4 ವರ್ಷದಲ್ಲಿ ಸ್ಮಾರ್ಟ್‌ಫೋನ್‌ ಸಂಖ್ಯೆ ದ್ವಿಗುಣ: ಮೆಕಿನ್ಸೆ

2013ರಿಂದ ಈಚೆಗೆ ಡೇಟಾ ದರ ಶೇ.95ರಷ್ಟು ಇಳಿಕೆಯಾಗಿದೆ. ಇದರಿಂದಾಗಿ ಇಂಟರ್‌ನೆಟ್‌ ಬಳಕೆ ಭಾರತದಲ್ಲಿ ವೇಗವಾಗಿ ವೃದ್ಧಿಯಾಗುತ್ತಿದೆ. 2023ಕ್ಕೆ ದೇಶದಲ್ಲಿ ಅಂತರ್ಜಾಲ ಬಳಕೆದಾರರ ಸಂಖ್ಯೆ ಶೇ. 40ರಷ್ಟು ಏರಿಕೆಯಾಗಲಿದೆ. ಜೊತೆಗೆ ಸ್ಮಾರ್ಟ್‌ಫೋನ್‌ಗಳ ಸಂಖ್ಯೆ ದ್ವಿಗುಣವಾಗಲಿದೆ ಎಂದು ಮೆಕಿನ್ಸೆ ಗ್ಲೋಬಲ್‌ ಇನ್‌ಸ್ಟಿಟ್ಯೂಟ್‌ ವರದಿಯಲ್ಲಿ ಹೇಳಲಾಗಿದೆ.

ಜಾಗತಿಕ ಮಟ್ಟದ ಸಲಹಾ ಕಂಪನಿ ಮೆಕಿನ್ಸೆಯ 'ಡಿಜಿಟಲ್‌ ಇಂಡಿಯಾ-ಟೆಕ್ನಾಲಜಿ ಟು ಟ್ರಾನ್ಸ್‌ಫಾರ್ಮ್‌ ಎ ಕನೆಕ್ಷನ್‌ ನೇಷನ್‌' ವರದಿಯಲ್ಲಿ, ಭಾರತದಲ್ಲಿನ ಡಿಜಿಟಲ್‌ ಕ್ರಾಂತಿಯನ್ನು ವಿವರಿಸಲಾಗಿದೆ. ''ಡಿಜಿಟಲ್‌ ಬಳಕೆಗೆ ಸಂಬಂಧಿಸಿದಂತೆ ವಿಶ್ವದ ತ್ವರಿತ ಮತ್ತು ಬೃಹತ್‌ ಮಾರುಕಟ್ಟೆಯಲ್ಲಿ ಭಾರತವೂ ಒಂದಾಗಲಿದೆ. 2018ಕ್ಕೆ 56 ಕೋಟಿ ಅಂತರ್ಜಾಲ ಬಳಕೆದಾರರನ್ನು ಭಾರತ ಹೊಂದಿತ್ತು. ''ನಮ್ಮ ವಿಶ್ಲೇಷಣೆಗಳ ಪ್ರಕಾರ, ಡಿಜಿಟಲ್‌ ಬೆಳವಣಿಗೆಯ ಮಟ್ಟ ಇತರೆ ಎಲ್ಲ ದೇಶಗಳಿಗಿಂತಲೂ ಭಾರತದಲ್ಲಿ ಹೆಚ್ಚಿದೆ,'' ಎಂದು ವರದಿಯಲ್ಲಿ ಹೇಳಲಾಗಿದೆ.

ಭಾರತದ ಮೊಬೈಲ್‌ ಡೇಟಾ ಬಳಕೆದಾರರು ತಿಂಗಳಿಗೆ ಸರಾಸರಿ 8.3 ಗಿಗಾಬೈಟ್ಸ್‌(ಜಿಬಿ) ಡೇಟಾವನ್ನು ಬಳಸುತ್ತಿದ್ದಾರೆ. ಚೀನಾದಲ್ಲಿ ಸರಾಸರಿ ಡೇಟಾ ಬಳಕೆ 5.5 ಜಿಬಿ ಇದೆ. ದಕ್ಷಿಣ ಕೊರಿಯಾದಲ್ಲಿ ಸರಾಸರಿ 8 ರಿಂದ 8.5 ಜಿಬಿ ಡೇಟಾವನ್ನು ಗ್ರಾಹಕರು ಬಳಸುತ್ತಿದ್ದಾರೆ.

2018ರಲ್ಲಿ 102 ಕೋಟಿ ಮೊಬೈಲ್‌ ಫೋನ್‌ ಚಂದಾದಾರಿಕೆಗಳು, 123 ಕೋಟಿ ಮೊಬೈಲ್‌ ಆ್ಯಪ್‌ಗಳು ಡೌನ್‌ಲೋಡ್‌ ಆಗಿವೆ. ಚೀನಾ ಹೊರತು ಪಡೆಸಿದರೆ ಇತರೆ ಯಾವುದೇ ದೇಶದ ಜನಸಂಖ್ಯೆಗಿಂತಲೂ ಇದು ಅಧಿಕ.

ಸರಕಾರವು ಡಿಜಿಟಲ್‌ ಎಕಾನಮಿಗೆ ಪ್ರೋತ್ಸಾಹ ನೀಡುತ್ತಿದ್ದು, ರಿಲಯನ್ಸ್‌ ಜಿಯೊದಂಥ ಖಾಸಗಿ ಕಂಪನಿಗಳಿಂದ ಡೇಟಾ ದರ ಗಣನೀಯವಾಗಿ ಇಳಿಕೆಯಾಗಿದೆ. ಮೊಬೈಲ್‌ ಡೇಟಾ ಬಳಕೆಯು ವಾರ್ಷಿಕವಾಗಿ ಶೇ.152ರಷ್ಟು ಏರಿಕೆಯಾಗಿದೆ.