Windows 7: ಗುಡ್‌ಬೈ ಹೇಳಲಿದೆ ಮೈಕ್ರೋಸಾಫ್ಟ್ ವಿಂಡೋಸ್ 7

ಜನಪ್ರಿಯ ಆಪರೇಟಿಂಗ್ ಸಾಫ್ಟ್‌ವೇರ್ ವಿಂಡೋಸ್‌ 7ಗೆ ಗುಡ್‌ಬೈ ಹೇಳಲು ಮೈಕ್ರೋಸಾಫ್ಟ್‌ ಸಜ್ಜಾಗಿದೆ.

ಮೈಕ್ರೋಸಾಫ್ಟ್‌ ವಿಂಡೋಸ್‌ ಆಪರೇಟಿಂಗ್ ಓಎಸ್‌ ಸರಣಿಯ ವಿಂಡೋಸ್ 7ಗೆ ಜ. 14, 2020ರ ಬಳಿಕ ಸರ್ವಿಸ್ ಅಪ್‌ಡೇಟ್ಸ್‌ ಲಭ್ಯವಾಗುವುದಿಲ್ಲ. ಅಂದು ವಿಂಡೋಸ್ 7ಗೆ ನೀಡುತ್ತಿರುವ ಎಲ್ಲ ಸೆಕ್ಯುರಿಟಿ ಅಪ್‌ಡೇಟ್ ಮತ್ತು ಸಾಫ್ಟ್‌ವೇರ್ ಅಪ್‌ಡೇಟ್ ಬೆಂಬಲ ಕೊನೆಯಾಗಲಿದ್ದು, ಬಳಕೆದಾರರು ಪರಿಷ್ಕೃತ ಆವೃತ್ತಿ ಬಳಸುವಂತೆ ಮೈಕ್ರೋಸಾಫ್ಟ್ ಸೂಚಿಸಿದೆ.

ಮೈಕ್ರೋಸಾಫ್ಟ್ ವಿಂಡೋಸ್ 10 ಅನ್ನು ಮತ್ತಷ್ಟು ಜನಪ್ರಿಯವಾಗಿಸಲು ಹಳೆಯ ಆವೃತ್ತಿಗಳನ್ನು ಬಳಕೆಯಿಂದ ಹಿಂಪಡೆಯುತ್ತಿದೆ.

ಮಾರ್ಚ್ ತಿಂಗಳ ಆರಂಭದಲ್ಲಿಯೇ ಮೈಕ್ರೋಸಾಫ್ಟ್ ಈ ಕುರಿತು ಪ್ರಕಟಿಸಿದ್ದು, ಇದೀಗ ಅಧಿಕೃತವಾಗಿ ಮುಂದಿನ ವರ್ಷದ ಜನವರಿಯಿಂದ ವಿಂಡೋಸ್ 7 ಅನ್ನು ಹಿಂಪಡೆಯುವುದಾಗಿ ಘೋಷಿಸಿದೆ. ಜತೆಗೆ ವಿಂಡೋಸ್ 7 ಬಳಸುತ್ತಿರುವವರಿಗೆ ನೋಟಿಫಿಕೇಷನ್ ಕಳುಹಿಸಿ, ಹೊಸ ಆವೃತ್ತಿಗೆ ಬದಲಾಯಿಸಿಕೊಳ್ಳುವಂತೆ ಸೂಚನೆ ನೀಡಲಿದೆ.

ವಿಂಡೋಸ್ 7 ಅನ್ನು ಹಿಂದಕ್ಕೆ ಪಡೆದ ಬಳಿಕ ಮೈಕ್ರೋಸಾಫ್ಟ್‌ನಿಂದ ಯಾವುದೇ ಅಪ್‌ಡೇಟ್ ಮತ್ತು ಸೆಕ್ಯುರಿಟಿ ಬೆಂಬಲ ದೊರೆಯುವುದಿಲ್ಲ. ಹೀಗಾಗಿ ಬಳಕೆದಾರರು ಪರಿಷ್ಕೃತ ಆವೃತ್ತಿ ಬಳಸಬೇಕಾಗುತ್ತದೆ.