Apple MacBook ಗೆ ಮೈಕ್ರೋಸಾಫ್ಟ್‌ನ 'ಮ್ಯಾಕ್ ಬುಕ್' ಟಾಂಗ್!

ದಿಗ್ಗಜ ಬ್ರ್ಯಾಂಡ್‌ಗಳ ಶ್ರೇಷ್ಠತೆಯ ಯುದ್ಧ ಕೇವಲ ಉತ್ಪನ್ನಗಳ ಮಧ್ಯೆ ಮಾತ್ರವೇ ಅಲ್ಲ, ಜಾಹೀರಾತಿನಲ್ಲೂ ಆಗಾಗ್ಗೆ ಈ ರೀತಿಯ ಆಸಕ್ತಿಯ ಸಂಗತಿಗಳು ನಡೆಯುತ್ತವೆ. ಈಗ ಕಂಪ್ಯೂಟರ್ ದಿಗ್ಗಜ ಮೈಕ್ರೋಸಾಫ್ಟ್, ತನ್ನ ಪ್ರತಿಸ್ಫರ್ಧಿ ಆ್ಯಪಲ್‌ಗೆ ಟಾಂಗ್ ಕೊಡಲು ಮತ್ತು ತಾನೇ ಶ್ರೇಷ್ಠ ಎಂದು ಹೇಳಿಕೊಳ್ಳಲು ಏನು ಮಾಡಿದೆ ಗೊತ್ತೇ? 'ಮ್ಯಾಕ್ ಬುಕ್' ಎಂಬ ಹೆಸರಿನ ವ್ಯಕ್ತಿಯ ಬಾಯಲ್ಲೇ ಇದನ್ನು ಹೇಳಿಸಿದೆ!

ಮೈಕ್ರೋಸಾಫ್ಟ್ ಇತ್ತೀಚೆಗೆ ಬಿಡುಗಡೆ ಮಾಡಿದ ಜಾಹೀರಾತು ವೀಡಿಯೋದಲ್ಲಿ ಆ್ಯಪಲ್‌ನ ಮ್ಯಾಕ್ ಬುಕ್ ಲ್ಯಾಪ್‌ಟಾಪ್‌ಗಿಂತಲೂ ಮೈಕ್ರೋಸಾಫ್ಟ್‌ನ ಸರ್ಫೇಸ್ ಲ್ಯಾಪ್‌ಟಾಪ್ ಶ್ರೇಷ್ಠ ಎಂದು ಸ್ವತಃ ಈ 'ಮ್ಯಾಕ್ ಬುಕ್' ಹೇಳುವ ರೀತಿಯ ತುಣುಕುಗಳಿವೆ.

ಈ ಜಾಹೀರಾತಿನಲ್ಲಿ ಮೆಕೆಂಜೀ ಬುಕ್ ಎಂಬ ಹೆಸರಿನ ವ್ಯಕ್ತಿಗೆ ಸರ್ಫೇಸ್ ಲ್ಯಾಪ್‌ಟಾಪ್ ಕುರಿತು ನಿರೂಪಕ ಹಲವಾರು ಪ್ರಶ್ನೆಗಳನ್ನು ಕೇಳುತ್ತಾನೆ. ಮೆಕೆಂಜೀ ಎಂಬುದರ ಸಂಕ್ಷಿಪ್ತ ರೂಪ ಮ್ಯಾಕ್. ಹೀಗಾಗಿ ಆತನನ್ನು ಮ್ಯಾಕ್ ಬುಕ್ ಎಂದೇ ಪರಿಗಣಿಸಲಾಗುತ್ತದೆ. ಯಾವ ಲ್ಯಾಪ್‌ಟಾಪ್ ದೀರ್ಘ ಬಾಳಿಕೆ ಬರುತ್ತದೆ, ಯಾವುದು ವೇಗವಾಗಿದೆ ಮತ್ತು ಯಾವುದರ ಟಚ್ ಸ್ಕ್ರೀನ್ ಒಳ್ಳೆಯದಿದೆ ಎಂದು ಕೇಳುತ್ತಾನೆ. ಸಹಜವಾಗಿ ಮ್ಯಾಕ್ ಬುಕ್ ಪ್ರತೀ ಬಾರಿಯೂ ಸರ್ಫೇಸ್ ಎಂದೇ ಉತ್ತರಿಸುತ್ತಾನೆ.

