲಿದ್ದ ಅಮೂಲ್ಯ ಡೇಟಾಗಳನ್ನು ಹ್ಯಾಕರ್‌ ಕದ್ದಿದ್ದಾನಂತೆ.

ಈ ಹ್ಯಾಕರ್‌ ರಷ್ಯನ್‌ ಹೆಸರುಗಳನ್ನಿಟ್ಟುಕೊಂಡು, ರಷ್ಯನ್‌ನಂತೆಯೇ ವರ್ತಿಸುತ್ತಿದ್ದರೂ, ಮೂಲತಃ ಭಾರತದವನು ಎಂದು ಶಂಕಿಸಲಾಗಿದೆ. ಭಾರತೀಯ ಐಫೋನ್‌ ಬಳಕೆದಾರರು, ಅದರಲ್ಲೂ ವಿವಿಐಪಿಗಳು ಹೆಚ್ಚಿನ ಎಚ್ಚರಿಕೆ ವಹಿಸಬೇಕು; ಇಲ್ಲವಾದರೆ ಅಪಾಯ ಕಾದಿದೆ ಎಂದು ವಾಣಿಜ್ಯ ಬೇಹು ಸಂಸ್ಥೆ ಸಿಸ್ಕೊ ಇಂಟಲಿಜೆನ್ಸ್‌ ತಿಳಿಸಿದೆ.

ಹ್ಯಾಕರ್‌ ಮಾಲ್‌ವೇರನ್ನು ವಾಟ್ಸ್‌ಆ್ಯಪ್‌, ಟೆಲಿಗ್ರಾಂ ಮುಂತಾದ ಸಾಮಾಜಿಕ ತಾಣಗಳ ಮೂಲಕ ಕಳುಹಿಸುವ ತಂತ್ರ ಅನುಸರಿಸುತ್ತಿದ್ದಾನೆ. ಫೋನ್‌ ಬಳಕೆದಾರನನ್ನು ಬ್ಲ್ಯಾಕ್‌ಮೇಲ್‌ ಮಾಡಲು ಎಷ್ಟು ಬೇಕೋ ಅಷ್ಟು ಮಾಹಿತಿಯನ್ನು ಹ್ಯಾಕರ್‌ ಕದಿಯುತ್ತಿದ್ದಾನಂತೆ. ಸಾಮಾನ್ಯವಾಗಿ ಐಪೋನ್‌ಗಳು ಹ್ಯಾಕ್‌ ಆಗುವುದು ಕಡಿಮೆ. ಆದರೆ ಸಾಮಾಜಿಕ ತಾಣಗಳ ಮೂಲಕ, ಬಳಕೆದಾರರ ದೌರ್ಬಲ್ಯವನ್ನೇ ಬಳಸಿಕೊಂಡು ಈತ ಆಟವಾಡುತ್ತಿದ್ದಾನೆ ಎಂಬುದು ಗೊತ್ತಾಗಿದೆ.