Jio: ಏರ್‌ಟೆಲ್‌ ಅನ್ನು ಹಿಂದಿಕ್ಕಿ 2ನೇ ಸ್ಥಾನ ಪಡೆದ ರಿಲಯನ್ಸ್

ಟೆಲಿಕಾಂ ಮಾರುಕಟ್ಟೆಯಲ್ಲಿ ಬಹುಕಾಲದಿಂದ ಪ್ರಾಬಲ್ಯ ಸಾಧಿಸಿದ್ದ ಭಾರ್ತಿ ಏರ್‌ಟೆಲ್‌ ಅನ್ನು, ಈಗ ರಿಲಯನ್ಸ್‌ ಜಿಯೊ ಹಿಂದಿಕ್ಕಿ ಎರಡನೇ ಸ್ಥಾನಕ್ಕೆ ಬಂದಿದೆ.

ಚಂದಾದಾರರ ಸಂಖ್ಯೆಗೆ ಸಂಬಂಧಿಸಿದಂತೆ ಟ್ರಾಯ್‌ ವರದಿ ಪ್ರಕಟವಾಗಿದ್ದು, ಮುಕೇಶ್‌ ಅಂಬಾನಿ ನೇತೃತ್ವದ ರಿಲಯನ್ಸ್‌ ಜಿಯೊ ಕಂಪನಿ ಮೇ ತಿಂಗಳಲ್ಲಿ 32.29 ಕೋಟಿ ಗ್ರಾಹಕರನ್ನು ಹೊಂದಿದ್ದು, ಎರಡನೇ ಸ್ಥಾನಕ್ಕೆ ಜಿಗಿದಿದೆ. ಶೇ.27.80ರಷ್ಟು ಮಾರುಕಟ್ಟೆ ಪಾಲನ್ನು ಹೊಂದಿದೆ.

ವೊಡಾಫೋನ್‌-ಐಡಿಯಾ ಕಂಪನಿಯು 38.75 ಕೋಟಿ ಗ್ರಾಹಕರೊಂದಿಗೆ ಮೊದಲ ಸ್ಥಾನವನ್ನು ಕಾಯ್ದುಗೊಂಡಿದ್ದು, ಶೇ.33.36ರಷ್ಟು ಮಾರುಕಟ್ಟೆ ಪಾಲನ್ನು ಹೊಂದಿದೆ. ಏರ್‌ಟೆಲ್‌ ಮೂರನೇ ಸ್ಥಾನಕ್ಕೆ ಕುಸಿದಿದ್ದು 32.03 ಕೋಟಿ ಗ್ರಾಹಕರನ್ನು ಹೊಂದಿದೆ. ಶೇ.27.58ರಷ್ಟು ಮಾರುಕಟ್ಟೆ ಪಾಲನ್ನು ಉಳಿಸಿಕೊಂಡಿದೆ.

ರಿಲಯನ್ಸ್‌ ಜಿಯೊ ಸೇವೆ ಆರಂಭವಾದ ಎರಡೂವರೆ ವರ್ಷದಲ್ಲಿಯೇ 32 ಕೋಟಿ ಗ್ರಾಹಕರನ್ನು ತನ್ನ ತೆಕ್ಕೆಗೆ ಸೆಳೆದಿದೆ. ಈ ಮಟ್ಟವನ್ನು ತಲುಪಲು ಏರ್‌ಟೆಲ್‌ 19 ವರ್ಷವನ್ನು ತೆಗೆದುಕೊಂಡಿತ್ತು. ಈ ವರ್ಷದ ಮಾ.2ಕ್ಕೆ 30 ಕೋಟಿ ಗ್ರಾಹಕರ ಗಡಿಯನ್ನು ಜಿಯೊ ದಾಟಿದ್ದು, ಟೆಲಿಕಾಂ ವಲಯದಲ್ಲಿ ನಂ.1 ಸ್ಥಾನದತ್ತ ಗಮನ ನೆಟ್ಟಿದೆ. ಕಾರ್ಯಾಚರಣೆ ಆರಂಭಿಸಿದ 170 ದಿನಗಳಲ್ಲಿ 10 ಕೋಟಿ ಗ್ರಾಹಕರನ್ನು ಜಿಯೊ ತನ್ನ ತೆಕ್ಕೆಗೆ ಹಾಕಿಕೊಂಡಿತ್ತು. ಕಳೆದ ಮೇನಲ್ಲಿಯೇ 81.80 ಲಕ್ಷ ಹೊಸ ಚಂದಾದಾರರು ಜಿಯೊ ತೆಕ್ಕೆಗೆ ಬಂದಿದ್ದಾರೆ.

ದೂರ ಸಂಪರ್ಕ ನಿಯಂತ್ರಕ ಟ್ರಾಯ್‌ನ ಇತ್ತೀಚಿನ ವರದಿ ಪ್ರಕಾರ, ಮಾರುಕಟ್ಟೆಯ ಮುಂಚೂಣಿ ನಾಯಕ ವೊಡಾಫೋನ್‌-ಐಡಿಯಾ ಈ ವರ್ಷ 57 ಲಕ್ಷ ಗ್ರಾಹಕರನ್ನು ಕಳೆದುಕೊಂಡಿದೆ. ಎರಡು ಕಂಪನಿಗಳ ವಿಲೀನದಿಂದಾಗಿ ಮಾರುಕಟ್ಟೆಯಲ್ಲಿ ಅಸ್ತಿತ್ವ ಉಳಿಸಿಕೊಳ್ಳಲು ಸಾಧ್ಯವಾಗಿದೆ ಎಂದು ವಿಶ್ಲೇಷಿಸಲಾಗಿದೆ.

ದರ ಸಮರ ಆರಂಭಿಸಿ ಮಾರುಕಟ್ಟೆಯಲ್ಲಿ ಪಾಲು ಪಡೆದ ಜಿಯೊ 2021ರ ಹೊತ್ತಿಗೆ ಟೆಲಿಕಾಂ ಮಾರುಕಟ್ಟೆಯ ಶೇ. 40ರಷ್ಟನ್ನು ತನ್ನ ಹಿಡಿತಕ್ಕೆ ಪಡೆಯಲಿದೆ ಎನ್ನುವುದು ಅಮೆರಿಕ ಮೂಲದ ಕಂಪನಿಯೊಂದರ ಅಂದಾಜು.

ಯಾವ ಕಂಪನಿಗೆ ಎಷ್ಟು ಗ್ರಾಹಕರು?
ವೊಡಾಫೋನ್‌-ಐಡಿಯಾ: 38.75 ಕೋಟಿ
ಜಿಯೊ: 32.29 ಕೋಟಿ
ಏರ್‌ಟೆಲ್‌: 32.03 ಕೋಟಿ.