(ಜಾಹೀರಾತು ಇಲ್ಲಿದೆ ನೋಡಿ)

ಸ್ಕ್ರೀನ್ ಮೇಲೂ, Mac Book says Surface is faster ಎಂಬಿತ್ಯಾದಿ ಬರಹಗಳೂ ಕಾಣಿಸುತ್ತವೆ.

ಕೊನೆಯಲ್ಲಿ, 'ನೀವು ಸರ್ಫೇಸ್ ಖರೀದಿಸಿ, ನನ್ನನ್ನು ನಂಬಿ. ನಾನು ಮ್ಯಾಕ್ ಬುಕ್' ಎಂದು ಹೇಳಿದಾಗ ಈ ಜಾಹೀರಾತು ತುಣುಕು ಕೂಡ ಕೊನೆಗೊಳ್ಳುತ್ತದೆ.

ಆ್ಯಪಲ್‌ನ ಮ್ಯಾಕ್‌ಬುಕ್ ಲ್ಯಾಪ್‌ಟಾಪ್‌ಗಳಲ್ಲಿ ಟಚ್ ಸ್ಕ್ರೀನ್ ವ್ಯವಸ್ಥೆ ಇಲ್ಲ. ಕೆಲವು ಮ್ಯಾಕ್‌ಬುಕ್ ಪ್ರೋ ಮಾಡೆಲ್‌ಗಳಲ್ಲಿ ಕೀಬೋರ್ಡ್ ಮೇಲೆ ಟಚ್ ಬಾರ್ ಮಾತ್ರ ಇದೆ.

ಆ್ಯಪಲ್ ಮತ್ತು ಮೈಕ್ರೋಸಾಫ್ಟ್ ನಡುವೆ ಈ ರೀತಿಯ ಜಾಹೀರಾತು ಸಮರ ಇದೇ ಹೊಸದಲ್ಲ. ಕಂಪ್ಯೂಟರ್ ಕ್ಷೇತ್ರದ ಪಾರಮ್ಯಕ್ಕೆ ಈ ಎರಡು ದಿಗ್ಗಜ ಕಂಪನಿಗಳ ನಡುವಿನ ಟಾಂಗ್ ಯುದ್ಧಕ್ಕೆ ಸುದೀರ್ಘ ಇತಿಹಾಸವೇ ಇದೆ. 2000ದ ಆರಂಭದಲ್ಲಿ ಜಸ್ಟಿನ್ ನಾಂಗ್ ಮತ್ತು ಜಾನ್ ಹಾಜ್‌ಮನ್ ಅವರಿದ್ದ ಆ್ಯಪಲ್‌ನ 'ಗೆಟ್ ಎ ಮ್ಯಾಕ್' ಜಾಹೀರಾತು ಅಭಿಯಾನ ಕೆಲವರಿಗೆ ನೆನಪಿರಬಹುದು. ಮೈಕ್ರೋಸಾಫ್ಟ್ ಕಂಪ್ಯೂಟರುಗಳಿಗೆ ಹೋಲಿಸಿದರೆ ಮ್ಯಾಕ್ ಶ್ರೇಷ್ಠ ಎಂದು ಸಾರಲು 'ಮ್ಯಾಕ್ ಪಡೆಯಿರಿ' ಅಭಿಯಾನ ನಡೆಸಿತ್ತು.

ಇದಕ್ಕೆ ಮೈಕ್ರೋಸಾಫ್ಟ್ ತಿರುಗೇಟು ನೀಡಿತ್ತು.